一滴一滴的水
Chi̍t tih chi̍t tih ê chuí
文獻資訊
| 項目 | 資料 |
|---|---|
| 作者 | 陳清忠 Tân Chheng-tiong |
| 卷期 | 芥菜子 |
| 卷期 | 第 5 號 |
| 日期 | 1926/6 |
| 頁數 | 8-9 |
白話字（原文數位化）
Chi̍t tih chi̍t tih ê chuí
(Soà-chiap chêng-hō)
(11)
Siú-chîⁿ-lô͘
Chi̍t ê siú-chîⁿ-lô͘ chiong i chi̍t-tè kim-kak tâi tī thô͘ lāi, iā ta̍k-ji̍t khì hia khoàⁿ lâi choè khoài-lo̍k. Ū chi̍t-ji̍t chai i hit-tè kim-kak hō͘ lâng thau-the̍h khì, chin siong-pi, chiū chhut toā siaⁿ háu. Keh-piah ê lâng khoàⁿ-kìⁿ i án-ni chiū kā i kóng. “Chhiáⁿ bián siong-pi, the̍h chit-tè chio̍h-thâu tâi tī hit-khang, iā siūⁿ hit tè sī kim, chiū hit-tè chio̍h-thâu, tuì lí lâi khoàⁿ kap n̂g-kim sī saⁿ-tâng; in-uī n̂g-kim tī hit-khang ê sî, lí to lóng bô ēng--i.”
KÀ-SÎ Lán put-sî teh thiaⁿ pó-poè ê Chin-Lí, m̄ chai ū kuí ê the̍h lī-ēng hit ê pó-poè? Nā-sī ū ji̍p bô chhut, sim-lāi só͘ chek-chū ê chin-lí, kap hit-tè chio̍h-thâu ū sím-mi̍h kò-iūⁿ?! TIO̍H KIÂⁿ!!
(12)
Lû kap Chiong-su (sek-sut)
Chit-ji̍t, chi̍t chiah lû-á thiaⁿ-kìⁿ choē-choē chiah chiong-su teh chhiùⁿ-koa, in ê siaⁿ-im hō͘ i chin hoaⁿ-hí, kàu i ê sim-koaⁿ hi-bōng chin ài tit-tio̍h hit-khoán hó ê siaⁿ-im lâi chhiùⁿ-koa. Lû-á chiū mn̄g chiong-su kóng, “Lia̍t-uī ê siaⁿ-im oē hiah-nih hó, tauh-tí sī chia̍h sím-mi̍h pì-hng?” Chóng-sī in ìn kóng “Goán kan-ta suh lō͘-chuí nā-tiāⁿ.” Lû-á chiū koat-sim beh chia̍h lō͘-chuí thang tit-tio̍h hó ê siaⁿ-im, chóng-sī āu-lâi bô-kú liâm-piⁿ gō-sí.
KÀ-SĪ Khoàⁿ-kìⁿ pa̍t lâng ê só͘ choè, ài tú-tú án-ni lâi o̍h, hit-khoán ê lâng, bô-kú liâm-piⁿ hoat-kiàn i pún-sin sī kap lû-á pîⁿ-gōng.
(13)
Chiú-chuì ê tiōng-hu.
Chi̍t ê hū-jîn-lâng, i ê tiōng-hu put-sî chiú-chuì. I ū ēng choē-choē ê hong-hoat ài beh hō͘ i ê tiông-hu kái-sim, chóng-sī lóng bô chhái-kang. Ū chi̍t-àm pêng-iú chhoā chiú-chuì ê tiōng-hu tńg-lâi ê sî, i chiū koh chhoā i kàu hū-kūn ê bōng-á-po͘. Hū-jîn-lâng chiū chhēng chin pháiⁿ khoàⁿ ê saⁿ, bīn tì siáu-kuí-á-khak, thèng-hāu i ê tiōng-hu cheng-sîn. āu-lâi chiū ēng chōng-giâm ê thài-tō͘ ná kiâⁿ oá lâi, the̍h chia̍h-mi̍h hō͘--i, ēng chhiⁿ-chhìn ê siaⁿ kā i kóng, “Khí lâi chia̍h, phâng mi̍h hō͘ sí-lâng chia̍h ê, chiū-sī goá ê chit-bū lah!” Tiōng-hu chiū kóng, “Ah, khó-sioh lí bat goá bô chhim, siat-sú lí nā kap goá khah siong-sek, lí tek-khak bô phâng chiah ê mi̍h, lí beh koāⁿ sio-chiú lâi hō͘ goá lim!” KÀ-SĪ Kiat-tēng ê si̍p-koàn chiū-sī tē-jī thian-sèng.
(14)
Sai kap choâ
Ū ui-giâm ê sai teh chhē chia̍h-mi̍h ê sî, hut-jiân khoàⁿ-tio̍h chi̍t-bé choâ, khûn-khūn teh pha̍k-ji̍t. Sai in-uī pak-tó͘ iau, siōng-chhiáⁿ boē tit ta̍t bo̍k-tek, chai choâ boē chia̍h-tit ê in-toaⁿ; suî-sî ēng ko-bān ê thài-tō͘, chiong i ê chêng-kha lâi that hit-bé choâ. Choâ toā siū-khì, chiū tuì sai toā-la̍t tok chi̍t ē. Chit chiah chhiū-nâ ê eng-hiông teh-beh sí ê sî, choâ chiū tuì sai kóng, “Kín sí, kín hó! Lí phah-sǹg lí ê kiông, kap koân-le̍k, ū kàu-giah thang kiù lí m̄-bián tú-tio̍h bia̍t-bô!!? Lí tio̍h chai sui-bóng bô tio̍k ê siù, bóng bô tio̍k ê siù, nā hoān-tio̍h chhèng-lō͘ iuⁿ-goân oē choân-bia̍t ap-chè ka.”
KÀ-Sī Bû-lé ko-bān ê lâng ah, lí ê āu-bīn ū siong-tong ê phò-bia̍t teh tè lí!!
(15)
Sai, Gû, Soaⁿ-iûⁿ, Biân-iûⁿ.
Ū chi̍t-pái gû, soaⁿ-iûⁿ biân-iûⁿ kap Sai saⁿ-kap iok-sok beh chiong só͘ tit-tio̍h ê mi̍h saⁿ-kap pun. Bô kú soaⁿ-iûⁿ só͘ tiuⁿ ê ta̍uh-á ū tng tio̍h chi̍t-chiah toā-lo̍k. Só͘-í soaⁿ-iûⁿ suî-sî tiàu-chi̍p i ê tâng-phoāⁿ. Sai chiū chiong hit-chiah toā-lo̍k pun-choè sì hūn, tiong-kan siāng-hó ê hūn lâu khí-lâi chiū kóng, “Goá sī sai, goá eng-kai tio̍h tit chit-hūn.” āu-lâi the̍h chi̍t hūn kóng, “chit-hūn chiàu chèng-tong ê koân-lī sī goá ê, siat-sú lín nā sī ài chai, chiah lâi kóng khoàⁿ! Kiông-chiá ê koân-lī lah!” Koh-chài the̍h tē saⁿ hūn hē tī sin-piⁿ kóng, “chit-hūn sī ióng-chiá ê, nā sī só͘ chhun chit-hūn, lín nā ū lâng káⁿ bong khoàⁿ bāi!” I ê tâng-phoāⁿ bô ìn poàⁿ kù oē, kín khí-kha tô-cháu. KÀ-Sī Kap siuⁿ kiông--ê, á-sī káu-koài--ê kiat pêng-iú sī gōng.
漢羅（Ùi原文改寫）
一滴一滴的水
(續接前號)
(11)
守錢奴
一个守錢奴將伊一tè金角 tâi佇土內，也逐日去遐看來做快樂。有一日知伊彼tè金角予人偷提去，真傷悲，就出大聲吼。隔壁的人看見伊按呢就共伊講。「請免傷悲，提這tè石頭tâi佇彼空，也想彼tè是金，就彼tè石頭，對你來看佮黃金是相同；因為黃金佇彼空的時，你都攏無用--伊。」
教示 咱不時teh聽寶貝的真理，毋知有幾个提利用彼个寶貝？若是有入無出，心內所積聚的真理，佮彼tè石頭有啥物kò樣？！著行！！
(12)
驢佮螽斯 (蟋蟀)
這日，一隻驢仔聽見濟濟隻螽斯 teh唱歌，in 的聲音予伊真歡喜，到伊的心肝希望真愛得著彼款好的聲音來唱歌。驢仔就問螽斯講，「列位的聲音會 遐爾好，到底是食甚物秘方？」總是in應講「阮kan-ta suh露水nā-tiāⁿ。」驢仔就決心欲食露水通得著好的聲音，總是後來無久連鞭餓死。
教示 看見別人的所做，愛tú-tú按呢來學，彼款的人，無久螽斯發見伊本身是佮驢仔平戇。
(13)
酒醉的丈夫。
一个婦人人，伊的丈夫不時酒醉。伊有用濟濟的方法愛欲雨伊的丈夫改心，總是攏無彩工。有一暗朋友chhoā酒醉的丈夫轉來的時，伊就閣chhoā伊到附近的墓仔埔。婦人人就穿真歹看的衫，面tì 痟鬼仔殼，聽候伊的丈夫精神。後來就用莊嚴的態度ná行倚來，提食物予--伊，用生凊的聲共伊講，「起來食，phâng物予死人食的，就是我的職務lah！」丈夫就講，「Ah，可惜你捌我無深，設使你若佮我較相熟，你的確無phâng遮个物，你欲koāⁿ燒酒來予我lim！」
教示 結tēng 的習慣就是第二天性。
(14)
獅佮蛇
有威嚴的獅teh揣食物的時，忽然看著一尾蛇，khûn-khūn teh曝日。獅因為腹肚枵，尚且袂得達目的，知蛇袂食得的因端；隨時用高慢的態度，將伊的前跤來that彼尾蛇。蛇大受氣，就對獅大力tok一下。這隻樹林的英雄teh欲死的時，蛇就對獅講，「緊死，緊好！你拍算你的強，佮權力，有夠額通救你毋免拄著滅無！！？你著知雖罔2無tio̍k 的獸罔無tio̍k 的獸，若犯著chhèng-lō͘ 猶原會全滅壓制家。」
教示 無禮高慢的人ah，你的後面有相當的破滅teh綴你！！
(15)
獅、牛、山羊、綿羊。
有一擺牛，山羊綿羊佮獅相saⁿ-kap約束欲將所得著的物saⁿ-kap分。無久山羊所張的 ta̍uh仔有當著一隻大鹿。所以山羊隨時召集伊的同伴。獅就將彼隻大鹿分做四份，中間上好的份留起來就講，「我是獅，我應該著得這份。」後來提一份講，「這份照正當的權利是我的，設使恁若是愛知，才來講看！強者的權利lah！」閣再提第三份 hē佇身邊講，「這份是勇者的，若是所chhun這份，恁若有人敢摸看bāi！」伊的同伴無應半句話，緊起跤逃走。
教示 佮傷強--的，抑是狡獪--的結朋友是戇。