聖誕歌

SÈNG-TÀN-KOA

文獻資訊

項目	資料
作者	陳清忠 Tân Chheng-tiong
卷期	芥菜子
卷期	第 3 號
日期	1926/1
頁數	41-44

白話字（原文數位化）

SÈNG-TÀN-KOA

(Tē saⁿ hoê. Soà-chiap chêng-hō)

Sî-cheng tú tân chi̍t tiám ê sî, hut-jiân ū toā kng chiò ji̍p pâng-keng, tē-it ê Sîn chiū ji̍p--lâi. I ê bīn sī chhin-chhiūⁿ gín-ná; thâu-mn̂g pe̍h chhin-chhiūⁿ lāu-lâng. Seng-khu chhēng pe̍h tn̂g-saⁿ, saⁿ-á-ku kún muî-kuì-hoe. Chhiú-nih ū giâ chhiⁿ-chhuì ê “to-lô hioh (holly Sèng-tàn ê sî ēng ê si̍t-bu̍t ê miâ) Toā-kng chha̍k tio̍h Kian-līn ê ba̍k-chiu, chiū tah-hiahN cheng-sîn, tio̍h chi̍t-kiaⁿ, chiū mn̄g

kóng: “Lí siáⁿ lâng?”

Sîn. Goá chiū-sī kè-liáu (chá-chêng) Sèng-tàn ê Sîn.

Kian-līn. Kè-liáu chin-kú--ê sī m̄?

Sîn. Lí ê kè-liáu lah! Goá lâi sī uī-tio̍h lí it-seng ê an-lêng. Khí-lâi kap goá saⁿ-kap kiâⁿ!

Kian-lîn. Goā-bīn chin koâⁿ－goá chhēng po̍h-po̍h－koh-chài goá ū kám-tio̍h－

Sîn. Sī uī-tio̍h beh kiù lí. Tio̍h thiaⁿ!

Kian-līn. Hó-lah! Goá beh khì－tek-khak－tek-khak! Sîn. Lâi!

Sîn chiū khan Kian-līn ê chhiú, kiâⁿ oá khì thang-á, thang-á iû-goân koh ka-kī khui-khì.

Kian-līn, Sîn-ah－bān-chhiáⁿ cheh! Goá sī lâng－goá oē poa̍h-lo̍h--khì!

Sîn. (ēng chhiú khoà tī i ê sim-koaⁿ) Tio̍h chai, nā sái goá ê chhiú khoà tī lí ê heng-khám, lí teh-beh tit-tio̍h toā-toā ê oān-chō͘. Lâi!

Nn̄g lâng phû-chhut thang-á liáu-āu, Sîn chiū chhoā Kian-līn kàu chi̍t-tiâu chhân-chng ê(誤植ē) lō͘, kūn-oá tī chi̍t ê hiuⁿ-chng. Sì-bīn ê hn̂g lóng hō͘ seh khàm-ba̍t.

Kian-līn (Khoàⁿ sì-koè) EhN! Chia－chia tō(誤植to) sī goá choè gín-ná ê sî put-sî teh kiâⁿ ê só͘-chāi!

Sîn. án-ni! oē kì-tit lí choè gín-ná ê sî(誤植sī)-tāi lah hohN! Kian-līn. oē-oē! Goá siūⁿ ta̍k-hāng to oē kì-tit ê khoán－goá choè gín-ná ê sî ê ǹg-bāng, ê hoaⁿ-hí, ê hoân-ló－lóng oē kì-tit!

Sîn. Lí ê chhuì-tûn teh chhoah. Lí ê chhuì-phoé kim-kim he(誤植hé) siáⁿ?

Kian-līn. (Chhit i ê ba̍k-sái) Bô-bô lah!－(Tī hn̄g-hn̄g ū thiaⁿ-kìⁿ toā siaⁿ teh hoah ê siaⁿ) Ah, ti̍t-ti̍t lâi hiah ê gín-ná, goá lóng bat in; in lóng sī goá ê tha̍k-chheh phoāⁿ!

Sîn. Chiah ê lóng sī chá-chêng kè-liáu ê sū ê iáⁿ nā-tiāⁿ. In tuì lán lóng bô kám-kak.

Hiah ê gín-ná ná kiâⁿ, ná ēng seh-kiû saⁿ hám, kàu siang-chhe lō͘, chiū pun-khui, tāi-ke saⁿ-kap hoah……

Tē-it ê gín-ná    Sèng-tàn chin kiong-hí!

Tē-jī ê gín-ná    Sèng-tàn chin kiong-hí!

Tē-saⁿ ê gín-ná.    Sin-nî chin kiong-hí!

Kian-līn. (Chin hoaⁿ-hí) Hiàng-sî “goá tú-tú sī án-ni! Lí thiaⁿ! In teh hoah “Sèng-tàn chin kiong-hí!” “Sin-nî chin kiong-hí!”

Sîn.    In án-ni hoah, kiám ū tit-tio̍h sím-mi̍h lī-ek?

In kám bat uī-tio̍h án-ni lâi tit-tio̍h chi̍t-sián mah?

Kian-līn.  Ah, goá chai lí teh hiâm goá (ēng chhiú-ńg chhit i ê ba̍k-chiu) Goá nā-ah, chóng-sī siuⁿ bān lah!

Sîn.    Sī cháiⁿ-iūⁿ?

Kian-līn.  Bô lah! Cha-àm chi̍t ê gín-ná tī goá ê mn̂g-kháu teh chhiùⁿ SÈNG-TÀN KOA. Goá nā tām-po̍h mi̍h hō͘ i chiū chin hó－án-ni nā-tiāⁿ.

Sîn.    Lán koh lâi khì khoàⁿ pa̍t ê Sèng-tàn!

Sîn koh chhoā Kian-līn kàu chit keng siong-tiàm ê lāi-bīn. Chi̍t ê lāu sin-sū, thâu-khak tì (誤植tī) pe̍h mn̂g cháng, (Chá-sî ê hong-sio̍k) chē tī koân-toh ê āu-bīn. Nn̄g ê siàu-liân su-kì chē tī i ê sin-piⁿ kē-pê siá-jī-toh.

Sîn.    Lí bat chit-ê só͘-chāi bô?

Kian-līn.  iā ē m̄-bat! Goá chá-sî tī chia chia̍h thâu-lō͘ Kóng! Ah! Goá ê lāu thâu-ke toā-liōng peh-ah! EhN! Láu-si̍t hiaⁿ-tī chiàⁿ-pêng toh teh chē, iā Goá tī tò-pêng (誤植toh-pêng), he (誤植hé) iā chiâⁿ sim-sek lah! Sim-sek!sim-sek!

Sîn.    Bô sím-mi̍h thang kî-koài, in-uī goá sī Kè-liáu Sèng-tàn ê Sîn, só͘-í só͘ pò lí khoàⁿ ê lóng sī chá chêng ê sū lah!

Kian-līn.  Goá kap Láu-si̍t hiaⁿ chiâⁿ siong-hó. Ah! Lí khoàⁿ leh! Toā-liōng peh-ah, hiat pit tī toh-téng, oa̍t-thâu teh khoàⁿ sî-cheng! Sî-kan to iáu bē kàu kóng!!

Toā-liōng.  Taⁿ lín chiah ê sin-lô! Tio̍h thêng kang. Ē-hng sī Sèng-tàn mî, Láu-si̍t-ehN! Ē-hng sī Sèng-tàn àm, Kian-līn ehN!

(Lóng-chóng chiū lī-khui siá-jī toh, koh lâng (誤植kó͘ lâng) the̍h ka-kī ê bō-á kap niá-kun)

Bān-chhiáⁿ, bān-chhiáⁿ, bō-á kap niá-kun lóng koh hē-teh! Ē-hng lóng tio̍h tī chia chia̍h àm.

(Toā-liōng só ji̍p-lâi ná kiâⁿ ná chhiò) Thâu-Ke niû chi̍t-tia̍p lâi teh-beh chhiáⁿ lín.

Toā-liōng só. Lia̍t-uī ê sin-lô, ē-hng tio̍h kap goán chē-toh, thang hō͘ goán ê toh tit-tio̍h kong-êng, m̄-thang the-sî. Ē-hng sī Sèng-tàn mî.

Láu-si̍t.    Thâu-ke niû, lí si̍t-chāi chiâⁿ chhin-chhiat, chiâⁿ hó!

Kian-līn (誤植lín).    Si̍t-chāi lí chin gâu khoán-thāi goán!

Kian-līn.    (Tōng Sîn ê kha-chiah (誤植ka-chiah)) Goá tú-tú kóng chiah ê oē, bô chha chi̍t kù.

Toā-liōng só. Taⁿ chhiáⁿ lóng ji̍p lâi chē!

Toā-liōng. Lâi khì chē toh!

Láu-si̍t.    Thâu-ke ah, Lí ta̍k-pái to chiah nih chhin-chhiat!

Kian-līn.    Thâu-ke ah, Lí chiâⁿ gâu thiàⁿ goan!

In ná kiâⁿ ná kóng oē, iā ná chhiò.

Kian-līn.    Hé, chiâⁿ kî lah! Goá tú-tú án-ni kóng, chóng-sī si̍t-chāi m̄-bat khoàⁿ-kìⁿ chi̍t lâng hiah ni̍h hó, chhin-chhiūⁿ Toā-liōng peh ah! Pa̍t lâng sím-mi̍h lâng tī Sèng-tàn-mî teh-beh chhiáⁿ i ê sin-lô saⁿ-kap chē-toh ah?

Bô! Tiāⁿ tio̍h bô! Goá káⁿ kóng!!

Sîn.        Sió-khoá-sū hō͘ lí hiah moá-chiok sī m̄?

Kian-līn.    Sió-khoá sū!!

Sîn.        Kám bô iáⁿ (誤植iâⁿ)? Chhiáⁿ lín chit kuí ê, kám tio̍h khai kàu loā choē chîⁿ!

Kian-līn (誤植Kian-lín).    (Chin moá-chiok)  Hé! M̄-sī án-ni kóng! Beh hō͘ goán hoaⁿ-hí, m̄ hō͘ goán hoaⁿ-hí lóng tī i ê chhiú-thâu. Hō͘ goán ê kang, khin, tāng mā chāi tī i. Si̍t-chāi i só͘ hō͘ goán ê hoaⁿ-hí oē ta̍t-tit chi̍t ê ke-hé. Ah! Goá nā－(I thêng-khùn)

Sîn.        Sī án-choáⁿ?

Kian-līn.    Bô, bô cháiⁿ-iūⁿ.

Sîn.        Goá siūⁿ ū?

Kian-līn.    Ū-lah! Khiok sī teh siūⁿ chit-chūn goá nā oē tit-thang kap goá ê sin-lô kóng chi̍t nn̄g-kù oē m̄ chin hó!

Sîn.        Taⁿ tio̍h koh kiâⁿ. Goá tio̍h koh chhoā lí tuì chia lâi khì. Goá ê kang-tiâⁿ í-keng liáu. Lâi!－lâi!－

Sîn chiū khan Kian-līn ê chhiú chhut-khì.

(iáu-bē liáu, āu hō beh koh soà-chiap)

漢羅（Ùi原文改寫）

聖誕歌

（第三回。續接前號）

時鐘tú tân一點的時，忽然有大光照入房間，第一的神就入--來。伊的面是親像囡仔；頭毛白親像老人。身軀穿白長衫，衫á裾滾玫瑰花。手裡有giâ青翠的 「to-lô葉(holly聖誕的時用的植物的名)大光鑿著Kian-līn的目睭，就tah-hiahN精神，著一驚，就問

講：「你啥人？」

神。我就是過了(早前)聖誕的神。

Kian-līn。過了真久--ê是毋？

神。你的過了lah！我來是為著你一生的安寧。起來佮我相佮行！

Kian-lîn。外面真寒－我穿薄薄－閣再我有感著－

神。是為著欲救你。著聽！

Kian-līn。好lah！我欲去－的確－的確！神。來！

神就牽Kian-līn的手，行倚去窗á，窗á猶原閣家己開去。

Kian-līn，神ah－慢請cheh！我是人－我會跋落--去！

神。(用手掛佇伊的心肝)著知，若sái我的手掛佇你的胸坎，你teh欲得著大大的援助。來！

兩人浮出窗á了後，神就chhoā Kian-līn到一條田庄的路，近倚佇一个鄉庄。四面的園攏予雪蓋密。

Kian-līn(看四界) EhN！遮－遮就是我做囡仔的時不時teh行的所在！

神。按呢！會記得你做囡仔的時代lah hohN！ Kian-līn。會=會！我想逐項都會記得的款－我做囡仔的時的向望，的歡喜，的煩惱－攏會記得！

神。你的嘴唇teh掣。你的嘴phoé金金彼啥？

Kian-līn。(拭伊的目屎)無－無lah！－(佇遠遠有聽見大聲teh喝的聲) Ah，直直來遐的囡仔，我攏捌in；in攏是我的讀冊伴！

神。遮的攏是早前過了的事的影若定。In對咱攏無感覺。

遐的囡仔ná行，ná用雪球相hám，到雙叉路，就分開，大家相佮喝……

第一的囡仔聖誕真恭喜！

第二的囡仔聖誕真恭喜！

第三的囡仔。新年真恭喜！

Kian-līn。(真歡喜) Hiàng時「我拄拄是按呢！你聽！In teh喝 「聖誕真恭喜！」「新年真恭喜！」

神。In按呢喝，敢有得著甚物利益？

In敢捌為著按呢來得著一-sián mah？

Kian-līn。Ah，我知你teh嫌我(用手ńg拭伊的目睭)我若－ah，總是傷慢lah！

神。是怎樣？

Kian-līn。無lah！Cha暗一个囡仔佇我的門口teh唱聖誕歌。我若淡薄物予伊就真好－按呢若定。

神。咱閣來去看別的聖誕！

神閣chhoā Kian-līn到這間商店的內面。一个老紳士，頭殼戴白毛總，(早時的風俗)坐佇懸桌的後面。兩个少年書記坐佇伊的身邊低pê寫字桌。

神。你捌這个所在無？

Kian-līn。也會毋捌！我早時佇遮食頭路

講！Ah！我的老頭家大量伯ah！

EhN！老實兄弟正爿桌teh坐，也我佇倒爿，彼也誠心適lah！心適！心適！

神。無甚物通奇怪，因為我是過了聖誕的神，所以所報你看的攏是早前的事lah！

Kian-līn。我佮老實兄誠相好。Ah！你看leh！大量伯ah，hiat筆佇桌頂，越頭teh看時鐘！時間都猶袂到講！！

大量。今恁遮的薪勞！著停工。下昏是聖誕暝，老實-ehN！下昏是

聖誕暗，Kian-līn ehN！

(攏總就離開寫字桌，各人提家己的帽仔佮領巾)

慢且，慢且，帽仔佮領巾攏閣下teh！下昏攏著佇遮食暗。

(大量嫂入來ná行ná笑)頭家娘一霎來teh欲請恁。

大量嫂。列位的薪勞，下昏著佮阮坐桌，通予阮的桌得著光榮，毋通推辭。下昏是聖誕暝。

老實。頭家娘，你實在誠親切，誠好！

Kian-līn。實在你真gâu款待阮！

Kian-līn。(Tōng神的跤chiah)我拄拄講遮的話，無差一句。

大量嫂。今請攏入來坐！

大量。來去坐桌！

老實。頭家ah，你逐擺都遮爾親切！

Kian-līn。頭家ah，你誠gâu疼goan！

In ná行ná講話，也ná笑。

Kian-līn。Hé，誠奇lah！我拄拄按呢講，總是實在毋捌看見一人遐爾好，親像大量伯ah！別人甚物人佇聖誕暝teh欲請伊的薪勞相佮坐桌ah？

無！定著無！我敢講！！

神。小可事予你遐滿足是毋？

Kian-līn。小可事！！

神。敢無影？請恁這幾个，敢著開到偌濟錢！

Kian-līn。(真滿足)Hé！毋是按呢講！欲予阮歡喜，毋予阮歡喜攏佇伊的手頭。予阮的工，輕，重嘛在佇伊。實在伊所予阮的歡喜會值得一个家伙。Ah！我若－(伊停睏)

神。是按怎？

Kian-līn。無，無怎樣。

神。我想有？

Kian-līn。有lah！卻是teh想這陣我若會得通佮我的薪勞講一兩句話毋真好！

神。今著閣行。我著閣chhoā你對遮來去。我的工程已經了。來！－來！－

神就牽Kian-līn的手出去。

(猶未了，後號欲閣紲接)