袂得赦ê罪
BOĒ TIT SIÀ Ê CHOĒ
文獻資訊
| 項目 | 資料 |
|---|---|
| 作者 | 陳清忠 Tân Chheng-tiong |
| 卷期 | 芥菜子 |
| 卷期 | 第 2 號 |
| 日期 | 1925/10 |
| 頁數 | 14-15 |
白話字（原文數位化）
BOĒ TIT SIÀ Ê CHOĒ
“Kìⁿ-nā kóng oē kong-kek jîn-chú ê, beh sià-bián i; to̍k-to̍k kìⁿ-nā kóng oē kong-kek Sèng Sîn ê, put-lūn kim-sè lâi-sè bô beh sià-bián i.” Má-thài 12 chiuⁿ 32 chat.
Chit-chat só͘ kóng sī teh chí sím-mi̍h khoán ê choē, iā tio̍h cháiⁿ-iūⁿ lâi koé-soeh? Lán tāi-ke nā hoān-tio̍h chit-khoán éng sí éng bia̍t ê choē-koà, bān sū chīn-hiu, tek-khak boē-tit thang siám-pī choa̍t-bāng kap pi-kám. Só͘-í chit kù lán boē bián-tit tio̍h chim-chiok lâi gián-kiù, chēng-chēng lâi chhim-siūⁿ; in-uī sī chin iàu-kín ê bûn-toê.
Lán ū sìn tuì tī hoán-hoé kap sìn-gióng oē tit-tio̍h choē sià, iā ū sìn he̍k-sī tī kim-sè á-sī bô lūn tī lâi-sè ū chit-khoán éng boē sià ê choē－lán chin kiaⁿ－Hit-ê choē chiū-sī pòng-to̍k Sèng Sîn ê choē.
Kin-ná ji̍t tī lán ê tiong-kan ū choē-choē ê Ki-tok-tô͘, sìn in nā-sái niá-siū soé-lé chiū oē tit thang chheng-choè Thian-kok ê peh-sìⁿ. In ê só͘ siūⁿ sī bô chiàu Sèng-keng. iā koh siūⁿ tī lán ê tiong-kan, ū hit -khoán tú chiàu téng-bīn só͘ kóng, hoān-tio̍h tī toē-bīn he̍k-sī tī sí āu, éng-kiú boē tit sià ê choē. Lán tek-khak boē-oē tiām-tiām lâi bô siūⁿ, bô khoà-sim tī chit-khoán ê sū.
- oē tit-tio̍h sià ê choē
“Lâng só͘ ū ê choē kap bô chheng-khì siùⁿ, oē tit thang sià.” “Kìⁿ-nā lâng kóng oē kong-kek Jîn-chú ê, beh sià-bián-i.” Che chiū-sī chí it-poaⁿ bê-sìn-chiá ê choē, bô láu-si̍t á-sī pek-hāi ê choē, mā-chú, he̍k-sī phah-pháiⁿ tō-tek, hoat-lu̍t kok-liâu ê choē. Tāi-pi̍t bat thâi sí choē-choē lâng, iā bat hoān-tio̍h kan-îm ê choē; nā-sī i chin-si̍t ū hoán-hoé, tī Siōng-tè ê bīn-chêng khiam-pi lâi kiû sià-bián. Tāi-sò͘ ê Sò-lô iā sī toā-toā hoán-ge̍k tī Chú, chóng-sī i kóng “Goá bē sìn ê sî, m̄ chai khì choè, só͘-í ū tit-tio̍h lîn-bín.” Ki-tok-tô͘ lóng-chóng tio̍h hoán-hoé, sin lâi thang tit-tio̍h chit-khoán ê un-tián.
- Boē tit-tio̍h sià ê choē.
”—-to̍k-to̍k kìⁿ-nā kóng-oē kong-kek Sèng Sîn ê, put-lūn kim-sè lâi-sè bô beh sià-bián-i.”
Hoat-lī-sài ê lâng ū hoān-tio̍h chit-khoán bô sià ê choē. In tī Iâ-so͘ ê bīn-chêng bêng-bêng ū khoàⁿ-kìⁿ Iâ-so͘ é-káu oē kóng oē, chhiⁿ-mî oē khoàⁿ-kìⁿ í-ki̍p ta̍k khoán ê sîn-jiah, iā khoàⁿ chèng-lâng kiaⁿ-hiâⁿ, teh o-ló Siōng-tè; in sui-bóng cha̍p-hun chai sī Sîn-lêng ê la̍t, iáu-kú ēng oàn-tò͘ ê ba̍k-chiu, thiau-kang ēng siâ-ok ê sim-koaⁿ chiong chi̍t ê Sîn-le̍k kui tī Mô͘-kuí ê só͘-choè. Chit-khoán beh kóng sī hoán-khòng Iâ-so͘ m̄ ta̍t-tio̍h, tio̍h kóng sī hoán-ge̍k tī Iâ-so͘ ê lāi-bīn teh oa̍h-tāng ê Sèng Sîn. Tāi-chì nā choè kàu án-ni chiū bô thang sià-bián ê só͘-chāi.
Lán oē tit-tio̍h sià-choē, oē tit-tio̍h kiù lóng sī tuì tī lán ê hoán-hoé, sìn-gióng, sìn koh-oa̍h ê Chú kap Si̍p-jī-kè ê huih lâi soé chheng. Hoat-lī-sài lâng khoàⁿ-kìⁿ hó, kóng sī pháiⁿ, bêng-bêng chai sī Sîn-le̍k, iáu-kú lâi kui tī ok-mô͘. In ēng goán-kò͘ lâi cha̍h kng ê lō͘, thiau-kang lâi kū-choa̍t Sèng Sîn ê chí-sī, án-ni boē tit-tio̍h Sèng Sîn ê kám-hoà, seng-khu bô poàⁿ ê thang-á thang hō͘ oa̍h-miā ji̍p-lâi. Sìn-gióng, hoán-hoé lóng boē chiâⁿ. Si̍t-chāi thang kóng sī sià-choē tit-kiù ê tì-bēng-siong (致命傷).
Siat-sú lán nā chèng-ti̍t, chin-kiàn, tuì sim-koaⁿ lâi hoán-séng, mn̄g lán ka-kī khoàⁿ ū pòng-to̍k Sèng Sîn ā-bô? Lán ê hêng-uî ū thiau-kang lâi tí-khòng Sîn ê la̍t á-bô? Ū ge̍k Sèng Sîn ê chí-sī kap chí-tō á-bô? Nā-sī khiam-sùn ê lâng, i tek-khak tit-tio̍h sià-bián.
Nā-sī ēng Siōng-tè kap Iâ-so͘ lâi lī-ek ê khì-khū, (chhin-chhiūⁿ choè seng-lí ê pâi-pián), iā siūⁿ kóng tán beh sí ê sî chiah lâi chin-sim chhám-hoé, chiū tek-khak oē tit thang ji̍p tit-kiù ê mn̂g; hit-khoán ê lâng toàn-toàn tī kim-sè lâi-sè boē tit-tio̍h sià ê lâng. Hoat-lī sài lâng ū hoān-tio̍h chit-khoán ê choē.
Kin-ná-ji̍t lán tāi-ke sím-mi̍h khoán?
Mî-ji̍t ū teh kiaⁿ-hiâⁿ teh béng-séng- -bô?!!!
漢羅（Ùi原文改寫）
袂得赦Ê罪
「見若講話攻擊人子ê，欲赦免伊；獨獨見若講話攻擊聖神ê，不論今世來世無欲赦免伊。」馬太12章32節。
這節所講是teh指啥物款ê罪，也著怎樣來解說？咱大家若患著這款永死永滅ê罪過，萬事盡休，的確會得thang閃避絕望kap悲感。所以這句咱袂免得著斟酌來研究，靜靜來深想；因為是真要緊ê問題。
咱有信對佇反悔kap信仰會得著罪赦，也有信或是佇今世á是無論佇來世有這款永袂赦ê罪－咱真驚－彼个罪就是謗瀆聖神ê罪。
今仔日佇咱ê中間有濟濟ê基督徒，信in若使領受洗禮就會得thang稱做天國ê百姓。In ê所想是無照聖經。也koh想佇咱ê中間，有彼款拄照頂面所講：患著佇地面或是佇死後，永久袂得赦ê罪。咱的確袂會恬恬來無想，無掛心佇這款ê事。
- 會得著赦ê罪
「人所有ê罪kap無清氣相，會得thang赦。」「見若人講話攻擊人子ê，beh赦免伊。」這就是指一般迷信者ê罪，無老實á是迫害ê罪，罵主，或是拍歹道德，法律各條ê罪。大衛捌刣死濟濟人，也捌患著姦淫ê罪；若是伊真實有反悔，佇上帝ê面前謙卑來求赦免。大數ê所羅也是大大反逆佇主，總是伊講「我袂信ê時，毋知去做，所以有得著憐憫。」基督徒攏總著反悔，新來thang得著這款ê恩典。
- 袂得著赦ê罪。
「—-獨獨見若講話攻擊聖神ê，不論今世來世無欲赦免伊。」
法利賽ê人有患著這款無赦ê罪。In佇耶穌ê面前明明有看見耶穌啞口會講話，青暝會看見以及逐款ê神蹟，也看眾人驚惶，teh呵咾上帝；in雖bóng十分知是神靈ê力，猶久用怨妒ê目睭，調工用邪惡ê心肝將這个神力歸佇魔鬼ê所做。這款欲講是反抗耶穌毋達著，著講是反逆佇耶穌ê內面teh活動ê聖神。代誌若做到按呢就無thang赦免ê所在。
咱會得著赦罪，會得著救攏是對佇咱ê反悔、信仰，信koh活ê主kap十字架ê血來洗清。法利賽人看見好，講是歹，明明知是神力，猶久來歸佇惡魔。In用頑固來cha̍h光ê路，調工來拒絕聖神ê指示，按呢袂得著聖神ê感化，身軀無半个窗á thang予活命入來。信仰、反悔攏袂成。實在thang講是赦罪得救ê 致命傷（致命傷）。
設使咱若正直、真劍，對心肝來反省，問咱家己看有謗瀆聖神ā無？咱ê行為有調工來抵抗神ê力á無？有逆聖神ê指示kap指導á無？若是謙遜ê人，伊的確得著赦免。若是用上帝kap耶穌來利益ê器具，（親像做生理ê牌匾），也想講等欲死ê時chiah來真心懺悔，就的確會得thang入得救ê門；彼款ê人斷斷佇今世來世袂得著赦ê人。法利賽人有患著這款ê罪。
今仔日咱大家啥物款？
暝日有teh驚惶teh儆醒--無？！！！