萬世代

BĀN-SÈ-TĀI

文獻資訊

項目	資料
作者	偕叡廉 Kai Jōe-liâm
卷期	芥菜子
卷期	第 1 號
日期	1925/7
頁數	10-11

白話字（原文數位化）

BĀN-SÈ-TĀI

Tī chit kuí-nî tiong-kan kho-ha̍k ti̍t-ti̍t teh chìn-pō͘. Tiān-teng tiān-pò, tiān-oē, hui-hêng-ki, hé-chhia, chū-tōng-chhia, choè tāi-ke ê lī-piān lóng-sī tī chit kuí-cha̍p-nî ê tiong-kan chiah ū. Taⁿ ū hoat-hêng bô-soàⁿ-tiāⁿ-oē hō͘ lâng sui-jiân saⁿ-lī kuí pah phò͘ iā oē-tit saⁿ-kap kóng-oē. Lâng ê tì-sek si̍t-chāi m̄-sī sió-khoá.

iáu-kú m̄-bián koh loā choē nî chiū beh chiong chiah ê mi̍h, chiah ê tiān-oē, hui-hêng-ki, chū-tōng-chhia hē tī phok-bu̍t-koán, āu-tāi ê lâng beh khoàⁿ chiah ê mi̍h choè bô lō͘-ēng. In beh kî-koài kóng, cháiⁿ-iūⁿ téng-tāi ê lâng chiah bô tì-sek, chè-chō chiah ê bô lō͘-ēng, put-piān ê khì-khū. Só͘-í chit-tia̍p lâng só͘ tuì-tiōng, só͘ ài khoa-kháu ê, āu-tāi ê lâng beh khoàⁿ choè sim-sek.

Chóng-sī sui-jiân koh 500 nî, á-sī koh 1000 nî ū choē-choē hāng boē oē piàn-oāⁿ. āu sè-tāi ê lâng iû-goân ū siⁿ-sí, ū hoân-ló, ū iu-būn, ū pīⁿ-thiàⁿ. In iû-goân beh thiàⁿ in ê kiáⁿ-jî, iû-goân beh chun-tiōng in ê sī-toā. Lâng iā-sī beh tuì-tiōng ha̍k-būn, beh chun-kèng gâu-lâng, beh iàm-chiān bô tō-tek ê lâng. Thiaⁿ-kìⁿ lâng tú-tio̍h ki-hng, bô thang chia̍h, hé-chai, chuí-chai, toā kan-khó͘, āu sè-tāi ê lâng bô m̄ kín-kín hiàn-kim pang-chān in.

Koh 500, 600, á-sī 1000 nî, thiaⁿ-kìⁿ Ki-tok ê miâ, lâng bô m̄ kuī-lo̍h lâi ho̍k-sāi I. Siūⁿ-tio̍h I tī Khek-se-má-nî, Kok-kok-thaⁿ, tī si̍p-jī-kè téng ê chhiⁿ-chhám ba̍k-sái bô m̄ lâu-lo̍h, sim bô m̄ oē sng, chhuì bô m̄ chhut-siaⁿ kóng, Goá ê Kiù-chú, goá ê Kiù-chú, Lí thoè goá siū-khó͘ kàu án-ni!

Koh 1000 nî ū lâng beh choè ê kan-chèng, hoaⁿ-hí uī-tio̍h I ê un lâi thoa-boâ. Koh 1000 nî tī Tâi-oân tī ta̍k hiuⁿ-chng ta̍k koe-chhī, ta̍k ê siâⁿ-chhī, bān-bān ê sìn-tô͘ beh chū-chi̍p tī Chú ê tiān-lāi kèng-uì ho̍k-sāi I.

Lán tī chit sè-kài tit-tio̍h Chú ê un-sù ki-hoē thang hē Thian-kok ê toē-ki tī Tâi-oân, sim tio̍h hoaⁿ-hí kàu-ke̍k, in-uī lán só͘-choè ê tī āu-tāi beh kiat ké-chí choē-choē. Chhin-chhiūⁿ kia̍h teng tī chhiú-nih, lán chiong Chú ê chiò kng, bô phah-sit, ti̍t-chiap kau-tài āu-tāi ê lâng, lâi phó͘-chiò thiⁿ-ē.

Kai Joē-liâm.

漢羅（Ùi原文改寫）

萬世代

佇這幾年中間科學直直teh進步。電燈電報、電話、飛行機、火車、自動車，做大家ê利便攏是佇這幾十年ê中間chiah有。今有發行無線電話予人雖然相離幾百鋪也會得相與講話。人ê智識實在毋是小可。

猶久毋免koh偌濟年就beh將chiah-ê物、chiah-ê電話、飛行機、自動車下佇博物館，後代ê人beh看chiah-ê物做無路用。In beh奇怪講：怎樣頂代ê人chiah無智識，製造chiah-ê無路用、不便ê器具。所以這霎人所對重、所ài誇口ê，後代ê人beh看做心適。

總是雖然koh 500年，á是koh 1000年有濟濟項袂會變換。後世代ê人猶原有生死、有煩惱、有憂悶、有病痛。In猶原beh疼in ê囝兒，猶原beh尊重in ê序大。人也是beh對重學問、beh尊敬人，beh厭賤無道德ê人。聽見人拄著飢荒，無thang食，火災、水災、大艱苦，後世代ê人無毋緊緊獻金幫贊in。

Koh 500、600， á是1000年，聽見基督ê名，人無毋跪落來服事伊。想著伊佇客西馬尼、各各他，佇十字架頂ê悽慘目屎無毋流落，心無毋會酸，喙無毋出聲講：我ê救主，我ê救主，你替我受苦到按呢！

Koh 1000年有人beh做ê干證，歡喜為著伊ê恩來拖磨。Koh 1000年佇台灣佇逐鄉庄逐街市、逐个城市，萬萬ê信徒beh聚集佇主ê殿內敬畏服事伊。

咱佇這世界得著主ê恩賜機會thang下天國ê地基佇台灣，心著歡喜到極，因為咱所做ê佇後代beh結果子濟濟。親像舉燈佇手裡，咱將主ê照光，無拍失，直接交代後代ê人，來普照天下。

偕叡廉