發刊辭

HOAT-KHAN-SÛ

文獻資訊

項目	資料
作者	郭希信 Keh Hi-sìn
卷期	芥菜子
卷期	第 1 號
日期	1925/7
頁數	2

白話字（原文數位化）

HOAT-KHAN-SÛ

Tuì Chú-āu 1872 nî Kai Bo̍k-su kàu Pak-pō͘ Tâi-oân siat-kàu kàu taⁿ, í-keng ū 53 nî kú lah! Lūn kàu-hoē ê chōng-hóng, hiaⁿ1-tī-chí-bē ta̍k-lâng chai, m̄-bián goá siông-sè pâi-lia̍t; put-kò tī chit 53 nî ê le̍k-sú tiong, lán Pak-pō͘ ê kàu- hoē ū keng-kè siat-kàu ê sî-kî, chiàu lán ê chū-kak kap só͘ pē ê la̍t, tī kàu-hoē tiong ê choē-choē hoat-yō͘ ài chhiok-chìn iáu ē kàu-hoē, chóng-sī iáu-bē kàu-gia̍h.

Lūn thoân-kàu ê sū, lán nā khoàⁿ kè-khì ê le̍k-sú, chiū chai kok chong-kàu tī in ê chhòng-sí sî-tāi, lóng sī ēng khó͘-su̍t ê hong-hoat (ēng chhuì thoân); āu-lâi chiū lī-iōng bûn-jī lâi choè in soan kàu ki-koan ê chi̍t-hāng.

Taⁿ lán Pak-pō͘ ê kàu-hoē í-keng ū hiah kú ê le̍k-sú, nā kóng ū sím-mi̍h bûn-jī-chiuⁿ ê khan-hêng-bu̍t lâi choè poê-iúⁿ sin-tek ê lō͘-ēng á-bô? Si̍t-chāi chin chió. Tī choē-choē nî ê tiōng-kan, lán hoē-lāi hiaⁿ-tī chí-bē teh him-bō͘, koh tiong-hoē iā ū kè-e̍k ài ka-kī keng-êng chi̍t-ê kàu-hoē-pò thang ke-thiⁿ lán khok-tiong kàu-hoē ê ki-koan.

Kàu kin-nî ê chhun-kuì Tiong-hoē ū gī-tiāⁿ beh si̍t-hêng chhòng-siat, ū thok kuí-nā uī tam-tng chit ê kang. Taⁿ in ū chīn-la̍t pau-pān hó-sè í-keng beh hoat-hêng chhòng-khan-hō, si̍t-chāi thang kám-siā Siōng-tè.

Só͘ ǹg-bāng chiū-sī Siōng-chú ê ín-chhoā kap hoē-lāi hiaⁿ-tī chí-bē ê chīn-la̍t, hō͘ chit-lia̍p Koà-chhài chí tit-tio̍h bō͘-sēng.

Pak-pō͘ Tiong-hoē Gī-tiúⁿ

Keh Hi-sìn

漢羅（Ùi原文改寫）

發刊辭

對主後1872年偕牧師到北部台灣設教到今，已經有53年久lah!論教會ê狀況，兄弟姊妹逐人知，毋免我詳細排列；不過佇即53年ê歷史中，咱北部ê教會有經過設教ê時期，照咱ê自覺kap所培ê力，佇教會中有濟濟法度ài促進咱ê教會，總是猶袂夠額。

論傳教ê事，咱若看過去ê歷史，就知各宗教佇in ê創始時代，攏是用口述ê方法（用喙傳）；後來就利用文字來做in宣教機關ê一項。

今咱北部ê教會已經有hiah久ê歷史，若講有啥物文字章ê刊行物來做培養新的ê路用á無？實在真少。佇濟濟年ê中間，咱會內兄弟姊妹teh欣慕，koh中會也有計劃ài家己經營一個教會報thang加添咱擴張教會ê機關。

到今年ê春季中會有議定beh實行創設，有託幾若位擔當這个工。今in有盡力包辦好勢已經beh發行創刊號，實在thang感謝上帝。

所ǹg望就是上主ê引chhōa kap會內兄弟姊妹ê盡力，hō͘這粒芥菜子得著茂盛。

北部中會議長

郭希信