拯救（小說）
CHÍN-KIÙ (SIÁU-SOAT)
文獻資訊
| 項目 | 資料 |
|---|---|
| 作者 | 郭頂順 Keh Téng-sūn |
| 卷期 | 芥菜子 |
| 卷期 | 第 1 號 |
| 日期 | 1925/7 |
| 頁數 | 29-36 |
白話字（原文數位化）
CHÍN-KIÙ (SIÁU-SOAT)
Lāu-bú khòaⁿ-tio̍h, chin khó-lîn chiū kóng, “Taⁿ hó lah! Ū phah chiū hó lah!”, beh khì ūi ê sî, lāu-pē siū-khì kóng, “Lí tiām-tiām, kó͘ lâng khì chòe kó͘ lâng ê kang”; “chit ê cha-bó͘ gín-ná bô phah to m̄ thiaⁿ-chhùi”, chiū tùi cha-bó͘ gín-ná kóng, “āu pái káⁿ koh khì bô?”. Nā-sī cha-bó͘ gín-ná bô ìn chiū koh phah, í-keng chin thiám, cha-bó͘ gín-ná ko͘-put-chong kóng, “M̄-káⁿ lah” Lāu-pē chhê á hē teh, chiū chòe i khì chhī-tiûⁿ pān i ê tāi-chì.
Chit ê lāu-pē miâ kiò Tân Chèng-ti̍t, hiān-sî poaⁿ lâi tī chi̍t-ê sio koe-chhī, teh hō͘ chhī-tiûⁿ ê hōe-siā chhiáⁿ, chin gâu thàn-chîⁿ iā chin gâu khai, só͘-í chi̍t ke bô chhun chîⁿ tiāⁿ-tiāⁿ sàn-sàn. I kúi-nā nî chêng sī chi̍t ê hó-gia̍h lâng, tòa tī tōa koe-chhī; chóng-sī in-ūi i ê bōe bóan-chiok, khì bóe tng-sî teh bē lâng ê tu-kǹg iā sit-pāi. Só͘-í taⁿ tio̍h ta̍k-ji̍t lô-khó͘ chiah ū thang chia̍h.
Kap chi̍t ê chin thang khó-chhú ê hū-jîn lâng, miâ Chhòa Pó͘-ge̍k, kiat-hun cha̍p-só͘ nî ko͘-toaⁿ chi̍t ê cha-bó͘ gín-ná miâ kiò Chúi-liân; kin-nî cha̍p-it hè. Tùi chit ê gín-ná ê chhēng-chhah ta̍k-ji̍t chin chhiⁿ-chhioh chin chhù-sū, chóng-sī bô súi, chiū thang chai m̄-sī lāu-bú ê pîn-tōaⁿ, sī lāu-pē ê sàn-chhiah. Chúi-liân chin súi chin tit lâng thiàⁿ koh chin gâu; ha̍k-hāu tha̍k-soah nā tńg lâi, chiū pang-chān i ê lāu-bú sóe saⁿ chí-pn̄g. Só͘-í hō͘ i ê pē-bú chin thiàⁿ i.
Taⁿ, án-chóaⁿ chiah koai ê gín-ná ōe hō͘ i ê lāu-pē phah kàu án-ni? Chiū-sī phah i khì chòe lé-pài.
Ū chi̍t ji̍t tùi ha̍k-hāu tńg lâi tī tâng-phōaⁿ hia thit-thô ê sî, bô iuⁿ-tî tak-tio̍h chio̍h, huih lâu chin chōe, tú-tú hit sî ū chi̍t ê chú-ji̍t o̍h ê sian-siⁿ, miâ kiò Tân Iú-ûi, tùi hia kè khòaⁿ-kìⁿ huih ti̍t-ti̍t-lâu, chiū kín thiah i ê chhiú-kun pau i ê kha, chhōa i kàu ka-kī ê chhù, ēng io̍h kā i kô͘; chiū kap i ê tāng-phōaⁿ chhōa i kàu-chhù. Chúi-liân kā sian-siⁿ seh siā beh ji̍p-khì ê sî, sian-siⁿ kiò i nā hó chiah khì i hia thit-thô͘. Cha-bó͘ gín-ná chiong chit ê tāi-chì kā lāu-bú kóng, lāu-bú thiaⁿ liáu chin o-ló sian-siⁿ, iā siūⁿ beh khòaⁿ i, chóng-sī kàu hō͘-tēng í-keng bô khòaⁿ-kìⁿ lâng.
Lé-pài ji̍t Chúi-liân ê kha hó, khì sian-siⁿ hia thit-thô, sian-siⁿ sūn-sòa chhōa i khì lé-pài-tn̂g khòaⁿ Chú-ji̍t-o̍h. I khòaⁿ-tio̍h chú-ji̍t-o̍h ê ha̍k-seng ta̍k-ê chin o̍ah-tāng, hoaⁿ-hoaⁿ hí-hí, i iā siūⁿ ài ji̍p. Chhut lé-pài tn̂g mn̄g sian-siⁿ khòaⁿ i ōe-tit ji̍p bōe? Sian-siⁿ ún-i; iā kóng chin-chōe Iâ-so͘ lâi-le̍k hō͘ i thiaⁿ, Chúi-liân chin khòai kap Iú-ûi sian-siⁿ se̍k-sāi, in-ūi sian-siⁿ tiāⁿ-tiāⁿ chhiò gī-gī, chin sim-sek, chin chhin-chhat.
Tùi hit tia̍p liáu-āu cha-bó͘ gín-ná ta̍k lé-pài lóng ū khì hù Chú-ji̍t-o̍h. Nā ū êng chiū lâi sian-seⁿ hia o̍h jī-bú: chin khiáu koh chin bián-kióng, só͘-í m̄ chiūⁿ saⁿ-ge̍h ji̍t chiū jī-bú lóng khòaⁿ liáu. Ū chi̍t ji̍t Chúi-liân kàu chin àm iáu teh ho̍k-si̍p jī-bú ê sî, lāu-pē chia̍h chiú tńg lâi, mn̄g i khòaⁿ teh khòaⁿ sím-mi̍h. Chúi-liân chhiò gī-gī, lóng bōe kì-tit lāu-pē ū kìm i tha̍k Iâ-so͘ ê chheh, chiū kóng” Neh, A-pa che lí bat bô?” “He kiám m̄-sī Âng-mn̂g jī? lí tang sî iā hiah gâu ōe tha̍k hit khóan jī!” “m̄-sī leh, lâng che B CH CHH?” “peh-ōe jī ê jī-bú lah, góa téng ji̍t kā lí thó chi̍t sián khì bóe ôe, góa chi̍t tiuⁿ lóng ōe hiáu tha̍k lah neh. Chia mā chi̍t pún Sèng si chin sim-sek leh, góa tha̍k hō͘ lí thiaⁿ heh hit sî teh thīⁿ saⁿ ê lāu-bú iā kiâⁿ óa lâi. Chúi-liân chiū tha̍k,” Siōng-tè chhòng-chō thiⁿ kap tē. Siⁿ chiâⁿ bān-mi̍h ta̍k-hāng ōe. Kong——,, hit sî lāu-pē thiaⁿ-kìⁿ kóng tio̍h, Siōng-tè chiū chai sī Iâ-so͘ kàu ê chheh, chin siū-khì “lí khì to-ūi the̍h chit-khóan chheh, the̍h lâi, góa the̍h lâi khì sio” chiū kā cha-bó͘ kiáⁿ chhiúⁿ jī-bú kap si, siūⁿ beh the̍h khì hiat lo̍h chàu-khang. Chúi-liân ji̍p-khì, kóng. A-pa hit pún sî m̄-sī góa ê, hit pún sian-siⁿ ê? Chóng-sī bô chhái-kang, lāu-pē í-keng hiat lo̍h khì lah.
Chit ê lāu-pē chiū-sī chi̍t khóan ê sèng-chit, chin khòai siū-khì, put-kóan sím-mi̍h tāi-chì, nā siūⁿ án-ni chiū kiâⁿ án-ni. Bô lōa kú tùi thang-á ū thiaⁿ tio̍h lāu-pē teh khùn ê siaⁿ, kohⁿ-kohⁿ-kiò. Chóng-sī tī chàu-khang kháu Chúi-liân kan-ta lâu-ba̍k sái teh khòaⁿ pìⁿ chòe hé-hu ê jī-bú kap si. Lāu-bú an-ùi i chhōa i khì bîn-chhn̂g. Chóng-sī Chúi-liân tó teh lóng bōe khùn-tit. M̄-kú teh siū-khì i ê lāu-pē kā i sio khì, kan-ta hôan-ló m̄-nā tùi sian-siⁿ bōe tit kè, iā siūⁿ kóng tùi Siōng-tè bōe tit kè ê khóan, in-ūi i mn̄g lāu-bú kóng m̄ chai Iâ-so͘ ōe sià-bián i á-bōe? Lāu-bú kóng keh ji̍t tú-tú sī lé-pài ji̍t, chiah beh chhōa i khì sian-sīⁿ in tau hē m̄-tio̍h. Chúi-liân an-sim chiah khùn.
Keh-ji̍t lāu-bú kap cha-bó͘ kiáⁿ kàu sian-siⁿ ê chhù, chiū kóng só͘ tú-tio̍h ê chêng-hêng, iā kóng i chin hôan-ló chím-má bô kàu-gia̍h ê chîⁿ thang pê i, iā mn̄g sian-siⁿ khòaⁿ ōe chhiáⁿ bān kúi-nā-ji̍t ā-bóe. Chit ê tiong-kan Chúi-liân tiām-tiām kan-ta lâu ba̍k-sái. Sian-siⁿ khòaⁿ-tio̍h, the̍h i ê chhiú-kin khí lâi chhit cha-bó͘ gín-ná ê ba̍k-sái, kóng, “Lí án-chóaⁿ teh khàu, m̄-sī lí sio ê, só͘-í m̄-bián kiaⁿ. Chiū kā i ê lāu-bú kóng, “Chéng-tit só, chóe lí an-sim” chiū khì chheh-tû the̍h chi̍t pún pa̍t pún Sèng-si lâi. Hit pún nâ-sī sio khì, chia iáu chi̍t pún the̍h khì ēng. Chit ê tiong-kan Chèng-tit só sim-lāi siūⁿ kóng án-chóaⁿ ōe chiah chhin-chhiat. I ê ba̍k-chiu chhin-chhiūⁿ teh kā i seh siā ê khóan.
Ha̍k-hāu ê hioh-jo̍ah chhun bô kúi-ji̍t ê sî, chit ê tōe-hng iā ū teh phó͘-tō͘. Chèng-ti̍t hiaⁿ ēng chin chōe chîⁿ; chi̍t toh pān kàu chin chheⁿ-chhau. I chiū gia̍h hiuⁿ khì lâi pài hó hiaⁿ-tī-á pó-pì. Bô pài liáu mn̄g khòaⁿ Chúi-liân cháu tái-khì, chiū sì-kòe chhē sì-kòe kiò. Lāu-pē chhē kàu pâng-keng khòaⁿ-kìⁿ Chúi-liân bih tī hia, chiū kā khiú chhut lâi, “góa kiò hiah tōa siaⁿ, lí àn-chóaⁿ tìⁿ bô thiaⁿ-kìⁿ, kūi khah kín khì pài” cha-bó͘ gín-ná chiū cháu-khì mn̂g-kháu, gia̍h hiuⁿ kūi teh, chiū pài kóng, “Thiàⁿ-thàng góan ê Siōng-tè kiû lí lîn-bín góan, hō͘ góan a-bú kap a-pa m̄-thang pài hó hiaⁿ-tī-á, m̄-thang pài sîn-bêng, tio̍h kín lâi pài Siōng-tè. Kiû lí bia̍t-bô ké ê Siōng-tè chiah bōe hō͘ góan a-pa a-bú khì pài i, kiû Lí——góan khò Chú ê miâ lâi kiû sim só͘ gōan” Lāu-pē m̄-chai i sī teh pài Siōng-tè.
Lāu-pē chi̍t lé-pài chiah ū iông-ún Chúi-liân thó chi̍t sián. Chóng-sī chit ji̍t phó͘-tō͘ hoaⁿ-hí gín-ná kūi-teh pài hiah kú, chiū ka-kī the̍h gō͘ sián hō͘ i. Iā ha̍k-hāu beh khui o̍h ê sî, koh tùi lāu-bú tit-tio̍h gō͘-sián; chiah-ê lóng khiām khí-lâi, sui-bóng chi̍t lé-pài chi̍t-sián chi̍t-sián, taⁿ só͘ chek ê í-keng ū kàu thang bóe chi̍t pún kòa-phó͘ ê si. I ê hoaⁿ-hí m̄-sī sió-khóa. Chúi-liân the̍h hit pún kā sian-siⁿ chioh ê, khì hêng, iā sòa kóng àn-chóaⁿ khiām kúi-nā ge̍h ji̍t chiah ū tit-tio̍h chi̍t pún si. Sian-siⁿ thiaⁿ-liáu chin o-ló i, iā chai-iáⁿ Chúi-liân ài chhiùⁿ koa, chiū jia̍t-sim kà i phó͘, o̍h ê lâng kut-la̍t, kà ê lâng jia̍t-sim, só͘-í hit tiong-kan ê chìn-pō͘ sī chin kín.
Ū chi̍t ji̍t sian-siⁿ kiò i tio̍h chio i ê lāu-bú lâi thiaⁿ. Chúi-liân ìn kóng āu lé-pài chiah chio khòaⁿ leh, chiū lī-khui sian-siⁿ. Iáu-bē kàu chhù hn̄g-hn̄g chiū ū khòaⁿ-kìⁿ lāu-bú khiā tī mn̂g-nih teh tán, chiū hoaⁿ-hí kín cháu-khì, I ê lāu-bú tùi khòaⁿ Iú-ûi sian-siⁿ ōe hiah chhin-chhiat, chiū chin chàn-sêng Ki-tok-kàu, iā chin ài khì thiaⁿ tō-lí. Chóng-sī i bô chhin-chhiūⁿ cha-bó͘ kiáⁿ hiah hó-táⁿ, kiaⁿ tiōng-hu cheh-pī. Chúi-liân cháu óa chiū kóng “Sian-siⁿ kiò góa āu lé-pài tio̍h chio lí khì chòe lé-pài; lâi khì neh. A-pa tio̍h kàu beh àm-á chiah ōe tńg-lâi, lán kàu hit-sî-chūn to ōe tńg-lâi lah, só͘-í m̄-bián kiaⁿ” Lāu-bú tú teh siūⁿ ài khì, koh hō͘ Chúi-liân chio tio̍h chiū ín i hó.
Lé-pài-ji̍t ē-po͘. Bo̍k-su Iûⁿ Hôan-phiau tú-tú teh kóng ‘si’ ê bûn-tôe. Chèng-ti̍t só thiaⁿ-liáu chin kám-kek, chin chù-sîn thiaⁿ. Bo̍k-su kóng, “Lán chit sè-kan ê chhâi-phòaⁿ-koaⁿ tūi kūi tī i ê bīn-chêng ê chōe-jîn kóng. ‘Tēng lí sí chōe’ chōe-jîn kha̍p-thâu kiû kóng, ‘chit-pang sià-bián góa, góa āu-pái m̄-káⁿ koh chòe pháiⁿ lah, góa m̄-káⁿ koh hōan-chōe lah! ‘ chhâi-phòaⁿ-koaⁿ kóng, ‘bô, tī-chia bô sià-bián. Góa m̄-sī teh pān chiong-lâi ê sū, góa sī pān lí kàu chit-tia̍p ê só͘-chòe. Lí in-ūi lí ê chōe tio̍h sí’ chhâi-phòaⁿ-koaⁿ lóng bô iông-sià. Ah! hiaⁿ-tī chí-bē ah! Sí āu ê chhâi-phòaⁿ-koaⁿ koh khah giâm lí chai m̄? Lí nā ū chi̍t-sut-á chōe tio̍h tēng sí-chōe lí chai m̄? Taⁿ siáⁿ lâng káⁿ kóng lín bô chōe? Ah! Nā ū chōe ê lâng tio̍h kín lâi hō͘ Iâ-so͘ taⁿ. Iâ-so͘ beh kiù lín, m̄-thang iân-chhiân! “Bo̍k-su chiū thiah Si̍p-jī-kè ê tō-lí, kóng khòaⁿ Iâ-so͘ àn-chóaⁿ thòe lán sí. The̍h hòng-tōng-chú ê phì-jū, kóng khòaⁿ Siōng-tè lōa-nih ài lán chiah ê hòng-tōng chú tńg-khì. Chiū koh chiap-sòa kóng, “Góa bat tī Siōng-hái khòaⁿ-kìⁿ chi̍t-ê lâng, thâu àⁿ-àⁿ, sim-koaⁿ teh siūⁿ chîⁿ, thoa-chhia ti̍t-ti̍t kiâⁿ. Góa khòaⁿ-kìⁿ chi̍t tiuⁿ tiān-chhia teh lâi chin gûi-hiám, cháu-óa ti̍t-ti̍t hoah kóng, ‘Bó͘-lâng gûi-biám tiān-chhia lâi lah! Chóng-sī hit ê lâng chôan-jiân m̄-thiaⁿ, á-sī bô beh thiaⁿ, tiān-chhia kàu, chiū kā i kauh lo̍h-khì. Kiat-kio̍k sí. Lán chit sè-kan chin-chē chhin-chhiūⁿ chit-khóan sim-koaⁿ ǹg sè-kan; kā-kī nā siūⁿ ū lī-ek, chiū bô kóan ēng sím-mi̍h chhiú-tōaⁿ, tún chîⁿ teh hoaⁿ-hí, ū lâng tiong-kò i, i iā bô beh thiaⁿ. Chit-khóan kàu-bé àn-chóaⁿ? Chit-khóan chiū-sī chhin-chhiūⁿ Lô͘-tek ê bó͘ ǹg sè-kan, kàu-bé Siōng-tè hō͘ i sí”
“Taⁿ góa chiū-sī khiā tī si̍p-jī koe-lō͘, chhin-chhiūⁿ ia̍h-hu gia̍h kî-á teh hoah kóng, ‘bó͘-lâng ah! Tùi hit tiâu lō͘ khì bô poh, chhia teh beh kauh sí lí, tio̍h tùi chia chit tiâu khah sòe tiâu ê, in-ūi chit tiâu sòe tiâu ê, bô chhia thang kauh, chin an-chôan, góa án-ni kia̍h kî-á hoah-lâi hoah-khì, nā ū thiaⁿ góa ê ōe ê lâng tit-tio̍h pêng-an; nā bô chiū tiāⁿ-tio̍h sí. Taⁿ lín m̄-chai ū beh thiaⁿ góa teh kóng chit tiâu chin ê o̍ah-lō͘ á-bô?” Bo̍k-su ê ōe-khì kàu-gia̍h ū la̍t thang kám-hòa chit ê hū-jîn-lâng. Bo̍k-su kóng soah Iú-ûi sian-siⁿ sàng i kàu chhù.
Tiōng-hu khòaⁿ-kìⁿ bó͘ ji̍p lâi chiū mn̄g khòaⁿ hit ê lâi kàu mn̂g-nih hit ê, sī sím-mi̍h lâng. Bó͘ ìn kóng, hit ê sī Chúi-liân ê sian-siⁿ iā chin chhin-chhiat, chím-má sàng i tńg lâi. “Lí sî khì toh-ūi?” “khì thiaⁿ tō-lí” “Sím-mi̍h lâng ún-chún lí khì thiaⁿ hit khóah hoan-ná tō-lí?” I ê iau hō͘ i koh khah ok, kan-ta kóng, “Āu-pái chiah koh khì khòaⁿ leh, khah-kín chhòng chi̍t-ê lâi chia̍h, pak-tó͘ iau ka̍h. Chhù-nih ê tāi-chì m̄-chòe lōan-lōan kap ta-po͘ kiâⁿ” Chit ê tiong-kan Chúi-liân kiaⁿ i iû-gôan ōe hō͘ lāu-pē mā, chiū kín khì chàu-kha kōaⁿ tê chhut-lâi, “A-pa lim tê”
Nn̄g ge̍h ji̍t ê tiong-kan Pó-ge̍k ché-á ta̍k lé-pài to ū khì lé-pài, khah chá tńg lâi, m̄-bat hō͘ tiōng-hu hoat-kiàn tio̍h. Chóng-sī ū chi̍t ji̍t tiōng-hu, lâng m̄ tú-hó, hut-jiân-kan tńg lâi kàu chhù khòaⁿ-kìⁿ in bó͘ bô tī teh, chiū giâu-gî i khì chòe lé-pài.
Chiū siū-khì, sûi-sî khì lé-pài tn̂g, kàu hia khòaⁿ-kìⁿ bô lâng tī-teh, chiū koh cháu tńg-lâi, kàu chhù iū koh khòaⁿ bó͘ bô tī-teh, sim-koaⁿ pho̍k-pho̍k chhêng, thâu-khak chòe chi̍t ē hîn khí-lâi, siū-khì chha-put-to tòng bōe tiâu. Iu-ūi i siūⁿ kóng káⁿ-sī tī hit-khian sian-siⁿ in tau, i chiū koh chhut khì. Sian-siⁿ khòaⁿ-kìⁿ i lâi chiū hó lé, “Ah. Chèng-ti̍t hiaⁿ lâi chē, góa tī-teh khui-thiah chit pún Sèng-chheh hō͘ Chèng-ti̍t só thiaⁿ.” Chèng-ti̍t hiaⁿ siū-khì kóng, “Lín ê Sèng-chheh kiám ū kóng ōe tit lōan-lōan kap lâng ê bó͘ chē teh kóng ōe?” Bô beh hō͘ sian-siⁿ piān-kái, tùi i ê bó͘ kóng, “Tńg lâi khì.” Iú-ûi sian-siⁿ siūⁿ kóng nā bô lâi khì kóng hō͘ i liáu-kái, m̄-chai beh án-chóaⁿ khóan-thāi in bó͘, chiū tè āu-bīn khì.
Kàu chhù tiōng-hu tú teh chek-pī “Lí siáⁿ-sū koh khì, góa kiám bô kiò lí m̄-thang khì,” ê sî, Iú-ûi sian-siⁿ ji̍p-lâi. Chèng-ti̍t hiaⁿ khòaⁿ tio̍h sian-siⁿ ji̍p-lâi, chiū chhiáⁿ thun-lún, siūⁿ kóng beh chù-ì, khòaⁿ i ê bó͘ ōe án-chóaⁿ khóan-thāi i. Sian-siⁿ chē-teh chiū kóng, “Chèng-ti̍t hiaⁿ lí káⁿ chin siū-khì, sī in-ūi lí bô bêng-pe̍k. Ki-tok-kàu sī chin ê chong-kàu, góa chiah chhōa lín lâi ji̍p; Siōng-tè sī chin ê góa chiah ài chhōa lín lâi pài I.” Hit sî Chèng-ti̍t kóng, “Hit khóan hoan-á kàu sī hoan-ná lâi Tâi-ôan beh phiàn lâng--ê, lí ōe hō͘ phiàn-tit nā-sī góa bōe hō͘ phiàn-tit”
“Ah, Chèng-ti̍t hiaⁿ, hit khóan sī m̄-bat jī ê lâng teh kóng ê ōe, ū kúi-nā hāng m̄-tio̍h lí chai bô? Lán teh kóng hoan-ná sī hiān-chāi seng-o̍ah thêng-tō͘ iáu chin kē, bô bûn-bêng, siōng chió mā tio̍h pí lán khah bô hoat-ta̍t ê chiah ōe kiò tit. Taⁿ lán Tâi-ôan lâng hō͘ lâng kiò-chòe thó͘-jîn to beh siū-khì, thài-thó ōe ēng-tit tùi pí lán khah bûn-hòa ê Se-iûⁿ lâng kiò chòe hoan-ná. Lí koh chi̍t hāng m̄-tio̍h, sī siūⁿ kóng Iâ-so͘ kàu su Au-lô-pa chiu ê; chóng-sī m̄-thang bōe kì-tit Iâ-so͘ sī tùi A-se-a chiu chhut-sì--ê. Sī tùi A-se-a thôan kè-khì kàu Au-lô-pa, iā in siūⁿ kóng iàu-kín tio̍h thôan hō͘ tang-iûⁿ, iā in chi̍t pō͘ hūn chiah lâi Tâi-ôan. Só͘-í in sī beh lâ kiù lán m̄-sī beh phiàn lán.” “m̄-kú lán ū ông-iâ, má-chó͘, sîn-bêng. Khóng-chú chiah chē sîn, to pài bōe liáu koh khì pài kàu Siōng-tè!”
“Hó pêng-iú, chin ê sîn kám ū hiah chōe ê nā-sī chin ê chi̍t ê chiū kàu-gia̍h. Chhin-chhiūⁿ ji̍t-thâu, chin ê, chi̍t ê chiū kàu-gia̍h, nā kúi nā ê chiū tòng bōe tiâu; nā-sī ké ê chhin-chhiūⁿ sòe lia̍p chhiⁿ chiū chin chē mā bô kàu kng. Koh chi̍t hāng, Chèng-ti̍t hiaⁿ chhiáⁿ lí siūⁿ khòaⁿ sī sîn chòe lâng chiah eng-kai, á-sī lâng chòe sîn khah eng-kai, lí só͘ kóng hiah ê sîn, lán kám ū siū in chò? Bô, hiah ê sī lâng ká-chō ê. Lán chō ê sîn bô kè-ta̍t thang pài. Gâu lâng, lán tio̍h ēng chun-kèng m̄-thang ēng pài ê.” Chit ê tiong-kan Chèng-ti̍t hiaⁿ ià-siān, siūⁿ hoat-tō͘ beh siám-pī chit ê sian-siⁿ chiū kóng, “Góa iá ū tāi-chì tī chhī-tiûⁿ tio̍h lâi khì pān.” tùi in bó͘ kóng, lí iā tio̍h khì chhòng chia̍h. Chiū chhut khì kiâⁿ-kiâⁿ leh, bô lōa kú ji̍p lâi siūⁿ sian-siⁿ tek-khak tńg khì, chóng-sī kàu thiaⁿ-nih khòaⁿ bó͘ kap cha-bó͘-kiáⁿ chin chù-sîn teh thiaⁿ sian-siⁿ kóng ōe, chin siū-khì mn̄g kóng, pn̄g chí se̍k bē, toh teh thiaⁿ sian-siⁿ kóng tō-lí kó͘ lâng ū tāi-chì tio̍h kín khì chhòng. Chúi-liân thô͘-kha sàu-sàu leh Iú-ûi sian-siⁿ khòaⁿ-kìⁿ Chèng-ti̍t hiaⁿ bô sím-mi̍h hoan-gêng ê khóan, chiū kóng, taⁿ òaⁿ lah, góa tio̍h hó tńg khì. Chèng-ti̍t hiaⁿ chin bōe an, i ê bó͘ tiāⁿ-tiāⁿ kap sian-siⁿ chòe-hóe, chiū kiò i ê bó͘ lâi lí án-chóaⁿ ōe chiah hó khóan-thāi hit ê Iâ-so͘ kàu ê sian-siⁿ kàu án-ni? Ìn kóng, góa teh khóan-thāi I, m̄-ta̍t tio̍h i teh khóan-thāi góa, i chiâⁿ chhin-chhiat. Tiōng-hu thiaⁿ-tio̍h chit kù koh-khah bōe an. Chhin-chhiūⁿ kin-ná ji̍t, niá sóe-lé mā sī hō͘ chit ê chin khòan-kò͘ góa chin-chōe hāng ê tāi-chì. Sím-mi̍h hō chòe niá sóe-lé? Chiū-sī ji̍p Iâ-so͘ kàu ê chèng-kù lah. Tiōng-hu chhiⁿ-kông mn̄g kóng, lí án-chóaⁿ chiah hó-táⁿ? Ū chó͘-kong thang pài, siáⁿ-sū chiah put-hàu! Ēng bô un-sûn ê ōe kóng, lí beh kóng bô hàu; m̄-koh lí nā phēng-khòaⁿ, chiū chai-iáⁿ Iâ-so͘ kàu ê lâng pí lán pài pu̍t ê lâng khah iú-hàu. Tiōng-hu chòe-chit ē siū-khì, bián kóng! Sóe-lé khì thó tńg-lâi, khì chhú-siau hit ê chèng-kù, nā bô ē-hng tio̍h kā góa chhut-khì! Tiōng-hu ê ōe-khì chin hiông koh ū ui-giâm, bó͘ thiaⁿ-tio̍h chit kù bô ōe thang ìn, sim-koaⁿ ná-chún beh piak-li̍h, chin kan-khó͘, ba̍k-sái lâu-chhut, Hit ē-hng bô chia̍h, phak tī bîn-chhn̂g kiû Siōng-tè tio̍h chí-sī i tio̍h kiâⁿ ê lō͘. Teh kî-tó ê tiong-kan siūⁿ tio̍h Iú-ûi sian-siⁿ bat kóng, Lín nā beh chiū-kūn góa tio̍h pàng-sak pē-bú, bó͘-kiáⁿ, hiaⁿ-tī; chiah sī góa ê ha̍k-seng.” (Lō͘-ka 14:26.)
“Ah, ū iáⁿ góa nā beh chòe Chú ê ha̍k-seng, tio̍h thiaⁿ Iâ-so͘ ê ōe khah iâⁿ tī tiōng-hu. Góa pàng-sak tiōng-hu lâi tòe Chú.” Koat-ì-liáu sim-koaⁿ hoaⁿ-hí beh khí-lâi ê sî, khòaⁿ-kìⁿ Chúi-liân iā kūi tī i ê sin-piⁿ teh kî-tó. Lāu-bú ê sim-koaⁿ koh cha̍t khí-lâi.
Ah! Chit ê kiáⁿ bô pàng-sak kiám bōe ēng tit, ah, góa bōe jím-tit! góa thiàⁿ chit-ê kiáⁿ iâⁿ kè góa ê sìⁿ-miā, góa chi̍t-sî to bōe lī-tit. Ah! Nā ē-tit bián góa lī chit ê kiáⁿ!” Hit-sî ná-chún tī hī-khang-piⁿ ū siaⁿ “kóng, Bōe, bōe ēng-tit, lí tio̍h pàng-sak lí só͘ thiàⁿ ê kiáⁿ lâi tè góa.” Lāu-bú sim-koaⁿ cha̍t, ba̍k-sái tih-lo̍h tī gín-ná ê thâu-mn̂g, “A-liân-á góa tio̍h tńg lâi khì A-kong hia, lí kap góa lâi khì kàu chhia-thâu hó-m̄?” “Hó lah! A-bú lí m̄-thang hôan-ló, Iâ-so͘ kap lí saⁿ-kap tī-teh. Bú-kiáⁿ teh-beh chhut mn̂g ê-sî, lāu-pē in-ūi i iā chin thiàⁿ chit ê gín-ná, chiū kóng, “A-liân ah lí tio̍h tòa chia” ìn kóng, “Lâng góa-beh sàng a-bú kàu chhia-thâu.”
Mî í-keng àm, lō͘-chām hn̄g, nn̄g-ê kàu chhia-thâu bô-kú àm-chhia liâm-piⁿ kàu. Lāu-bú peh chiūⁿ chhia, gín-ná khiā tī chhia-piⁿ nn̄g-ê sio-siòng ê sî ba̍k-sái chiū-lâu, ài kóng ê ōe kóng bōe-tit chhut-lâi. Sî-kan kàu, chúi-lê tu-tu kiò. Ah! Chin khó-lîn! Lāu-bú thiaⁿ tio̍h chit ê siaⁿ, sim-koaⁿ ná teh hō͘ chńg-á ui, tòa jú-kú jú kan-khó͘. Ba̍k-sái tè hit ê siaⁿ ti̍t-ti̍t lâu-chhut. Lāu-bú siūⁿ kóng chiah àm, hong, hō͘ chiah thàu, beh hō͘ cha-bó͘-kiáⁿ ka-kī chi̍t ê tńg-khì, m̄-kam, kiò i sòa khí-lâi kap i chòe tīn khì. Chóng-sī cha-bó͘ giá-ná chhit ba̍k-sái kóng, góa tio̍h chhōa a-pa khì thiaⁿ tō lí. Góa m̄-thang kap lí khì; góa mā-bô bóe chhia-toaⁿ. Chhia tín-tāng nn̄g-pêng ba̍k-sái ná lâu. Chóng-sī tī bô lōa hn̄g ê sî, Chúi-liân hut-jiân tōa-siaⁿ hoah kóng, A-bú ah, m̄-bián hôan-ló, góa chiah lâi-khì chhōa lí tńg-lâi Lāu-bú thiaⁿ-tio̍h sòa-bé chit kù, sim-koaⁿ kàu-ke̍k siū an-ùi Ǹg-bāng ū iáⁿ ōe khì chhōa i (Iáu-bōe liáu, āu-hō beh koh sòa-chiap)
Keh Téng-sūn
漢羅（Ùi原文改寫）
拯救（小說）
老母看著，真可憐就講：「Taⁿ好lah！有拍就好lah！」，beh去為ê時，老父受氣講：「你恬恬，各人去做各人ê工」；「這个查某囡仔無拍to毋聽 喙」，就對查某囡仔講：「後擺敢koh去無？」。若是查某囡仔無應就koh拍，已經真thiám，查某囡仔孤不衷講：「毋敢lah」老父箠á下teh，就 做伊去市場辦伊ê代誌。
這个老父名叫陳正直，現時搬來佇一個小街市，teh予市場ê會社倩，真gâu趁錢也真gâu開，所以一家無賰錢定定散散。伊幾若年前是一个好額人，tòa佇大街市；總是因為伊ê袂滿足，去買當時teh賣人ê株券也失敗。所以taⁿ著逐日勞苦chiah有thang食。
Kap一个真thang可取ê婦人人，名蔡寶玉，結婚十所年孤單一个查某囡仔名叫水蓮；今年十一歲。對這个囡仔ê穿插逐日真鮮chhioh真次序，總是無 媠，就thang知毋是老母ê貧憚，是老父ê散赤。水蓮真媠真得人疼koh真gâu；學校讀soah若轉來，就幫贊伊ê老母洗衫煮飯。所以予伊ê父母真疼 伊。
Taⁿ，按怎chiah乖ê囡仔會予伊ê老父拍到按呢？就是拍伊去做禮拜。
有一日對學校轉來佇同伴hia thit-thô ê時，無張持觸著石，血流真濟，拄拄彼時有一個主日學ê先生，名叫陳有為，對遐過看見血直直流，就緊拆伊ê手巾包伊ê跤，chhōa伊到家己ê厝，用藥 kā伊糊；就kap伊ê同伴chhōa伊到厝。水蓮kā先生說謝beh入去ê時，先生叫伊若好chiah去伊遐thit-thô。查某囡仔將這个代誌kā 老母講：老母聽了真呵咾先生，也想beh看伊，總是到戶碇已經無看見人。
禮拜日水蓮ê跤好，去先生遐thit-thô，先生順續chhōa伊去禮拜堂看主日學。伊看著主日學ê學生逐ê真活動，歡歡喜喜，伊也想ài入。出禮拜長 問先生看伊會得入袂？先生允伊；也講真濟耶穌來歷予伊聽，水蓮真快kap有為先生熟似，因為先生定定笑gī-gī，真心適、真親切。
對彼霎了後查某囡仔逐禮拜攏有去赴主日學。若有閒就來先生遐學字母：真巧koh真勉強，所以毋上三月日就字母攏看了。有一日水蓮到真暗猶the復習字母ê 時，老父食酒轉來，問伊看teh看啥物。水蓮笑gī-gī，攏袂記得老父有禁伊讀耶穌ê冊，就講「Neh，阿爸這你捌無？」「He kiám毋是紅毛字？你tang時也遐gâu會讀彼款字！」「毋是leh，人這B CH CHH？」「白話字ê字母lah，我頂日kā你討一錢去買ôe，我一張攏會曉讀lah neh。遮嘛一本聖詩真心leh，我讀你聽heh」彼時teh紩衫ê老母也行倚來。水蓮就讀，「上帝創造天kap地。生成萬物逐項會。Kong—-- -，彼時老父聽見講著，上帝就知是耶穌到ê冊，真受氣「你去叼位提這款冊，提來，我提來去燒」就kā查某囝搶字母kap詩，想beh提去hiat落灶孔。 水蓮入去，講。阿爸hit本時毋是我ê，彼本先生ê？總是無采工，老父已經hiat落去lah。
這个老父就是一款ê性質，真快受氣，不管啥物代誌，若想按呢就行按呢。無偌久對窗á有聽著老父teh睏ê聲，kohⁿ-kohⁿ-叫。總是佇灶空口水蓮干 但流目屎teh看變做火灰ê字母kap詩。老母安慰伊chhōa伊去眠床。總是水蓮倒teh攏袂睏得。毋過teh受氣伊ê老父kā伊燒去，干但煩惱毋若對 先生袂得過，也想講對上帝袂得過ê款，因為伊問老母講毋知耶穌會赦免伊á袂？老母講隔日拄拄是禮拜日，chiah beh chhōa伊去先生in兜會毋著。水蓮安心chiah睏。
隔日老母kap查某囝到先生ê厝，就講所拄著ê情形，也講伊真煩惱chím-má無夠額ê錢thang賠伊，也問先生看會且慢幾若日ā袂。這个中間水蓮恬 恬干但流目屎。先生看著，提伊ê手巾起來拭查某囡仔ê目屎，講：「你按怎teh哭，毋是你燒ê，所以毋免驚。就kā伊ê老母講：「正直嫂，作你安心」就去 冊櫥提一本別本聖詩來。彼本若是燒去，遮猶一本提去用。這个中間正直嫂心內想講按怎會chiah親切。伊ê目睭親像teh kā伊說謝ê款。
學校ê歇熱賰無幾日ê時，這个地方也有the普渡。正直兄用真濟錢；一桌辦到真生臊。伊就夯香去來拜好兄弟á保庇。無拜了問看水蓮走tái去，就四界找四 界叫。老父找到房間看見水蓮bih佇遐，就kā khiú出來，「我叫hiah大聲，你按怎tìⁿ無聽見，kūi khah緊去拜」查某囡仔就走去門口，夯香跪teh，就拜講：「疼痛阮ê上帝求你憐憫阮，予阮阿母kap阿爸毋thang拜好兄弟仔，毋thang拜神 明，著緊來拜上帝。求你滅無假ê上帝chiah袂予阮阿爸阿母去拜伊，求你——阮靠主ê名來求心所願」老父毋知伊是teh拜上帝。
老父一禮拜chiah有容允水蓮討一錢。總是這日普渡歡喜囡仔跪teh拜遐久，就家己提五錢予伊。也學校beh開學ê時，koh對老母得著五錢； chiah-ê攏儉起來，雖bóng一禮拜一錢一錢，taⁿ所積ê已經有夠thang買一本掛譜ê詩。伊ê歡喜毋是小可。水蓮提彼本kā先生借ê，去還， 也續講按怎儉幾若月日chiah有得著一本詩。先生聽了真呵咾伊，也知影水蓮愛唱歌，就熱心教伊譜，學ê人骨力，教ê人熱心，所以彼中間ê進步是真緊。
有一日先生叫伊著招伊ê老母來聽。水蓮應講後禮拜chiah招看leh，就離開先生。猶未到厝遠遠就有看見老母徛佇門裡teh等，就歡喜緊走去，伊ê老母 對看有為先生會hiah親切，就真贊成基督教，也真ài去聽道理。總是伊無親像查某囝遐好膽，驚丈夫責備。水蓮走倚就講「先生叫我後禮拜著招你去做禮拜； 來去neh。阿爸著到欲暗á chiah會轉來，咱到彼時陣to會轉來lah，所以毋免驚」老母拄teh想ài去，koh予水蓮招著就允伊好。
禮拜日下晡牧師楊凡標拄拄teh講‘死 ê問題。正直嫂聽了真感激，真注神聽。牧師講：「咱這世間ê裁判官對跪佇伊ê面前ê罪人講。「定你死罪」罪人瞌頭求講：「這班赦免我，我後擺毋敢koh做 歹lah，我毋敢koh犯罪lah！」裁判官講：「無，佇chia無赦免。我毋是teh辦將來ê事，我是辦你到這霎ê所作。你因為你ê罪著死」 裁判官koh khah嚴你知毋？你若有一屑仔罪著定死罪你知毋？Taⁿ啥人敢講恁無罪？Ah！兄弟姊妹ah！死後ê裁判官koh khah嚴你知毋？你若有一屑仔罪著定死罪你知毋？Taⁿ啥人敢講恁無罪？Ah！若有罪ê人著緊來予耶穌擔。耶穌beh救恁，毋thang延遷！「牧師就 拆十字架ê道理，講看耶穌按怎替咱死。提放蕩子ê譬喻，講看上帝偌呢ài咱chiah-ê放蕩子轉去。就koh接續講：「我捌佇上海看見一個人，頭àⁿ- àⁿ，心肝teh想錢，拖車直直行。我看見一張電車teh來真危險，走倚直直hoah講：「某人危險電車來lah！總是彼个人全然毋聽，á是無欲聽，電車 到，就kā伊kauh落去。結局死。咱這世間真濟親像這款心肝ǹg世間；家己若想有利益，就無管用啥物手段，囤錢teh歡喜，有人忠告伊，伊也無欲聽。這 款到尾按怎？這款就是親像蘆竹ê某ǹg世間，到尾上帝予伊死」
「Taⁿ我就是徛佇十字街路，親像驛夫夯旗仔teh喝講：「某人ah！對彼條路去無埠，車teh欲kauh死你，著對遮這條khah細條ê，因為這條細條 ê，無車thang kauh，真安全，我按呢舉旗仔喝來喝去，若有聽我ê話ê人得著平安；若無就定著死。Taⁿ恁毋知有欲聽我teh講這條真ê活路á無？」牧師ê話氣夠額有 力thang感化這个婦人人。牧師講soah有為先生送伊到厝。
丈夫看見某入來就問看彼个來到門裡彼个，是啥物人。某應講，彼个是水蓮ê先生也真親切，chím-má送伊轉來。「你是去叼位？」「去聽道理」「啥物人允 准你去聽彼款番仔道理？」伊ê餓予伊koh khah惡，干但講：「後擺chiah koh去看leh，khah緊創一個來食，腹肚餓。厝裡ê代誌毋做亂亂kap查甫行」這个中間水蓮連驚伊猶原會予老父罵，就緊去灶跤捾茶出來，「阿爸啉 茶」。
兩月日ê中間寶玉姐仔逐禮拜to有去禮拜，khah早轉來，毋捌予丈夫發見著。總是有一日丈夫，人毋拄好，忽然間轉來到厝看見in某無佇teh，就僥疑伊去做禮拜。
就受氣，隨時去禮拜堂，到遐看見無人佇teh，就koh走轉來，到厝又koh看某無佇teh，心肝pho̍k-pho̍k chhéng，頭殼做一下眩起來，受氣差不多擋袂稠。因為伊想講敢是佇彼khian先生in兜，伊就koh出去。先生看見伊來就好禮，「Ah。正直兄來 坐，我佇teh開拆這本聖冊予正直嫂聽。」正直兄受氣講：「恁ê聖冊kiám有講話得亂亂kap人ê某坐teh講話？」無欲予先生辯解，對伊ê某講：「轉 來去。」有為先生想講若無來去講予伊了解，毋知欲按怎款待in某，就tè後面去。
到厝丈夫拄teh責備「你啥事koh去，我kiám無叫你毋thang去，」ê時，有為先生入來。正直兄看著先生入來，就請吞忍，想講beh注意，看伊ê 某會按怎款待伊。先生坐teh就講：「正直兄你敢真受氣，是因為你無明白。基督教是真ê宗教，我chiah chhōa恁來入；上帝是真ê我chiah ài chhōa恁來拜伊。」彼時正直講：「彼款番仔教是番仔來台灣欲騙人--ê，你會予騙得若是我袂予騙得」
「Ah，正直兄，彼款是毋捌字ê人teh講ê話，有幾若項毋著你知無？咱teh講番仔是現在生活程度猶真低，無文明，上少嘛著比咱khah無發達ê chiah會叫得。Taⁿ咱台灣人予人叫做土人欲受氣，汰討會用得對比咱khah文化ê西洋人叫做番仔。你koh一項毋著，是想講耶穌教輸歐羅巴洲ê；總 是毋thang 袂記得耶穌是對亞西亞洲出世--ê。是對亞西亞傳過去到歐羅巴，也in想講要緊著傳予東洋，也in一部份chiah來台灣。所以in是beh來救咱毋是 beh騙咱。」「毋過咱有王爺、媽祖、神明。孔子chiah濟神，to拜袂了koh去拜到上帝！」
「好朋友，真ê神敢有遐濟ê若是真ê一个就到額。親像日頭，真ê，一个就到額，若幾若ê就擋袂稠；若是假ê親像細粒星就真濟嘛無夠光。Koh一項，正直兄 請你想看是神做人chiah應該，á是人做神khah應該，你所講遐个神，咱敢有受in作？無，遐个是人假造ê。咱造ê神無價值thang拜。Gâu人， 咱著用尊敬毋thang用拜ê。」這个中間正直兄厭倦，想法度beh閃避這个先生就講：「我iá有代誌佇市場著來去辦。」對in某講：你也著去創食。就出 去行行leh，無偌久入來想先生的確轉去，總是到聽nih看某kap查某囝真注神teh聽先生講話，真受氣問講：飯煮熟未，toh teh聽先生講道理各人有代誌著緊去創。水蓮土腳掃掃leh
有為先生看見正直兄無啥物歡迎ê款，就講：taⁿ晚lah，我著好轉去。正直兄真袂安，伊ê某定定kap先生做伙，就叫伊ê某來 你按怎會chiah好款 待彼个耶穌到ê先生到按呢？應講，我teh款待伊，毋值著伊teh款待我，伊成親切。丈夫聽著這句koh-khah袂安。親像今仔日，領洗禮嘛是予這个真 眷顧我真濟項ê代誌。啥物號做領洗禮？就是入耶穌到ê證據lah。丈夫生狂問講：你按怎chiah好膽？有祖公thang拜，啥事chiah不孝！用無溫 純ê話講：你beh講無孝；毋koh你若評phēng看，就知影耶穌到ê人比咱拜佛ê人khah有孝。丈夫做這下受氣，免講！洗禮去討轉來，去取消彼个證 據，若無下昏kā我出去！丈夫ê話去真狠koh有威嚴，某聽著這句無話thang應，心肝ná準beh爆裂，真艱苦，目屎流出，彼下昏無食，仆佇眠床求上 帝著指示伊著行ê路。Teh祈禱ê中間想著有為先生捌講：恁若beh就近我著放sak父母、某囝、兄弟；chiah是我ê學生。」（路加14:26.）
「Ah，有影我若beh做主ê學生，著聽耶穌ê話khah贏佇丈夫。我放sak丈夫來tòe主。」決意了心肝歡喜beh起來ê時，看見水蓮也歸佇伊ê身邊teh祈禱。老母ê心肝koh cha̍t起來。
Ah！這个囝無放sak kiám袂用得，ah，我袂忍得！我疼這個囝贏過我ê性命，我一時to袂離得。Ah！若會得免我離這个囝！」彼時ná準佇耳孔邊有聲「講：袂，袂用得，你 著放sak你所疼ê囝來tè我。」老母心肝cha̍t，目屎滴落佇囡仔ê頭毛，「阿蓮á我著轉來去阿公遐，你kap我來去到車頭好毋？」「好lah！阿母 你毋thang煩惱，耶穌kap你相kap佇teh。母囝the beh出門ê-時，老父因為伊也真疼這个囡仔，就講：「阿蓮ah你著tòa遮」應講，「人我beh送阿母到車頭。」
暝已經暗，路站遠，兩個到車頭無久暗車連鞭到。老母爬上車，囡仔徛佇車邊兩個相siòng ê時目屎就就，ài講ê話講袂得出來。時間到，水螺tu-tu叫。Ah！真可憐！老母聽著這个聲，心肝ná teh予鑽仔ui， tòa愈久愈艱苦。目屎tè彼个聲直直流出。老母想講chiah暗，風、雨chiah透，beh予查某囝家己一个轉去，毋甘，叫伊續起來kap伊做陣去。 總是查某囡仔拭目屎講：我著chhōa阿爸去聽道理。我毋thang kap你去；我嘛無買車單。車振動兩爿目屎ná流。總是佇無偌遠ê時，水蓮忽然大聲hoah講：阿母ah，毋免煩惱，我chiah來去chhōa你轉來
老母聽著續尾這句，心肝到極受安慰 Ǹg望有影會去chhōa伊（猶未了，後號beh koh續接）