囡仔KAP天使

GÍN-NÁ KAP THIN-SÀI

文獻資訊

項目	資料
作者	陳清忠 Tân Chheng-tiong
卷期	芥菜子
卷期	第 1 號
日期	1925/7
頁數	22-25

白話字（原文數位化）

GÍN-NÁ KAP THIⁿ-SÀI

Chá-Khí, ē-hng, tiong-tàu, àm-sî;

Si Khek-lâi gîm kóng, “o-ló Siōng-tè.”

Āu-lâi o̍at-thâu koh chòe i ê kang,

Lâi thàn ji̍t-ji̍t ê bí-niû.

I chòe chin thiám kú koh gâu,

Thâu-mn̂g sûi lo̍h kōaⁿ móa bīn.

Siông-siông tī chòe kang ê tiong-kan,

Thêng-khùn, gîm kóng, “O-ló Siōng-tè.”

Jiân-āu pho̍ah i ê thâu-mn̂g tī āu-bīn,

Hoaⁿ-hí koh-chài khí kang.

Bo̍k-su kóng, “Án-ni chin tio̍h,

bô giâu-gî Siōng-tè ū thiaⁿ tio̍h lah!

Kin-ná-ji̍t lí só͘ o-ló ê siaⁿ,

Bô khah su Siōng-tè ê tōa lô͘-po̍k.

I tī chit-ê Kiù-chú koh-o̍ah ê ji̍t,

Tiàm tī tiān-tn̂g o-ló Siōng-tè.”

Si Khek-lâi kóng, “Gōan Siōng-tè hō͘ góa

Ēng hit ê hong-hoat lāi o-ló I, iā sí!”

Mî kè, ji̍t pha̍k,

Si Khek-lâi bô tī-teh!

Siōng-tè só͘ khòaⁿ ê chi̍t ji̍t keng-kè,

Chi̍t-chheng-nî chiū-sī chi̍t ji̍t.

Siōng-tè tī thiⁿ-nih kóng, “Góa só͘ hoaⁿ-hí

Ê siaⁿ bô thang koh thiaⁿ-kìⁿ lah!”

Āu-lâi Thiⁿ-sài Ka-pek-lia̍t thí-si̍t

Pe-lo̍h tōe-bīn-chiūⁿ;

Ji̍p bah-sin chiâⁿ-chòe lâng,

Tiàm tī Si Khek-lâi, ê chhù, iā chòe i ê kang.

Chá-khí, ē-hng, tiong-tàu, àm-sî;

Thòe Si Khek-lâi o-ló Siōng-tè.

Tùi gín-ná chiām-chiām sêng-tióng

Kàu chiâⁿ tōa lâng;

Tùi lāu kàu

Lîm-chiong.

Bô ià-siān tī i ê kang,

Tiàm tōe-bīn bô put-pêng.

I thàn Siōng-tè ê chí-ì;

Bô lūn tī thiⁿ, tī tōe lóng saⁿ-tâng.

Siōng-tè kóng, “O-ló ê siaⁿ ji̍p góa ê hī-khang lah!

Bô giâu-gî, m̄-bián kiaⁿ.

Bô lūn tùi sin ê sè-kài, kū ê Sè-kài;

Á-sī tùi góa kha-ta̍h.

Chóng-sī Góa ū si̍t-lo̍h

Sòe-hàn gín-ná o-ló hó-thiaⁿ ê siaⁿ”

Āu-lâi thiⁿ-sài thián-si̍t pe-chhut,

Jio̍k-sin pàng hē-teh.

Tī koh-o̍ah ê ji̍t,

Pe kàu tiān-tn̂g, hioh tī téng-bīn.

Sin ê bo̍k-su Si Khek-lâi,

Chhēng i lé-ho̍k;

Khiā tī tōa thong-hāng,

Óa tī i ê pâng-keng.

Só͘ ū kè-liáu ê lí-le̍k,

Koh-chài bêng-bêng tò-tńg,

Tùi i chòe gín-ná khûn-khûn chòe kang;

Kàu i phòa-pīⁿ chin siong-tiōng;

Lêng-hûn beh lī-khui seng-khu ê sî,

Thiⁿ-sài lâi an-ùi;

Tùi phòa-piⁿ khí-lâi;

Chiâⁿ-chòe bo̍k-su, iā khiā tī chia.

Bīn o̍at tang-pêng beh o-ló ê sî,

Hut-jiân Thiⁿ-sài chhut-hiān.

“Tùi lí ê kang-tiûⁿ chhōa lí lâi chia.

Góa ū m̄-tio̍h.

“Góa lī-khui thian-kài sī khang-khang,

Lí chōe-chōe nî só͘ teh ǹg-bāng ê iā bû-ek.

Lí o-ló ê siaⁿ chin bô la̍t, siaⁿ-chhut

Thiⁿ-tōe Bān-iú ha̍p-chhiòng chiū soah.

“Tò-tńg khì, iā chiàu chá-chêng ê khóan

Lâi o-ló, Góa chiàu góa ê.

Ēng só͘ khòaⁿ-khin bô la̍t ê siàⁿ,

Kiò-chhíⁿ thêng-siaⁿ ê peh-sìⁿ.

Tò-tńg khì lí ê chhù, kap lí ê kang.

Tùi gín-ná koh-chài phah khí.

Si Khek-lâi tī i ê chhù kàu lāu,

Sin ê bo̍k-su khiā tī tiān-tn̂g.

Kàu bé nn̄g lâng lóng siū

Siōng-tè tiàu tī I ê sin-piⁿ.

GÍN-NÁ KAP THIⁿ-SÀI.

Chit ê kò͘-sū iû-gôan sī Eng-kok kūn-tāi ê tōa si-jîn Bû-láu-lìn (Robert Browning) chok--ê. Gôan-bûn sī 2 chōa chi̍t-chat ê si. Chóng-sī e̍k tī chia ê sī kan-ta ì-sù nā-tiāⁿ.

Kò͘-sū ê lāi-iông kán-lio̍k kóng chiàu ē-tóe:-

Ū chi̍t ê gín-ná miâ kiò Si Khek--lâi, i bô-lūn tī sím-mi̍h sî chūn sî-siông ēng chin-si̍t ê sim-koaⁿ lâi o-ló Siōng-tè. Siōng-tè chin o-ló, chin hoaⁿ-hí. M̄-kú Si Khek-lâi bô móa-chiok ài ēng chin tōa ê hong-hoat chhin-chhiūⁿ Kàu-ông ê khóan-sit tiàm tī tōa keng ê tiān-tn̂g lâi o-ló. Āu-lâi i tit-tio̍h hòa-sin khì chòe Kàu-ông. Siōng-tè bô koh-chài thiaⁿ tio̍h i o-ló ê siaⁿ. Thiⁿ-sài lo̍h-lâi chòe lâng, thòe chit ê gín-ná lâi o-ló Siōng-tè. Chóng-sī Siōng-tè bōe móa-chiok. Thiⁿ-sài chiū khì kā Kàu-ông (Si Khek-lâi) kóng, kóng i chin m̄-tio̍h chhōa i lâi chòe Kàu-ông, iā kóng Siōng-tè khah hoaⁿ-hí thiaⁿ lí chòe gín-nā ê sî

漢羅（Ùi原文改寫）

囡仔KAP天使

早起、下昏、中晝、暗時；

施克來吟講：「呵咾上帝。」

後來越頭koh做伊ê工，

來趁日日ê米糧。

伊做真thiám久koh gâu，

頭毛垂落汗滿面。

常常佇做工ê中間，

停睏，吟講：「呵咾上帝。」

然後pho̍ah伊ê頭毛佇後面，

歡喜koh再起工。

牧師講：「按呢真著，

無僥疑上帝有聽著lah！

今仔日你所呵咾ê聲，

無khah 輸上帝ê大奴僕。

伊佇這個救主koh活ê日，

踮佇殿堂呵咾上帝。」

施克來講：「願上帝予我

用彼個方法內呵咾伊，也死！」

暝過，日曝，

施克來無佇teh！

上帝所看ê一日經過，

一千年就是一日。

上帝佇天裡講：「我所歡喜

Ê聲無thang koh聽見lah！」

後來天使加伯列展翅

飛落地面上；

入肉身成做人，

踮佇施克來，ê厝，也做伊ê工。

早起、下昏、中晝、暗時；

替施克來來呵咾上帝。

對囡仔漸漸成長

到成大人;

對老到

臨終。

無厭倦佇伊ê工，

踮地面無不平。

伊趁上帝ê旨意；

無論佇天，佇地攏相同。

上帝講：「呵咾ê聲入我ê耳孔lah！

無僥疑，毋免驚。

無論對新ê世界，舊ê世界；

á是對我腳踏。

總是我有失落

細漢囡仔呵咾好聽ê聲」

後來天使展翅飛出，

肉身放下teh。

佇koh活ê日，

飛到殿堂，歇佇頂面。

新ê牧師施克來，

穿伊禮服；

徛佇大通巷，

倚佇伊ê房間。

所有過了ê履歷，

koh再明明倒轉，

對伊做囡仔勤勤做工；

到伊破病真傷重；

靈魂beh離開身軀ê時，

天使來安慰；

對破邊起來；

成做牧師，也徛佇遮。

面越東爿beh呵咾ê時，

忽然天使出現。

「對你ê工場chhōa你來遮。

我有毋著。

「我離開天界是空空，

你濟濟年所teh ǹg望ê也無益。

你呵咾ê聲真無力，聲出

天地萬有合唱就soah。

「倒轉去，也照早前ê款

來呵咾，我照我ê。

用所看輕無力ê聲，

叫醒停聲ê百姓。

倒轉去你ê厝，kap你ê光。

對囡仔koh再拍起。

施克來佇伊ê厝到老，

新ê牧師徛佇殿堂。

到尾兩人攏受

上帝召佇伊ê身邊。

囡仔KAP天使

這个故事猶原是英國近代ê大詩人Bû-láu-lìn (Robert Browning) 作--ê。原文是2 chōa一節ê詩。總是譯佇遮ê是干但意思若定。

故事ê內容簡略講照下底：－

有一個囡仔名叫施克來，伊無論佇啥物時陣時常用真實ê心肝來呵咾上帝。上帝真呵咾，真歡喜。毋過施克來無滿足ài用真大ê方法親像教王ê款式踮佇大間ê殿堂來呵咾。後來伊得著化身去做教王。上帝無koh再聽著伊呵咾ê聲。天使落來做人，替這个囡仔來呵咾上帝。總是上帝袂滿足。天使就去kā教王（施克來）講：講伊真毋著chhōa伊來做教王，也講上帝khah歡喜聽你做囡仔ê時ê呵咾ê聲；做教王所呵咾ê聲反轉真無力。天使叫伊koh倒轉去原位來呵咾上帝。

讀這个故事就知是做ê，總是內中ê意思是真好。Thang用兩三句話來講明彼個內容。這个故事是表明謙虛ê人對佇上帝ê疼ê價值。佇天使á是教王ê呵咾中間，上帝袂得聽著彼款疼ê聲。

這也thang做咱想ê問題，也thang做咱ê教示。

陳清忠