南勢番
LÂM SÌ HOAN
文獻資訊
| 項目 | 資料 |
|---|---|
| 作者 | 陳清義 Tân Chheng-gī |
| 卷期 | 芥菜子 |
| 卷期 | 第 1 號 |
| 日期 | 1925/7 |
| 頁數 | 43-45 |
白話字（原文數位化）
LÂM SÌ HOAN
Chit-pái góa khì Hoe-liân-káng hù Hùn-heng-hōe, sūn ki-hōe góa gián-kiù Làm-sì-hoan ê chōng-hóng, put-chí ū chhù-bī, taⁿ lâi pâi-lia̍t siá tī ē-tóe, pò hō͘ tāi-ke chai-iáⁿ.
-
Lūn in ê chó͘-sian. In ta̍k ê lóng kóng m̄-chai iáⁿ, ū chi̍t ūi ê phok-sū khì kā in thiu-huih lâi gián-kiú, kóng sī kap Má-lâi cho̍k saⁿ-tâng, án-ni phah-sǹg sī tùi Lâm-iûⁿ lâi khah tōa-bīn, in-ūi kap bêng-chheng iā saⁿ ha̍h: tī Hoe-liân káng thiaⁿ hit-pêng, ta̍k ê lóng kiò in lâm-sì-á.
-
Lūn in ê khiā-khí. Lóng sī pîⁿ-iûⁿ; In ê hoan-siā chin chheng-khì siùⁿ, lō͘ chin tōa tiâu, tiâⁿ chin khui-khoah, ū tek-ûi, ū chhiū chin hó khòaⁿ. Chhù, sī ēng chháu khí ê, kē-kē; kūn-lâi put-chí chìn-pō͘, ū ê kah-tàng khí, chhù téng khàm iân-phiáⁿ put-chí chhù-sū, iā ū khan tiān-teng.
-
Lūn in ê seng-o̍ah. Tāi-khài kap lâng saⁿ-tâng, put-kò teh chia̍h ê sî, bô ēng tī ngeh, sī ēng chhiú ni; ū 3 hāng in chin tùi-tiōng; chiū-sī chiú, hun, kap pin-nn̂g; bô chia̍h bōe ēng-tit.
In ê hun chi̍t ki chhit poeh chhùn tn̂g, chin tōa kho͘, lâm lú lóng ài chia̍h, put-sî chi̍t ki tu tī chhùi-ni̍h, nā bô chia̍h hun iā tio̍h chia̍h pin-nn̂g, nā bô bōe khòaⁿ-o̍ah. Tī in ê hoan-siā chhiⁿ-á chèng chin-chōe, tī in ê hn̂g iā chèng hun-hio̍h: in-ūi chit khóan ê mi̍h, in put-sî khiàm-ēng.
-
Lūn in ê sū-gia̍p. Lóng-sī choh-sit, chòe kang, lâm lú lóng ū khùi-la̍t thang chòe; ū-ê hō͘ lâng chhiàⁿ, ū-ê khi pok-chāi, ū ê hō͘ koaⁿ-thiaⁿ chhiàⁿ sàu ke-lō͘. Só͘ thàn ê chîⁿ, chin ài bóe chiú, iā ài bóe gû-chhia, khah ōe tit kè ê ta̍k ke ū gû-chhia, siông-siông thang chài mi̍h khì koe-chhī bōe.
-
Lūn in ê siā-kui. Chin chun-kèng lāu-hoan, i ê bēng-lēng chin thiaⁿ m̄-káⁿ ûi-ke̍h, tī lō͘-ni̍h saⁿ-tn̄g-thâu, siàu-liân ê, tio̍h seng mn̄g lāu ê, nā beh kéng thâu-ba̍k iā sī kéng lāu--ê, iā hit ê siū kéng ê lāu hoan beh chòe thâu-ba̍k, tio̍h ū sè-lek, gâu kóng ōe, hoah ōe tāng, chia̍h ōe ēng-tit. Nā ū tú-tio̍h tāi-chì, tio̍h hō͘ lāu hoan, kong-phòaⁿ, nā hōan-tio̍h kan-îm ê sū, tio̍h ho̍at chiú kap ti á-sī gû; nā hōan-tio̍h oan-ke, saⁿ phah, thau-the̍h, tio̍h ho̍at kim; nā thâi lâng tio̍h kek-chhut siā, i só͘ ū ê mi̍h tio̍h chhiong-kong.
-
Lūn in ê hong-sio̍k. Chi̍t nî tio̍h kúi nā pái chòe-hiòng, ū ê kóng chòe saⁿ-la̍k-kiau, ū ê kóng chòe tiān, lóng saⁿ tâng; khah siông sī tī siu-tang liáu ê sî chòe, khah chá nā thâi-tio̍h Tāi-ló͘-kó͘ hoan ê sî iā chòe; beh chòe ê sî tio̍h chhiáⁿ lâng khòaⁿ, hiah ê beh chòe ê lâng tio̍h chhēng súi saⁿ, tì bō-á, chhah khî-koe bé, chhiú tāi-ke tio̍h saⁿ khan, chhut siaⁿ chhiùⁿ koa lâi thiàu, in ēng chit hāng chòe tē-it khòai-lo̍k, tē-it hoaⁿ-hí, lāu-jia̍t.
-
Lūn in ê sìn-gióng. In bô sìn iú-hêng ê sîn-pu̍t, sī kèng bô hêng ê sîn, chiū-sī thian-sîn, nā tú-tio̍h phoah-pīⁿ ê sî, bô ài chia̍h io̍h-á sī chòe kap-á-sai, sio̍k-gú kóng, hoan-á sai-kong, chiū-sī kiò hit khóan khah lāu-pòe chai iáⁿ ê lâi liām, ì-sù sī beh tùi thiⁿ-téng ê sîn kiû, hō͘ hit ê pīⁿ hó, in iā sìn ū sîn-hûn, sí sī khì im-kan, tio̍h chòe kap-á-sai kiò i sí tio̍h khì, m̄-thang koh tńg lâi saⁿ-chhē, iā tio̍h hō͘ góan pêng-an. koh-chài in kiaⁿ kúi, nā beh chhut mn̂g ê sî, phah-kha-chhiùⁿ chiū m̄-káⁿ khì; nā thiaⁿ tio̍h pháiⁿ chiáu siaⁿ, iā m̄-káⁿ khì, nā beh khì lia̍h hî ê sî, tio̍h tāi-seng ēng chi̍t môa-chî hiat tī chúi-tiong hō͘ chúi kúi, nā bô kiaⁿ liáu hō͘ i lia̍h khì.
-
Lūn in ê kàu-io̍k. Chá lóng m̄-bat jī, iā m̄-chai ji̍t-chí, sī kan-ta khòaⁿ ge̍h îⁿ, kap siu-tang, hiān-sî chèng-hú ū siat Kong-ha̍k-hāu hō͘ in tha̍k, tī Hoe-liân-káng hù-kūn ū 3 siā, chiū-sī Tāu-lān, Po̍k-po̍k-á, Lí-lāu, chi̍t 3 siā, ū 700 gōa hō͘, ū 550 ê gín-ná teh tha̍k, tī pa̍t-siā iā ū, siū tiong-téng ê kàu-io̍k ū 7, 8, ê; ū ê tùi Su-hōan ha̍k-hāu chhut-sin, ū ê tùi Lông-ha̍k-hāu chhut-sin, ū kúi nā ê teh chòe Kong-ha̍k-hāu ê sian-siⁿ; iā ū 12 ê teh chòe sûn-cha, hiān-chāi tùi Kong ha̍k-hāu chut-gia̍p ū 6, 7 pah lâng, chiàu khòaⁿ in ê kàu-io̍k ū chiām-chiām teh chìn-pō͘; bô kú ōe kap lâng saⁿ-tâng, in ê khóan, kap lâng chih-chiap, put-chí ài láu-si̍t.
-
Lūn in ê kè-chhōa. Tōa pō͘-hūn sī chū-iû kiat-hun, kap pē-bú chham-siông iā ū, beh kè-chhōa ê sî, sī ta-po͘ nā khòaⁿ tī bó͘ ke ū cha-bó͘ gín-á i nā ài kap i kiat-hun, chiū khì in ê mn̂g-kháu, tôaⁿ chhùi-khîm, chhù lāi ê cha-bó͘ gín-á nā thiaⁿ-kìⁿ chiū chhut khì kap in kóng ōe, chham-siông kiat-hun ê sū; nā tāi-ke ōe saⁿ kah-ì, chiū ōe tiāⁿ-tio̍h: nā bōe ha̍h-ì, chiū kóng āu ji̍t chiah koh chham-siông, nā ōe tiāⁿ-tio̍h chiū kéng chi̍t ji̍t ha̍p-hun, sī ta-po͘ tio̍h ji̍p-khì cha-bó͘ hia, chhin-chhiūⁿ hō͘ i chio ê khóan, beh khì ê sî, tio̍h chio kúi-nā ê pêng-iú chòe tīn taⁿ chhâ khì, chi̍t tàⁿ tiāⁿ-tio̍h sī 8 ki, chi̍t thâu 4 ki tāi-khài tio̍h 8 tàⁿ, chiong chiah ê chhâ chòe phèng-kim, tāi-ke tī hia hō͘ in chhiáⁿ, chia̍h liáu hiah ê pêng-iú chiū tńg-khì, i chiū án-ni tiàm teh. Kôan, kap hō͘-chú lóng sī cha-bó͘ ê, só͘-í in nā-sī siⁿ cha-bó͘ kiáⁿ sim khah hoaⁿ-hí; siⁿ ta-po͘ ê, khah bô ài: in-ūi pa̍t-ji̍t tio̍h khì hō͘ lâng chio. Kūn-lâi ū sió-khóa teh kóe ōaⁿ, bô ēng chhâ chòe phèng-kim, sī ēng chîⁿ chòe phèng-kim, tāi-khài ēng 20 kho͘ á-sī 30 kho͘. Kè-chhōa liáu nā bōe ha̍h, oan-ke ta-po͘ chòe i chhut lâi, āu-lâi koh tò-tńg lâi, hô, iā ū, nā bōe koh hô cha-bó͘ koh chio pa̍t lâng; ta-po͘ koh khì hō͘ pa̍t lâng chio, kūn lâi ū sió-khóa kóe ōaⁿ, hiah-ê siū kàu-io̍k ê m̄-ài hō͘ cha-bó͘ chòe hō͘-chú, ū ê taⁿ ēng ta-po͘ chòe hō͘-chú. Hiām-kim chèng-hú ū kā in chō hō͘-chi̍p, taⁿ beh lî-iân, khah bô hiah lī-piān, nā tú-tio̍h seng-sán ê sî, bô chhin-chhiūⁿ lâng chia̍h môa-iû, koe-chiú, sī chia̍h koaⁿ-bâng sim kap chhài, nā tú-tio̍h lân-sán ê sî, bô ài hō͘ i-seng ēng ki-khì siⁿ, ài chòe kap-á-sai.
-
Lūn in ê chòng-gî. Nā tú-tio̍h sí-sit ê sî, khah-chá sī tâi tī mn̂g-kháu, bô ēng koan-bo̍k, sī ēng chhio̍h kap pang lâi kńg, ēng pin-nn̂g kap môa-chî lâi chè. Hiān-kim ū kóe-ōaⁿ ēng koan-chhâ, iā tâi tī kong-kiōng ê bō͘-tōe, in bô hun-piat tōa lâng kap gín-ná chit hāng put-chí khó-chhú.
I-siōng sī tāi-lio̍k lâi kóng nā-tiāⁿ iáu ū put-chí chōe-hāng, tiāu-cha bōe liáu, ǹg-bāng āu-pái ū ki-hōe thang koh tiāu-cha.
Tân Chheng-gī
漢羅（Ùi原文改寫）
南勢番
這擺我去花蓮港赴奮興會，順機會我研究南勢番ê狀況，不止有趣味，taⁿ來排列寫佇下底，報予大家知影。
1. 論in ê祖先。In逐ê攏講毋知影，有一位ê博士去kā in抽血來研究，講是kap馬來族相同，按呢拍算是對南洋來khah大面，因為kap名稱也相合：佇花蓮港聽彼爿，逐ê攏叫in南勢仔。
2. 論in ê徛起。攏是平洋；In ê番社真清氣相，路真大條，埕真開闊，有竹圍、有樹真好看。厝，是用草起ê，低低；近來不止進步，有ê kah棟起，厝頂蓋鉛鉼不止次序，也有牽電燈。
3. 論in ê生活。大概kap人相同，不過teh食ê時，無用箸夾，是用手拈；有3項in真對重；就是酒、薰，kap檳榔；無食袂用得。
伊ê薰一支7、8吋長，真大箍，男女攏愛食，不時一支tu佇喙裡，若無食薰也著食檳榔，若無袂快活。佇in ê番社青仔種真濟，佇in ê園也種薰葉：因為這款ê物，in不時欠用。
4. 論in ê事業。攏是作穡，做工，男女攏有氣力thang做；有ê予人倩，有ê khi pok-chiā，有ê予官廳倩掃街路。所趁ê錢，真ài買酒，也ài買牛車，khah會得過ê逐家有牛車，常常thang載物去街市賣。
5. 論in ê社規。真尊敬老番，伊ê命令真聽毋敢違逆，佇路裡相遇頭，少年ê，著先問老ê，若beh揀頭目也是揀老--ê，也彼个受揀ê老番beh做頭目，著有勢力，gâu講話，喝會動，chia̍h會用得。若有拄著代誌，著予老番，公判，若患著姦淫ê事，著罰酒kap豬á是牛；若患著冤家、相拍、偷提、著罰金；若刣人著擊出社，伊所有ê物著充公。
6. 論in ê風俗。一年著幾若擺做餉，有ê講做相la̍k-kiau，有ê講做奠，攏相同； khah上是佇收冬了ê時做，khah早若刣著大魯谷番ê時也做；欲做ê時著請人看，遐个欲做ê人著穿媠衫，戴帽仔，插khî雞尾，手大家著相牽，出聲唱歌來跳，in用這項做第一快樂，第一歡喜、鬧熱。
7. 論in ê信仰。In無信有形ê神佛，是敬無形ê神，就是天神，若拄著破病ê時，無ài食藥仔是做kap-á司，俗語講：番仔司公，就是叫彼款khah老輩知影ê來念，意思是欲對天頂ê神求，予彼个病好，in也信有神魂，死是去陰間，著做kap-á司叫伊死著去，毋thang koh轉來相找，也著予阮平安。koh再in驚鬼，若欲出門ê時，拍kha-chhiùⁿ就毋敢去；若聽著歹鳥聲，也毋敢去，若欲去掠魚ê時，著事先用一麻糬hiat佇水中予水鬼，若無驚了予伊掠去。
8. 論in ê教育。早攏毋捌字，也毋知日子，是干但看月圓，kap收冬，現時政府有設公學校予in讀，佇花蓮港附近有3社，就是Tāu-lān、Po̍k-po̍k-á、Lí-lāu，這3社，有700外戶，有550 ê囡仔teh讀，佇別社也有，受中頂ê教育有7, 8,个；有ê對師範學校出身，有ê對農學校出身，有幾若ê teh做公學校ê先生；也有12 ê teh做巡查，現在對公學校卒業有6, 7百人，照看in ê教育有漸漸teh進步；無久會kap人相同，in ê款，kap人chih接，不止ài老實。
9. 論in ê嫁娶。大部份是自由結婚，kap父母參詳也有，欲嫁娶ê時，是查甫若看佇某家有查某囡仔伊若ài kap伊結婚，就去in ê門口，彈喙琴，厝內ê查某囡仔若聽見就出去kap in講話，參詳結婚ê事；若大家會相合意，就會定著：若袂合意，就講後日chiah koh參詳，若會定著就揀一日合婚，是查甫著入去查某遐，親像予伊招ê款，beh去ê時，著招幾若ê朋友做陣擔柴去，一擔定著是8支，一頭4支大概著8擔，將遮个柴做聘金，大家佇遐予in請，食了遐个朋友就轉去，伊就按呢踮teh。 權，kap戶主攏是查某ê，所以in若是生查某囝心khah歡喜；生查甫ê，khah無ài：因為別日著去予人招。近來有小可the改換，無用柴做聘金，是用錢做聘金，大概用20箍á是30箍。嫁娶了若袂合，冤家查甫做伊出來，後來koh倒轉來，和，也有，若袂koh和查某koh招別人；查甫koh去予別人招，近來有小可改換，遐个受教育ê毋ài予查某做戶主，有ê taⁿ用查甫做戶主。現今政府有kā in造戶籍，taⁿ欲離緣，khah無遐利便，若拄著生產ê時，無親像人食麻油、雞酒，是食菅芒心kap菜，若拄著難產ê時，無ài予醫生用機器生，ài做kap-á司。
10. 論in ê葬儀。若拄著死失ê時，khah早是埋佇門口，無用棺木，是用蓆kap板來捲，用檳榔kap麻糬來祭。現今有改換用棺柴，也埋佇公共ê墓地，in無分別大人kap囡仔這項不止可取。
以上是大略來講若定猶有不止濟項，調查袂了，ǹg望後擺有機會thang koh調查。
陳清義