北部教會最近Ê消息
PAK-PŌ͘ KÀU-HOĒ CHOÈ-KŪN Ê SIAU-SIT
文獻資訊
| 項目 | 資料 |
|---|---|
| 作者 | 編輯部 Phian-chip-pō͘͘ |
| 卷期 | 芥菜子 |
| 卷期 | 第 1 號 |
| 日期 | 1925/7 |
| 頁數 | 49 |
白話字（原文數位化）
PAK-PŌ͘ KÀU-HOĒ CHOÈ-KŪN Ê SIAU-SIT
- Tām-chuí Tiong-o̍h Lo̍k-sêng-sek.
Pak-pō͘ kàu-hoē ê Tiong-o̍h, tuì siat kàu taⁿ, hāu-sià sī ēng kū-sî Sîn-ha̍k-hāu. Chóng-sī hāu-sià nî-nî ná oe̍h, in-uī ha̍k-seng ta̍k-nî khah ke-thiⁿ. Só͘-í chit-pang ū khui Cha̍p-goā-bān gûn khí chi̍t-keng sin-ê, tī nî-thâu í-keng oân-kang. Taⁿ ū tiāⁿ-tio̍h tī 6 ge̍h 29 hō téng-po͘ 9 tiám-cheng beh khui Lo̍k-sêng-sek.
Lūn chit-keng sin hāu-sià ê suí, chhù-sū, uī-tì thang kóng sī Tâi-oân tē-it. ǹg-bāng lia̍t-uī tàu kó͘-chhui chú-tē lâi chia tha̍k.
- Thoân-tō chóng-hoē
Tuì 7 ge̍h 7 hō khí 10 ji̍t kú beh khui Pak-pō͘ thoân-kàu-su káng-si̍p-hoē kap chóng-hoē tī Tām-chuí Tiong-ha̍k-hāu. Ū chhiáⁿ put-chí choē uī ê siaⁿ（按：應為sian-siⁿ）lâi káng-ián, kî-tiong Tâi-lâm Sîn-hak-hāu tiúⁿ Pa Phok-sū tē-it choē tiám.
- Gî-lân kàu-hoē to̍k-li̍p.
Lîm Chheng-liâm Bo̍k-su ū siū Gî-lân kàu-hoē phèng-chhiáⁿ. Tī 6 ge̍h 2 hō í-keng chiū-jīm.
- Chheh-pâng î-choán.
uī-tio̍h Sîn-ha̍k-hāu chiām-sî (2 nî kú) lo̍h khì Lâm-pêng kiōng-ha̍k, lán ê hāu-sià ū sè lâng, só͘-í lán ê chheh-pâng ū soá chhut-lâi tī Tām-chuí kū-sî ê I-koán.
- Má-kai I-īⁿ
Lán ê Pīⁿ-īⁿ tuì koh-chài khui kàu taⁿ, hoān-chiá boē chió. Siat-pī ta̍k-hāng chin chhù-sū,- I-seng kàu-gia̍h, khàn-hō͘ chiâu-pī, iā ū siat Thok-jî-só͘. Si̍t-chāi sī lán ê toā hēng-hok.
漢羅（Ùi原文改寫）
北部教會最近Ê消息
- 淡水中學落成式。
北部教會ê中學，對設到taⁿ，校舍是用舊時神學校。總是校舍年年ná狹，因為學生逐年khah加添。所以這pang有開十外萬銀起一間新ê，佇年頭已經完工。Taⁿ有定著佇6月29號頂晡9點鐘欲開落成式。
論這間新校舍ê媠、次序、位置thang講是台灣第一。Ǹg望列位鬥鼓吹子弟來遮讀。
- 傳道總會
對7月7號起10日久欲開北部傳教師講習會kap總會佇淡水中-學校。有請不止濟位ê sianⁿ（按：應為先生）來講演，其中台南神學校長巴博士第一濟點。
- 宜蘭教會獨立。
林清廉牧師有受宜蘭教會聘請。佇6月2號已經就任。
- 冊房移轉。
為著神學校暫時（2年久）落去南爿共學，咱ê校舍有sè人，所以咱ê冊房有徙出來佇淡水舊時ê醫館。
- 馬偕醫院
咱ê病院對koh再開到taⁿ，患者袂少。設備逐項真次序，醫生夠額，看護齊備，也有設托兒所。實在是咱ê大幸福。