力間（海龍王）
LE̍K-KAN (HÁI-LÊNG-ÔNG)
文獻資訊
| 項目 | 資料 |
|---|---|
| 作者 | 陳清忠 Tân Chheng-tiong |
| 卷期 | 芥菜子 |
| 卷期 | 第 1 號 |
| 日期 | 1925/7 |
| 頁數 | 5-6 |
白話字（原文數位化）
LE̍T-KAN (HÁI-LÊNG ÔNG)
Tī chi̍t ê joa̍h-thiⁿ Le̍k-kan chē tī Ba-tek-hái ê chio̍h-poâⁿ, Gîm i it-seng pi-siong ê koa, ēng só͘ giâ ê khîm lâi toâⁿ.
Chhiⁿ-chhuì ê hái-éng, ek-lâi ek-khì tī i chē ê kha piⁿ; Tī hit hái lāi ū só͘ thiàⁿ ê bó͘, cha-bô͘-kiáⁿ kap hāu-siⁿ.
I gîm m̄-sī hái lāi hái goā, hong-kong kéng-sek kap só͘ ū; I gîm lūn toē chiūⁿ, toē-bīn chiūⁿ, iā bô pa̍t-hāng ê kò͘-sū.
Lī-khui hái-éng, chiū kàu toē-bīn, tī-hia só͘ khoàⁿ kap só͘ thiaⁿ; Chē tī hoāⁿ-téng, lóng bô ià-siān, pi-siong chham-chhoeh lâi chhut-siaⁿ.
Gîm kóng, i ū toē-bīn piàn-kiâⁿ sì-hng, iû-le̍k ta̍k só͘-chāi; Khoàⁿ-kìⁿ lâng-lâng sim-koaⁿ chân-jím, pí tī hái--ê khah lī-hāi.
Gîm kóng, sin-sū, bo̍k-su ióng-sū, lâi hù kiat-hun lé; Bo̍k-su mn̄g kóng, “Kim-ji̍t kiat-iok ê ióng-sū siáⁿ lâng leh!”
ìn kóng, “goá m̄-sī ióng-sū, sī tuì hái lâi, bô sio̍k tī toe7” Sin-sū pui̍h to, siok-lú âu-kiò, bo̍k-su tio̍h kiaⁿ boē kóng-oē.
Gîm kóng, lé-sek bē soah, koáⁿ-kín khí-sin, lī-khui lé-pài thiaⁿ; iân lō͘ thó͘-khuì toē chiūⁿ ê lâng sim-koaⁿ ok-to̍k, chin thang kiaⁿ.
Sin-niû ta̍k ji̍t chē tī hái lāi, thî-khàu, ba̍k-sái nā lo̍h hō͘; khàu kóng, “goá ê tiōng-hu, khó-sioh! Khó-sioh! M̄-sī Ki-tok-tô͘.
Le̍k-kan thiaⁿ liáu, sim-koaⁿ kan-khó͘, koh-chài chi̍t-pài chiūⁿ toē-bīn; ài chhē bo̍k-su, niá-siū soé-lé, thang tit tek-kiù ê bûn-pîn.
I ū chi̍t-am, giâ kim ê khîm, sim-koaⁿ ut-chut, lō͘-piⁿ chē; Khoàⁿ-kìⁿ bo̍k-su, sin chhēng lé-ho̍k, khiâ tī pe̍h-bé tuì hia koè.
“Le̍k-kan siáⁿ-sū lâi mn̄g soé-lé! Thian-kok bô sio̍k tī lí-ê, Oh-tit! Oh-tit! Siat-sú nā oē, goá ê chhâ-koái beh puh-gê.”
Kàu-ke̍k kî-koài!! Chhâ-koái puh gê, siⁿ ki hoat hio̍h, kap toā châng; Bo̍k-su khui siaⁿ o-ló Siōng-tè, hoaⁿ-hí chín-kiù bê-lō͘ lâng.
“Toē ū chhin-chhiat! hái ū chhin-chhiat! ji̍t ge̍h chhiⁿ-sîn kap ta̍k luī; Ah! Thiⁿ, Toē, Hái, Siōng-tè--To̍k-to̍k lâng ê chhin-chhiat tī to̍h-uī?”
Hit-tia̍p liáu āu, Le̍k-kan siông-siông chē tī Pak hái ê chio̍h poâⁿ; Pi-siong thó͘-khuì, chhut-siaⁿ lâi gîm, ēng só͘ toà ê khîm lâi toâⁿ.
LE̍K-KAN THE NECKAN
(Le̍k-kan sī chuí-sîn, piān-gî-siōng e̍k choè; Hái-lêng-ông)
Goân-bûn sī chi̍t chat 4 kù ê si. Chok-chiá sī Eng-kok kūn-sè ê toā si-jîn, bûn-gē phoe-phêng-chiá, iā-sī toā kàu-io̍k ka A-ló Má thài (Nathew Arnold 1822-1888；按：應為Mathew). Chit-siú chiū-sī I só͘ siá “kóng-oē-thé” si-tiong ê chi̍t-phiⁿ. Lán ná tha̍k chiū suî-sî bêng-pe̍k, chit ê kò͘-sū m̄-sī si̍t ê, sī choè ê.
Taⁿ e̍k tī chia ê, boē kham-tit kóng sī si, in-uī lán ê si ū lán ê kui-kú; nā-sī chit siú lóng bô chiàu kui-kú. Ta̍k-choā ū 15 jī iā 1 choā choè chi̍t chat; chit-khoán ê thé phah-sǹg bô teh thang khoàⁿ; e̍k án-ni si in-uī ài hō͘ láng khah hó tha̍k nā-tiāⁿ.
Chóng-sī e̍k-chiá ê ì-sù m̄-sī iàu-kín tī kò͘-sū chin, á-sī ké; sī thé chiâⁿ-hêng á-bô chiâⁿ-heng, Sī khah iáu-kin tí lāi-tiōng só͘ pau-hâm ê ì-sù, khoàⁿ ū sím-mi̍h thang choè lán sìn-chiá ê kà-sī á-sī lī-ek á-bô?
Pí-phēng lâi kóng-
Chiàu lán só͘ tha̍k,
Le̍k-kan thang chí sím-mi̍h khoán ê lâng?
Hái sī chí sím-mi̍h, toē sī chí sím-mi̍h?
Le̍k-kan ê bó͘ siáⁿ-sū lâi thî-khàu?
Bo̍k-su m̄ chiap-la̍p Le̍k-kan niá soé-lé sī cháiⁿ-iūⁿ?
Chhâ-koái oē puh-gê sī hián-chhut sím-mi̍h?
Á-sī ū sím-mi̍h pa̍t-hāng thang-choè lán siūⁿ ê bûn-toê, lán nā ióng-sêng ná-tha̍k ná-siūⁿ ê si̍p-koàn, chiū lán oē tit-thang ke-thiⁿ chin-choē ê lī-ek.
Chhiáⁿ lia̍t-uī ê tha̍k-chiá tha̍k chit phiⁿ, m̄-thang kan-ta khoàⁿ kò͘-sū choè sim-sek, tàu-kù choē hó-thiaⁿ; nā án-ni chiū siá tī-chia ê bo̍k-tek sī khang-khang.
Tân Chheng-tiong
漢羅（Ùi原文改寫）
力間（海龍王）
佇一个熱天力間坐佇Ba-tek-海ê石磐，吟伊一生悲傷ê歌，用所giâ ê琴來彈。
青翠ê海湧，溢來溢去佇伊坐ê跤邊；佇彼海內有所疼ê某、查某囝 kap後生。
伊吟毋是海內海外，風光景色kap所有；伊吟論地上、地面上，也無別項ê故事。
離開海湧，就到地面，佇遐所看kap所聽；坐佇岸頂，攏無厭倦，悲傷慘啜來出聲。
吟講：伊有地面遍行四方，遊歷逐所在；看見人人心肝殘忍，比佇海--ê khah厲害。
吟講：紳士，牧師勇士，來赴結婚禮；牧師問講：「今日結約ê勇士啥人咧！」
應講，「我毋是勇士，是對海來，無屬佇地」紳士拔刀，淑女喉叫，牧師著驚袂講話。
吟講：禮式bē soah，趕緊起身，離開禮拜廳；沿路吐氣地上ê人心肝惡毒，真thang驚。
新娘逐日坐佇海內，啼哭，目屎若落雨；哭講：「我ê丈夫，可惜！可惜！毋是基督徒。」
力間聽了，心肝艱苦，koh再一擺上地面，Ài找牧師，領受洗禮，thang得得救ê 文憑。
伊有一暗，舉金ê琴，心肝鬱卒，路邊坐；看見牧師，新穿禮服，騎佇白馬對遐過。
「力間啥事來問洗禮！天國無屬佇你ê，oh得！oh得！設使若會，我ê柴拐beh莩芽。」
到極奇怪！！柴枴莩芽，生枝發葉，kap大欉；牧師開聲呵咾上帝，歡喜拯救迷路人。
「地有親切！海有親切！日月星辰kap逐類；啊！天、地、海，上帝--獨獨人ê親切佇叼位？」
彼霎了後，力間常常坐佇北海ê石磐；悲傷吐氣，出聲來吟，用所帶ê琴來彈。
力間 THE NECKAN
（力間是水神，便宜上譯做：海龍王）
原文是一節4句ê詩。作者是英國近世ê大詩人，文藝批評者，也是大教育家A-ló Má thài (Nathew Arnold 1822-1888；按：應是Mathew)。這首就是伊所寫「講話體」詩中ê一篇。咱ná讀就隨時明白，這个故事毋是實ê，是做ê。
Taⁿ譯佇遮ê，bōe堪得講是詩，因為咱ê詩有咱ê規矩；若是這首攏無照規矩。逐chōa有15字也1 chōa做一節；這款ê體拍算無teh thang看；譯按呢是因為ài予人khah好讀若定。
總是譯者ê意思毋是要緊佇故事真，á是假；是體成形á無成形，是khah要緊佇內中所包含ê意思，看有啥物thang做咱信者ê教示á是利益á無？
比並來講－
照咱所讀，
力間thang指啥物款ê人？
海是指啥物，地是指啥物？
力間ê某啥事來啼哭？
牧師毋接納力間領洗禮是怎樣？
柴拐會莩芽是顯出啥物？
Á是有啥物別項thang做咱想ê問題，咱若養成ná讀ná想ê習慣，就咱會得thang加添真濟ê利益。
請列位ê讀者讀這篇，毋thang干但看故事做心適，逗句濟好聽；若按呢就寫佇遮ê目的是空空。
陳清忠