北部事務：李長老ê小傳
PAK-PŌ͘ SŪ-BŪ:Lí Tiúⁿ-ló ê Sió-toān
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台南府城教會報 |
| 卷期 | 第478卷 |
| 日期 | 1925/1 |
| 頁數 | 5 |
白話字（原文數位化）
Lí Tiúⁿ-ló ê Sió-toān
1925.01 478 koàn p.5
(It Toā-tiū-tiâⁿ Kàu-hoē ê Sìn-chiá kì)
Lí Tiúⁿ-ló ê huì-miâ kiò-choè Chhun-seng, sī Bân ê Lō͘-kang lâng. I ê lāu-pē ū sì ê kiáⁿ; i sī soah-bé ê. Soè-hàn ê sî chiū put-chí lêng-khiáu, koh ū toā chì-khì, chin khîn chiū-kūn sian-siⁿ bián-ba̍k; só͘-í ū thé-ek Tiong-goē ê ha̍k-būn, kap thong hiáu kó͘-kim ê sū-lí. Tiúⁿ-ló tī siàu-liân ê sî chiū sìn-gióng Ki-tok-kàu; jîn-keh chin koân, choē-choē lâng chun-kèng i. Tī Tông-tī 7 nî lâi Tiâ-oân keng-êng tê-siong. Tng-sî tú-á Tâi-oân kap goā-kok bô͘-e̍k choè sēng; Tiúⁿ-ló m̄-nā lô-le̍k tī siong-kài, koh siông-siông tù-su kià-khì Siōng-hái ê pò-koán, thong-lūn Chheng-tiâu tè-chèng ê si̍t-chhek. Koh chi̍t-bīn, tuì i ê sìn-tek siⁿ-chhut khiân-sêng ê sim, lóng bô kiàn-siàu i sī choè tong-tāi it-poaⁿ bîn-chiòng só͘ kheng-sī ê Ki-tok-tô͘, hoán-tńg hó-táⁿ chīn-la̍t soan-thoân Ki-tok-kàu ê chin-tō. iā kap tng-sî ê koaⁿ-hú tàu kó͘-bú siā-hoē ê kong-ek sū-gia̍p, í-ki̍p hong-sio̍k ê kái-liông, téng-téng.
Tī Pak-pō͘ chho͘-tāi ê kàu-hoē, Tiúⁿ-ló sī chin jia̍t-sim ê chi̍t-ê.Tuì Tâi-oân ji̍p Ji̍t-pún ê pán-tô͘ liáu-āu, Lí Tiúⁿ-ló tuì siā-hoē ê kòng-hiàn, si̍t-chāi lân-tit ēng pit chi̍t-āng chi̍t-hāng lâi pâi-lia̍t kàu chheng-chhó, chhin tam-tng Tâi-oân sú-liāu phian-chhoàn phêng-gī-oân ê chit lâi pang-chān chèng-hú, koh koan-khoán lâi heng-khí kàu-io̍k, kap choē-choē hāng ê chû-siān sū-gia̍p. Kai Bo̍k-su teh thoân-kàu ê sî Lí Tiúⁿ-ló iā chin-chiàⁿ chīn-la̍t lâi uī-tio̍h kàu-hoē tio̍h-boâ. āu-lâi ū siū-kéng choè Toā-tiū-tiâⁿ kàu-hoē ê tiúⁿ-ló; muí lé-pài kàu pài-tn̂g siú an-hioh, jia̍t-sim kan-chèng tō-lí, gâu hián-chhut hó bô͘-iūⁿ lâi ín-chhoā hoē-iú, kap chi̍t-ke ê hō͘-poè. Koh hiàn gûn choē-choē lâi choè kiàn-tiok pài-tn̂g, o̍h-tn̂g téng-téng, kàu-hoē sū-gia̍p ê lō͘-ēng. Lūn Tiúⁿ-ló ê kià-hù, m̄-sī kan-ta lán Pak-pō͘ Kàu-hoē-lāi chit hong-bīn nā-tiāⁿ, chiū Loē-tē-lâng ê Kàu-hoē kap Ē-mn̂g ê Kàu-hoē iā ū siū-tio̍h i chin toā ê pang-chān.
Lí Tiúⁿ-ló tī 9 ge̍h 7 ji̍t siū-chiong hióng-siū 88 hè ê ko-lêng. I ū saⁿ ê kiáⁿ, cha̍p-saⁿ ê sun, koh káu ê cheng-sun. án-ni thang kóng i siū-tio̍h Siōng-tè ê chiok-hok si̍t-chāi chin toā.
Tī 11 ge̍h 6 ji̍t chip-hêng chòng-sek tī Lí Kuì-ka ê the̍h, hoē-chòng-chiá ū tang-sai ê thoân-kàu-su, chèng-hú ê koaⁿ-lī, kàu-io̍k-kài ê sian-siⁿ, kok kàu-hoē ê tāi-piáu, í-ki̍p siā-hoē-tiong só͘ ū ê bêng-bōng-ka téng, kiōng oá sì chheng lâng, ta̍k lâng bô-m̄ uī-tio̍h i lâi iu-būn; chóng-sī gâu thiàⁿ-thàng ê Siōng-tè khoàⁿ i í-keng oân-moá i ê kang, lâi kéng-tiàu i tò-tńg. Chit-tia̍p i tú-tú sī chhin-chhiūⁿ mî-sî ê thài-iông lâu i ê kng tī o͘-àm ê ge̍h. Lán sui-bóng boē-tit-thang khoàⁿ-kìⁿ i ê bīn-iáⁿ, iáu-kú lán thang tī i ê kiáⁿ-sun tiong, lâi khoàⁿ-kìⁿ i so͘ lâu ê hó bô͘-iūⁿ.
漢羅（Ùi原文改寫）
李長老ê小傳
1925.01 478卷 p.5
(一大稻埕教會ê信者記)
李長老ê諱名叫做春生，是閩ê 路工人。伊ê老父有4個子；伊是煞尾ê。細漢ê時就不止靈巧，koh有大志氣，真勤就近先生勉目1 ；所以有体得中外ê學問，佮通曉古今ê事理。長老tī少年ê時就信仰基督教；人格真懸，濟濟人尊敬伊。Tī同治7年來台灣經營茶商。當時抵仔台灣佮外國貿易最盛；長老m̄-nā努力tī商界，koh常常著書寄去上海ê報館，統論清朝帝政ê失策。Koh一面對伊ê信德生出虔誠ê心，攏無見笑伊是做當代一般民眾所輕視ê基督徒。也佮當時ê官府鬥鼓舞社會ê公益事業，以及風俗ê改良等等。
Tī北部初代ê教會，長老是真熱心ê一個。對台灣入日本ê版圖了後，李長老對社會ê貢獻，實在難得用筆一項一項來排列到清楚，親擔當台灣史料編篡評議員ê職來幫贊政府，koh 捐款來興起教育，佮濟濟項ê慈善事業。偕牧師teh傳教ê 時，李長老也真正盡力來為著教會著磨。後--來有受揀做大稻埕教會ê長老；每禮拜拜堂守安歇，熱心干証道理，gâu顯出好模樣來chhoā會友，佮一家ê後輩。Koh獻銀濟濟來做建築拜堂、學堂等等教會事業ê路用。論長老ê寄付，m̄是kan-ta 咱北部教會內chit方面nā-tiāⁿ，就內地人ê教會佮?門ê教會也有受著伊真大ê幫贊。
李長老tī 9月7 日壽終，享壽88 歲ê高齡。伊有3個子，13個孫，koh 9個曾孫。án-ni thang講伊受著上帝ê祝福實在真大。
Tī 11月6日執行葬式tī李Kuì-ka ê宅，會葬者有東西ê傳教師、政府ê官吏、教育界ê先生、各教會ê代表，以及社會中所有ê名望家等，共倚4千人，逐人無m̄為著伊來憂問；總--是gâu疼痛ê上帝看伊已經完滿伊ê工，來揀召伊倒轉。Chit-tia̍p伊抵抵是親像暝--時ê太陽留伊ê光tī烏暗ê月。咱雖罔bē 得thang看見伊ê面影，iáu-kú咱thang tī 伊ê 子孫中來看見伊所留ê好模樣。