理想tek ê婦人
Lí-sióng-tek ê Hū-jîn
文獻資訊
| 項目 | 資料 |
|---|---|
| 作者 | 黃Siū-huī N̂g Siū-huī |
| 卷期 | 台南府城教會報 |
| 卷期 | 第470卷 |
| 日期 | 1924/5 |
| 頁數 | 10 |
白話字（原文數位化）
Lí-sióng-tek ê Hū-jîn
1924.05 470 koàn p.10-11
(N̂g Siū-huī)
Tī Chú-chêng pah saⁿ, sì nî ê sî, Lô má-kok put-chí heng, m̄-kú hit-sî ê siā- hoē sī siāng hú-pāi, ū hun nn̄g kai-kip, chiū-sī Kuì-cho̍k kap Sù-bîn. Hiah ê kuì-cho̍k in hō-miâ kiò Hoa̍t-cho̍k (Oligarchy). Chiah ê iú-lī ê sū-gia̍p á-sī Goân-ló-īⁿ ê gī-oân kap ko-téng-koaⁿ lóng sī Hoa̍t-cho̍k ê lâng chiàm-teh. Tuì án-ni ná-kú siōng-hā pîn-hù ná hun ná-lī, soà pìⁿ-chò nn̄g ê kai-kip, tiong- téng kai-kip soà bô--khì.
Tī hit-sî hiah ê Hoa̍t-cho̍k chin pù-ū, hiah ê kuì hu-jîn soà ū hit-hō hong-sio̍k, chiū-sī siông-siông tāi-ke chò-hoé teh tián só͘-ū chng-thāⁿ ê chong-sek-phín; khoàⁿ siáⁿ-lâng ū kim-chhiú-chí, siáⁿ- lâng ū siuⁿ kim-kong-chio̍h ê hī-kau, siáⁿ- lâng ū siāng ta̍t-chîⁿ koh suí ê mi̍h, tāi- ke khoàⁿ-lâi khoàⁿ-khì; án-ni chò khoài- lo̍k, chò kau-chè chi̍t hāng ê ki-koan.
Ū chi̍t pái ū chi̍t ê kuì hū-jîn miâ Ko-nî-lī-a (Cornelia). Ū chi̍t-ji̍t i pêng- sî só͘ teh kau-poê ê kuì hū-jîn lóng chhoā lâi in tau, iû-goân koh teh tām-lūn ta̍k-lâng só͘-ū ê chong-sek-phín. Tī hit-sî hiah ê kuì hū-jîn chiū tuì Ko-nî-lī-a kóng, “Taⁿ, lí só͘-ū ê pó-poè sī sím-mi̍h? Chhiáⁿ the̍h hō͘ goán khoàⁿ.” Nā-sī i chài-saⁿ kā in the-sî, kóng, “Goá bô ū chhin-chhiūⁿ lia̍t-uī só͘-ū hiah-ni̍h suí ê pó-poè thang hō͘ lín khoàⁿ.” Chóng-sī hiah ê kuì hū-jîn pek i. Ko-nî-lī-a chiū kóng, “Nā-sī án-ni, hó! Chóng-sī goá ê pó-poè kap lín khah bô sio-siāng. Chhiáⁿ thèng-hāu, goá beh lâi khì the̍h hō͘ lín khoàⁿ.” Hiah ê kuì hū-jîn tāi-ke chi-bú chī-chū, kóng, “Taⁿ, chit ê Ko-nî-lī-a m̄-chai ū siáⁿpó-poè thang hō͘ lán khoàⁿ.” Tāi-ke teh tán-hāu. Tú teh tán-hāu ê sî, hut-jiân mn̂g khui, chiū khoàⁿ-kìⁿ i chhiú khan nn̄g ê sim-sek khó-ài ê ta-po͘-gín- ná chò-hoé ji̍p-lâi, hō͘ in khoàⁿ, kóng, “Che chiū-sī goá ê pó-poè.”
Chit ê Ko-nî-lī-a chit nn̄g ê kiáⁿ, toā--ê miâ Tiberius Gracchus; sè-hàn--ê miâ Caius Gracchus. Toā-kiáⁿ tī Chú-chêng 133 nî ū chò Lô-má ê Hō͘-bîn-koaⁿ (Tribune of the People), chhut-la̍t kái-liông siā-hoē-cha̍p nî kú, put-chí siū hiah ê kuì-cho̍k oàn, soà hō͘ lâng hāi-sí. Kàu 123 nî, sió-ti koh chiap in hiaⁿ ê siū hoán-tuì-tóng gio̍k-sat lâi sí.
Chit ê hū-jîn ê tiōng-hu chá sí, chin- chē lâng khǹg i tio̍h kái-kè, i toàn-toàn m̄-khéng. Tī hit-sî ū chi̍t ê ông beh tiàu i chò ông-hō͘, i iā toàn-jiân siā-choa̍t, khoàⁿ bô sè-kan ê khoài-lo̍k hù-kuì, kam-goān hiàn choân-sin, choân-le̍k lâi kàu-io̍k i nn̄g ê kiáⁿ kàu sêng-kong chò kok-ka ê toā tòng-liông.
Taⁿ chit ê hū-jîn-lâng si̍t-chāi chin thang chò lán chèng sìn-tô͘ ê bô͘-iūⁿ: I lia̍h kiáⁿ chò pó-poè, ēng choân-sim lâi ióng-io̍k kap kàu-io̍k. Pàng-sak sè-kan ê bêng-lī, lī-khui iú-he̍k, lâi siú cheng-chiat. Che chin-chiàⁿ sī lí-sióng ê hiân hū-jîn lah! Hoān choè sìn-tô͘ ê hó-pêng-iú ah! Lán iā tio̍h lia̍h lán ê kiáⁿ choè pó-poè, put-sî tio̍h chù-ì koan-sim, ēng tú-hó ê kà-hoat lâi kà, ēng thong-lí lâi ín-chhoā kà-sī i, chiū iû-goân beh sêng-kong, chiâⁿ-choè kàu-hoē ê tōng-liông, bián-tit lán ê kiáⁿ ū lī-khui Siōng-tè, hān-lo̍h tē-ga̍k ê iu-būn.
iū-koh lán chò sìn-tô͘ ê iā thang o̍h, bo̍h-tit koè-thâu tuì-tiōng sè-kan ê bêng-lī, ē-hiáu lī-khui Mô͘-kuí ê bê-he̍k, lâi siú Chú ê kà-sī, chiū lán chiah bē ko͘-hū Chú ê thiàⁿ, chiū thang tit-tio̍h I ê siúⁿ.
漢羅（Ùi原文改寫）
理想的ê婦人
1924.05 470卷 p.10-11
(黃Siū-huī)
Tī主前百三、四年ê時，羅馬國不止興，m̄-kú hit時ê社會是上腐敗，有分二階段，就是貴族佮庶民。Hiah ê貴族in號名叫「法族」。Chiah ê有ê事業抑是「元老院」ê議員俗高等官攏是「法族」ê人佔teh。Tuì án-ni那久上下貧富那分那離，煞變做2個階段，中等階段煞無去。
Tī hit時hiah ê法族，真富有，hiah ê貴婦人煞有hit號風俗，就是常常逐家做影teh展所有chng-thaⁿ ê裝飾品；看啥人有金手指，啥人有鑲金、鋼石ê耳釣，啥人有上值錢koh suí ê物，逐家看來看去；án-ni做快樂，做交際1項ê奇觀。
有1擺有1個貴夫人名歌妮利亞。有一日伊平時所teh交陪ê貴夫人攏chhoā來in兜，猶原koh teh談論逐人所有ê裝飾品。Tī hit時hiah ê貴夫人就tuì歌妮利亞講：「今，你所有ê寶貝是甚物？請提hō͘阮看。」若是伊再三kā in推辭，講：「我無有親像列位所有hiah-nih suí ê寶貝thang hō͘ lín看。」總是hia ê貴夫人逼伊。歌妮利亞就講：「若是án-ni，好！總是我ê寶貝佮lín較無相像。請聽候，我beh來去提hō͘ lín看。」Hieh ê夫人逐家chi-bú chī-chū,講：「今，這個歌妮利亞m̄知有啥寶貝thang hō͘咱看。」逐家teh等候。抵teh等候ê時，忽然門開，就看見伊手牽2個心適可愛ê查甫囡仔做夥入來，hō͘ in看，講：「Che就是我ê寶貝。」
這個歌妮利亞這2個子，大--ê名Tiberius Gracchus；細漢--ê名Caius Gracchus。大子tī主前133年有做羅馬ê護民官，出力改良社會10年久，不止受hiah ê貴族怨，煞hō͘人害死。到123年，小弟koh接in兄ê位，後來受反對黨虐殺來死。
這個夫人ê丈夫早死，真濟人勸伊著改嫁，伊斷斷m̄肯。Tī hit時有1個王beh召伊做王后，伊也斷然謝絕，看無世問ê快樂富貴，甘願獻全身，全力教育伊2個子到成功做國家ê大棟樑。
今這個婦人人實在真thang做咱眾信徒ê模樣：伊掠子做寶貝，用全心來養育佮教育。放sak世間ê名利，離開誘惑，來守貞節。Che真正是理想ê賢婦人--lah！凡做信徒ê好朋友--ah！咱也著掠咱ê子做寶貝，不時著注意關心，用抵好ê教法來教，用通理來引chhoā教示伊，就猶原beh成功，成做教會ê棟樑，免得咱ê子有離開上帝，陷落地獄ê憂悶。
又koh咱做信徒--ê也thang學，莫得過頭對重世間ê名利，會曉離開魔鬼ê迷惑，來守主ê教示，就咱才bē辜負主ê愛，就thang得著伊ê賞。