神明奇聞
Sîn-bêng Kî-bûn
文獻資訊
| 項目 | 資料 |
|---|---|
| 作者 | 李水車 Lí Chuí-chhia |
| 卷期 | 台南府城教會報 |
| 卷期 | 第469卷 |
| 日期 | 1924/4 |
| 頁數 | 11 |
白話字（原文數位化）
Sîn-bêng ê Kî-bûn
1924.04 469 koàn p.11-12
(Lí Chuí-chhia)
Tè-kun kap I ê tâng-phoāⁿ hō͘ hé sio-sí.
Tī Ta-khoe ū chi̍t-sian ê Tè-kun la̍k-pah-goā nî kú,peh-sìⁿ chin sìn-giog2--ê. Ta̍k-nî chiaⁿ-goe̍h 13 ji̍t ū chiong toā-ku teh kā i choè siⁿ-ji̍t . Chiaⁿ-goe̍h 8 ji̍t ū hō͘ Thâu-siâⁿ ê lâng chhiáⁿ khì siā-sîn . In-uī la̍h-chek-hé tó lo̍h-lâi , sio-tio̍h Tè-kun ê saⁿ , soà sio seng-khu, lóng-chóng ū sio 5 sian khì ,Ū-ê pìⁿ hé-hu, ū-ê sio chi̍t-poàⁿ , ū-ê sio chhiú kap bīn, Chhù lóng bô sio-tio̍h. kàu thiⁿ-kng khí-lâi chiah chai,hit ê lâng chin kiaⁿ,kín lâi kā Ta-khoe ê lâng kóng. Ta-khoe ê lâng m̄ pàng i soah,hit ê lâng tiāⁿ-tiāⁿ, kù-chāi lâng phah, kóng, “Lí nā kā goá phah-sí, goá ia̍h bô thang chhòng hêng lín, che sī ko͘-put-chiong ê.” Chit ê lâng chhiáⁿ-sîn beh kiû hok-khì , hoán-tńg tú-tio̍h chai-ē . Koh Tè-kun tú-tio̍h hé ia̍h boē chí-sī i, ia̍h boē cháu; sī chhâ ê mi̍h, oá-tio̍h hé chū-jiân oē sio-khì. Hiān-sî chng-ni̍h ê lâng chin iu-būn, kóng, phah-sǹg kin-nî oē chin pháiⁿ-nî tang , só-í chiah oē án-ni .
Thian-su beh Kàng-lîm
Tī kū-nî kū-le̍k 7 ge̍h Gî-lân ū chi̍t ê hê-siūⁿ, iâu-giân kóng Tiuⁿ Thian-su beh kàng-lîm , ū lâi kā i thok-bāng , kóng 7 , 9 ge̍h 2 ge̍h-ji̍t ê tiong-kan , thiⁿ-ē ê lâng beh sí chi̍t-poàⁿ , ū ìn kóng-kò, sì-koè pò lâng chai . Hit-tiuⁿ kóng-kò goá pún-sin ū khoàⁿ-kìⁿ, chiū-sī kóng, nā-sī khoàⁿ-kìⁿ chit-tiuⁿ ê siān-sū, á-sī hó-sim ê lâng tio̍h kín-kín siá 7 tiuⁿ pò lâng chai , koh tio̍h chia̍h chi̍t-thiap ê io̍h-á. Chit ê io̍h-hng tī kóng-kò-toaⁿ-lāi ū siá-bêng , nā bô án-ni kiâⁿ ê lâng oē thò͘ chhiⁿ-huih , poàⁿ-tiám-cheng chiū oē sí . Khoàⁿ-kìⁿ ê lâng chin kiaⁿ ; ū-ê kín khi khi thiah io̍h-á ;ū-ê kín siá kóng-kò pò lâng chai . āu-lâi hit ê iâu-giân ê hê-siūⁿ ū hō͘ kéng-koaⁿ lia̍h-khì koán-á-lāi khu-liû , hit ê sū chiah soah .
Káu-ông-kong Thoè-sîn
Tī nn̄g nî chêng Lô-tong ê Bú-láu-khiⁿ ū nn̄g-ê chhī gû gín-ná choè chi̍t-sian ê thô͘ ang-á , khiâ chi̍t-chiah ê thô͘-gû, chiū kā i pài , āu-lâi lâng chiū hong-siaⁿ kóng , chit ê thô͘ ang-á oē kā i khoàⁿ gû, ia̍h oē lia̍h hî hō͘ i , kóng nā ū pak-tó͘-thiàⁿ , mn̄g i suî-sî hó . Ū lâng kóng , oē hō͘ khiau-ku oē ti̍t , chiū kā i liap-hō “Káu-ông-kong .” Hut-jiân-kan chi̍t ji̍t kuí-nā chheng lâng khì hêng-hiuⁿ hia , khì hia sio-kim ê lâng , ū the̍h sì-hāng tńg-khì i-pīⁿ :—
1.iún khoe-chuí tńg-khì lim .
2.The̍h chio̍h-thâu tńg-khì choaⁿ-tê , choaⁿ hó hiat tī lō͘-piⁿ ; lâng koh khioh khì choaⁿ , chia̍h-tio̍h phoà-pīⁿ iáu oē hó .
3.Khau chháu-á tńg-khì choaⁿ-tê, hit uī ê chháu-á khau kàu bô poàⁿ-ki .
4.The̍h kim-hu kap hiuⁿ-hu choè lô͘-tan .
Hit-uī bô poàⁿ-hāng mi̍h tī-teh, kan-ta nn̄g , saⁿ tè toā chio̍h-thâu tī-hia nā-tiāⁿ . āu-lâi ū kéng-chhat-koaⁿ khì hia kò͘, m̄-hō͘ lâng pài , iā soà khan chháu-soh-á . Ū lâng khoàⁿ kéng-chhat-koaⁿ tī-hia , m̄-káⁿ oá-khì pài ,hn̄g-hn̄g hiòng Káu-ông-kong ê só͘-chāi pài-pài-teh chiū kín cháu .
Goán ia̍h ū khì hia pò͘-tō , chin-choē lâng thiaⁿ-tio̍h chin gông-ngia̍h,tī goá sin-piⁿ ū chi̍t-ê tio̍h koâⁿ-jia̍t , koâⁿ kàu khī-khī-chhoah . Goá mn̄g i kóng , Lí ū mn̄g Káu-ông-kong á-bô? I kóng chi̍t ji̍t pài saⁿ pái , m̄-chai i ê sîn bô koán kàu chia á m̄-sī . Taⁿ chiah kú lóng bô lâng ài khì pài i ; lâng chiū kóng sī thoè sîn-khì . In-uī sī liap-chō ké ê sîn , só͘-í heng boē kú.
漢羅（Ùi原文改寫）
神明ê奇聞
1924.04 469卷 p.11-12
(李水車)
帝君佮伊ê同伴hō͘火燒死
Tī礁溪有一仙ê帝君600外年久，百姓真信仰--ê。逐年正月13日有將大龜teh kā伊做生日。正月8日有號頭城ê人請去謝神。因為蠟燭火倒--落-來，燒著帝君ê衫，續燒身軀，攏總有燒5仙去，有ê變火灰、有ê燒一半、有ê燒手佮面、厝攏無燒著。到天光起來才知，hit ê人真驚，緊來kā礁溪ê人講。礁溪ê人m̄放伊煞，hit ê人tiāⁿ-tiāⁿ據在人扑，講：「你若kā我扑死，我也無thang創還lín,che是姑不chiong --ê。」這ê人請神beh求福氣，反轉抵著災禍。Koh帝君抵著火也boē指示伊，也boē走；是柴ê物，倚著火自然會燒--去。現時庄--ni̍h ê人真憂悶，講：扑算今年會真歹年冬，所以才會án-ni。
天師beh降臨
Tī舊年舊曆7月宜蘭有一個和尚，謠言講張天師beh降臨，有來kā伊託夢，講7、9月2月日ê中間，天下ê人beh死一半，有印廣告，四界報人知。Hit張廣告我本身有看見，就是講：若是看見這張ê善事，抑是好心ê人著緊緊寫7張報人知，koh著食一帖ê藥--仔。這ê藥方tī廣告單內有寫明，若無án-ni行ê人會吐生血，半點鐘就會死。看見ê人真驚；有ê緊去拆藥--仔；有ê緊寫廣告報人知。後來hit 個謠言ê和尚有hō͘警官掠去館仔內拘留，hit ê事才煞。
九王公退神
Tī兩年前羅東ê母老坑有兩個飼牛囡--仔做一仙ê土--尪仔，騎1隻ê土牛，就kā伊拜，後來人就風聲講，這個土--尪仔會kā伊看牛，也會掠魚hō͘伊，講若有腹肚疼，問伊隨時好。有人講，會hō͘ khiau龜--a會直，就kā伊liap號「九王公。」忽然間一日幾若千人去行香hia，去hia燒金ê人，有提4項轉去醫病： --
1、舀溪水轉去lim。
2、提石頭轉去煎茶，煎好hiat tī 路邊；人koh拾去煎，食著破病iáu會好。
3、khau草仔轉去煎茶，hit位ê草仔khau到無半支。
4、提金灰佮香灰做爐丹。
Hit位無半項物tī-teh，kan-ta兩，三tè大石tī-hia nā-tiāⁿ。後來有警察官去hia顧，m̄-hō͘人拜，也續牽草索仔。有人看警察官tī-hia，m̄敢倚去拜，遠遠向九王公ê所在拜拜teh就緊走。
阮也有去hia播道，真濟人聽著真gông-ngia̍h ，tī 我身邊有一個著寒熱，寒到khī-khī-chhoa。我問伊講：「你有問九王公抑--無？」伊講：「一日拜3擺，m̄知伊ê神無管到chia抑m̄是。」今才久攏無人ài去拜伊；人就講是退神--去。因為是捏造假ê神，所以興boē久。