至好朋友
Chì-hó Pêng-iú
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台南府城教會報 |
| 卷期 | 第439卷 |
| 日期 | 1921/10 |
| 頁數 | 8 |
白話字（原文數位化）
Chì-hó Pêng-iú
1921.10 439 koàn p.8-9
(Lân Liân--sī Má-gio̍k kì.)
Ū thiaⁿ-kìⁿ chi̍t ê kò͘-sū teh kóng kuí-nā cha̍p nî chêng Eng-kok ê Lú-ông ū khì thàm So͘-kiat-lân ê kiaⁿ-siâⁿ. Lī hit-ê siâⁿ bô loā hn̄g, ū sió só͘-chāi kīn tī hái-kîⁿ. Lâng tī hia khah chē sī thó-hái-ê, chin bô êng, chin mî-noā thàn-chîⁿ. Hut-jiân chi̍t ji̍t thiaⁿ-kìⁿ Lú-ông bîn-á-chài beh khì in hia khoàⁿ-khoàⁿ.
O--ah! Ta̍k-ê thiaⁿ-tio̍h, chi̍t bīn toā hoaⁿ-hí, chi̍t bīn teh chhoah, in-uī siūⁿ in bē kham-tit Lú-ông kàu in hia, in sī sàn-hiong ê chho͘-kang lâng, só͘-chāi iā m̄ chiâⁿ mi̍h. M̄-kú thiaⁿ liáu tāi-ke kín-kín pī-pān, ke-lō͘ sàu chheng-khì,chhah Eng-kî, chhòng chhêng-siâⁿ,chheng-kiat lāi-goā, ta̍k-ê lóng thêng-khùn, liân thó-hî chûn-á iā sé chheng-khì, bāng iā siu khí-lâi, sì-kè chhòng kàu chin léng-lī.
Keh chá-khí ta̍k-ê chá-chá khí-lâi chia̍h pn̄g, lóng chhēng suí saⁿ, gín-ná ê thâu-mn̂g iā se kàu kim-kim, kha iā chhēng ê, tāi-ke chin koai. Taⁿ m̄ chai téng-po͘ á sī ē-po͘ Lú-ông beh kàu, kan-ta piān-piān thèng-hāu beh ngiâ-chih i.Téng-po͘ tán kui po͘ lóng bô lâi, kàu tàu chiū chia̍h pn̄g. Chia̍h pn̄g ê sî ta̍k-ê teh kóng, Taⁿ ē-po͘ tek-khak ē lâi lah. Hit ē-po͘ iû-goân piān-piān teh chih-chiap in ê Lú-ông, gín-ná iā ná hoaⁿ-hí beh khoàⁿ. Í-keng kàu 4, 5tiám iáu-boē lâi, ta̍k-ê teh siūⁿ m̄ chai án-cháiⁿ-iūⁿ. Taⁿ í-keng 6 tiám beh àm, chha-put-to choa̍t-bāng, gín-ná long siān-siān, ta̍k-ê iā chiū iau, chiū chia̍h ê-hng-tǹg. Tāi-ke iā hoân-ló Lú-ông bô lâi, in-uī í-keng thiaⁿ beh lâi, chiū toā him-bō͘. Kàu 7 tiám chai bô ǹg-bāng, ta̍k-ê thǹg suí saⁿ, toā-lâng teh siūⁿ i káⁿ sī tú-tio̍h sím-mi̍h chó͘-tòng,gín-ná lio̍h-á siū-khì kóng, Lú-ông teh phiàn in.
Bîn-á-chài ta̍k kháu-chàu iû-goân chò kang, ta-po͘-lâng khì hái-ni̍h thó-hî,cha-bó͘-lâng hâ chho͘-chho͘ ê uî-sin-kûn teh thâi hî, gín-ná chhēng phoà saⁿ, tī ké-á-lō͘ teh thit-thô, bīn kap chhiú kiaⁿ-lâng, thâu iā bô chng suí. Hut-jiân ū bé-chhia ê siaⁿ khi̍h-khia̍uh-háu tī lō͘-ni̍h, ta̍k lâng kia̍h-thâu beh khoàⁿ sím-mi̍h lâng lâi. Gín-ná khoàⁿ suí-suí ê bé-chhia lâi, chiū toā siaⁿ kiò, “Sī Lú-ông lah! Sī Lú-ông lah!”
Taⁿ hāi lah! Lú-ông khoàⁿ-tio̍h lán chhēng phoà saⁿ, hâ pháiⁿ uî-sin-kûn,thâu-mn̂g làng-làng, chhiú bak-tio̍h chhàu-chhò, chin kiàn-siàu, chin bô lé,bô sò͘. Hāi lah! Hāi lah!
M̄-kú Lú-ông thêng-chhia lo̍h-lâi beh kā i ê peh-sìⁿ chhéng-an, beh khoàⁿ in ê kang, chiū sì-kè kiâⁿ kap hit só͘-chāi ê lâng kau-poê, iā ū hoāⁿ gín-ná ê thâu-khak, iā ū o-ló lāu-bú só͘ phō ê eⁿ-á suí. Ta-po͘-lâng tuì hái-kîⁿ kín-kín tńg-lâi, Lú-ông iā mn̄g ū thó loā-chē hî, iā beh bē loā-chē chîⁿ, chin hó-ì, chin chhin-chhiat. Khoàⁿ-khoàⁿ liáu, āu-lâi chiū koh chē bé-chhia tò-tńg-khì.
Taⁿ i tiâu-kò͘-ì bô chā-hng khì, i ê ì-sù chiū-sī beh tī pêng-siông sî khì thàm i ê peh-sìⁿ, ài khoàⁿ in ê kang, ài ē-hiáu thé-thiap in ê sàn-hiong, á-sī in chò kang ê kan-khó͘, ài kap i só͘ thiàⁿ ê peh-sìⁿ se̍k-sāi, ài i ê peh-sìⁿ khoán-thāi i chhin-chhiūⁿ pêng-iú, bô chhin-chhiūⁿ lâng-kheh.
Goá siūⁿ Siōng-tè chiū-sī lán ê Ông, I ia̍h beh án-ni. I m̄-nā ài lán kap I kau-poê tī lé-pài-tn̂g, á-sī tī chhù-ni̍h lé-pài. I koh khah ài, chiū-sī tī pêng-siông ji̍t lán teh chò kang ê sî-chūn ài chhoē lán, ài kap lán kau-poê, ài thé-thiap lán chò kang ê kan-khó͘, ài khoàⁿ lán ê chho͘-saⁿ, ài kap só͘ thiàⁿ ê peh-sìⁿ se̍k-sāi, ài tī bô phài-phoe ê sî-chūn lâi chhoē lán, ài lán tio̍h khoán-thāi I bô chhin-chhiūⁿ lâng-khah, ài lán khoán-thāi I chhin-chhiūⁿ pêng-iú. “Goá í-keng kiò lín chò pêng-iú”.
漢羅（Ùi原文改寫）
至好朋友
1921.10 439卷 p.8-9
(Lân Liân--氏Má-gio̍k記。)
有聽見一個故事teh講幾若10年前英國ê女王有去探蘇格蘭ê京城，離hit個城無偌遠，有小所在近tī海墘，人tī hia較濟是討海ê,真無閒，真mî-noā趁錢。忽然一日聽見女王明仔再beh去in hia看看。
O--ah！逐家聽著，一面大歡喜，一面teh chhoah ，因為想in bē 堪得女王到in hia，in 是散hiong ê粗工人，所在也m̄ 成物。M̄-kú聽了逐家緊緊備辦，街路掃清氣，插英旗，創chhêng-siâⁿ，清潔內外，逐個攏停睏，連討魚船仔也洗清氣，網也收起來，四界創到真伶俐。
隔早起逐個早早起來食飯，攏穿suí 衫，囡仔ê頭毛也梳到金金，腳也穿鞋，逐個真乖。今m̄ 知頂晡抑是下晡女王beh 到，kan-ta便便聽候beh 迎接伊。頂晡等歸晡攏無來，到晝就食飯，食飯ê時逐個teh講，今下晡的確會來啦！Hit下晡猶原便便teh接接in ê女王，囡仔也那歡喜beh 看。已經到4、5點iáu未來，逐個teh 想m̄ 知 án-cháiⁿ-iūⁿ；今已經6點beh 暗，差不多絕望，囡仔攏siān-siān,逐個也就枵，就食下昏頓，逐家也煩惱女王無來，因為已經聽beh 來，就大欣慕。到7點知無向望，逐個褪suí 衫，大人teh想伊敢是抵著甚物阻擋，囡仔略仔受氣講，女王 teh騙in。
明仔再逐口灶猶原做工，查甫人去海裡討魚，查某人hâ 粗粗ê圍身裙teh thâi 魚，囡仔穿破衫，tī街仔路 teh thit-thô ，面佮手驚人，頭也無妝suí。忽然有馬車ê聲khi̍h-khia̍uh 哮tī路ni̍h,逐人舉頭beh 看甚物人來，囡仔看suí-suí ê馬車來，就大聲叫，是女王啦！是女王啦！
今害啦！女王看著咱穿破衫，hâ 歹圍身裙，頭毛làng-làng ，手bak著臭臊，真見笑，真無禮無數，害啦！害啦！
M̄-kú女王停車落來beh kā 伊ê百姓請安，beh 看in ê工，就四界行佮hit所在ê人交陪。也有hoāⁿ囡仔ê頭殼，也有o-ló老母所抱ê嬰仔suí 。查甫人對海墘緊緊轉來，女王也問有討偌濟魚，也beh 賣偌濟錢，真好意，真親切；看看了，後來就koh坐馬車倒轉去。
今伊刁故意無昨昏去，伊ê意思就是beh tī平常時去探伊ê百姓，愛看in ê工，愛會曉體貼in ê 散hiong，抑是in 做工ê艱苦，愛佮伊所疼ê百姓熟悉，愛伊ê百姓款待伊親像朋友，無親像人客。
我想上帝就是咱ê王，伊亦beh án-ni。伊m̄-nā ài咱佮伊交陪tī禮拜堂，抑是tī厝裡禮拜，伊koh較愛，就是tī平常日咱teh 做工ê時陣愛chhoē咱，愛佮咱交陪，愛體貼咱做工ê艱苦，愛看咱ê粗衫，愛佮所疼ê百姓熟悉，愛tī無派批ê時陣來chhoē咱，愛咱著款待伊無親像人客，愛咱款待伊親像朋友。「我已經叫lín做朋友。」