PAK-PŌ͘ Sū-Bū:Kai Sian-siⁿ ê phoePermalink

文獻資訊Permalink

白話字（原文數位化）Permalink

Kai Sian-siⁿ ê phoe

1921.08 436 koàn p.5

Tām-chuí tiong Ha̍k-hāu lia̍t-uī seng-tô͘ pêng-an !

Tuì goán kap lín saⁿ lī-khui kàu chit-tia̍p, tī lō͘-tiong ū tit-tio̍h pêng-an. Chuí-lō͘ chin pîⁿ-tháⁿ. Sui-bóng tī toā-iûⁿ thiⁿ-khì put-chí léng, siông-siông ū lo̍h seh, iáu-kú hong-éng put-chí tiām-chēng.

Tuì Hoâiⁿ-pin kàu Ka-ná-tāi tah chûn 15 ji̍t kú, tī lō͘-tiong bô sím-mi̍h thang khoàⁿ, chí-ū kuí-nā bé keng-hî nā-tiāⁿ. Chi̍t ji̍t ū chi̍t bé put-chí toā bé, tāi-iok ū sì tn̄g tn̂g, phû oá tī chûn-ni̍h. I ê thâu-khak chha-put-to ū chi̍t tn̄g khoah.

Kàu Vanco͘ver, ū kàu-hoē kap pêng-iú lâi tán-chih goán. Goán tī hia 2 ji̍t kú, toà tī chá-nî thong sè-kài Marathon soán-chhiú ê lâng ê tau. Hit ê soán-chhiú sī miâ kiò Dick Grant. I soè-hàn ê sî nā tah hé-chhia, á-sī chē bé-chhia chiū hîn; só͘-í ko͘-put-chiong tio̍h liān-si̍p cháu. Tuì án-ni i chiâⁿ choè sè-kài ê soán-chhiú.

Lī-khui Vanco͘ver goán koh chē hé-chhia, keng-kè Lo̍k-ki soaⁿ lâi kàu chit ê só͘-chāi. Ka-ná-tāi ê hé-chhia put-chí toā tiuⁿ. Mî-sî ū pī-pān bîn-chhn̂g, ji̍t-sî ū chàu-kha thang hō͘ lâng chú-chia̍h. án-ni só͘-huì khah séng. Nā-sī tī chhia-lāi si̍t-tông chia̍h, ta̍k hāng chin kuì. Koe-nn̄g 1 lia̍p 4 kak gûn, keng-chio chi̍t koeh 6 kak gûn, kam-á chi̍t lia̍p 7 kak. Nā-sī tī chhia-lāi ū thih-chàu, ka-kī pī-pān chiū chin séng. Tī chhia-lāi goán ta̍k tǹg ū chú-pn̄g, put-chí lī-piān kap sim-sek. Pa̍t ê tah-kheh put-chí piàⁿ-sè, lóng sī ko-téng ê chóng-phò͘, chin gâu chú. Keng-kè Lo̍k-ki soaⁿ, kéng-tì kàu-ke̍k suí. Soaⁿ-téng lóng sī seh, soaⁿ-kha sī chhiū-nâ kap chhân-hn̂g. Nā-sī koân ê soaⁿ lóng sī chi̍t bān chhioh í-siōng. Lo̍k-ki soaⁿ kè liáu (2 ji̍t, 1 mî) chiū keng-kè chi̍t ê toā pîⁿ-iûⁿ. Chit ê só͘-chāi chhut be̍h kap gû, bé chin choē.

Hiān-chāi goán tiàm chit ê só͘-chāi sī tī chng-ni̍h, khah koân hái 1800 chhioh. Thiⁿ-khì tī chia put-chí léng; chā-hng kap kin-á-ji̍t ū lo̍h seh; chuí tī goā-bīn ū kian peng poàⁿ-chhùn kāu. Nā-sī lín tī Tâi-oân teh ia̍t-sìⁿ chin joa̍h. Tī chit chng-ni̍h só͘-chāi ê peh-sìⁿ put-chí khai-hoà kap bûn-bêng. Choh-sit lâng khah choē ka-kī ū chū-tōng-chhia. Chhù-lāi ke-ke hō͘-hō͘ iā ū tiān-oē. Téng lé-pài goán tī chi̍t keng chng-ni̍h ê kong-ha̍k-hāu choè lé-pài. Chú-lí lé-pài--ê, sī chi̍t ê choh-sit lâng; ji̍h-khîm--ê, sī tāi-ha̍k ê chut-gia̍p-seng. Ū 6 tiuⁿ chū-tōng-chhia kap 2 tiuⁿ bé-chhia chài chiah ê choh-sit lâng khì lé-pài. Chhia lóng sī in ka-kī ê.

Hiān-chāi goán toà ê só͘-chāi lī chit ê sió koe-chhī phò͘ poàⁿ lō͘. Chit ê koe-chhī chí-ū 700 lâng. iáu-kú só͘-chāi put-chí hoat-ta̍t. Ū 3 ê i-seng, 3 ê piān-hō͘-sū, 4 keng lé-pài-tn̂g, chi̍t keng lú-koán 3 chàn lâu, chi̍t keng sió-ha̍k-hāu, chi̍t keng tiong-ha̍k-hāu, iā chi̍t khám tiàm kap Hú-chêng-koe siōng toā khám-ê pîⁿ toā.

Chā-hng koe-ni̍h ê lâng ū chhiáⁿ goán khì ián-soat. Goá ū kóng-khí Tām-chuí Tiong Ha̍k-hāu ê sū hō͘ in thiaⁿ. In put-chí ài chai lán Tâi-oân ê tāi-chì.

Koh nn̄g lé-pài goán beh lī-khui chia khì To-lûn-to siâⁿ. To-lûn-to sī toā só͘-chāi ū 50 goā bān lâng. Tuì chia kàu hia, chē hé-chhia tio̍h 3 ji̍t kú. N`g-bāng tī hia tit-tio̍h hó ki-hoē thang pò in chai lán Tâi-oân ê siau-sit.

Chit tiuⁿ phoe kàu uī ê sî lín í-keng teh chhì-giām. Bāng lín tāi-ke sió-sim chiàu-kò͘ lín ê sin-thé. iā siông-siông tì-ì pó-siú lín ê phín-hēng. Goān lán ê Thiⁿ-pē ji̍t-ji̍t chiàu-kò͘ pì-iū lín.

Sūn pit chhéng-an.

Tāi-chèng 10 nî 5 ge̍h 12 hō

Kai Joē-liâm siá.

漢羅（Ùi原文改寫）Permalink

偕先生ê批

1921.08 436卷 p.5

淡水中學校列位生徒平安！

Tuì阮佮lín相離開到chit-tia̍p,tī路中有得著平安。水路真平坦。雖罔tī 大洋天氣不只冷，常常有落雪，iáu-kú風湧不只恬靜。

Tuì橫濱到加拿大搭船15日久，tī 路中無甚物thang看，只有幾若尾鯨魚nā-tiāⁿ。一日有一尾不只大尾，大約有4丈長，浮倚tī船--ni̍h。伊ê頭殼差不多有一丈闊。

到Vanco͘ver，有教會佮朋友來等接阮 。阮tī hia 2日久，toà tī早年通世界馬拉松選手ê人ê兜。Hit 個選手是名叫 Dick Grant。伊細漢ê時若搭火車，抑是坐馬車就眩；所以姑不chiong著練習走。Tuì án-ni伊成做世界ê 選手。

離開Vanco͘ver阮koh坐火車，經過洛磯山來到這ê所在。加拿大ê火車不只大張。暝時有備辦眠床，日時有灶腳thang hō͘人煮食。án-ni所費較省。若是tī車內食堂食，逐項真貴。雞卵 1粒4角銀、弓蕉一koe̍h 6角銀、甘--仔一粒7角。但是tī車內有鐵灶，家己備辦就真省。tī車內阮逐頓有煮飯，不只利便佮心適。別ê tah-kheh 不只拚勢，攏是高等ê總鋪，真gâu煮。經過洛磯山，景致夠極suí。山頂攏是雪，山腳是樹林佮田園。若是懸ê山攏是一萬尺以上。洛磯山過了（2日，1暝）就經過一個大平洋。這ê所在出麥佮牛、馬真濟。

現在阮tiàm這ê所在是tī庄--ni̍h,較懸海1800尺。天氣tī chia不只冷；昨昏佮今仔日有落雪；水tī外面有堅冰半寸厚。若是lint2?台灣teh ia̍t扇真熱。Tī這庄--ni̍h所在ê百姓不只開化佮文明。做穡人較濟家己有自動車。厝內家家戶戶也有電話。頂禮拜阮tī一間庄--ni̍h ê公學校做禮拜。主理禮拜--ê,是一個做穡人；ji̍h-琴--ê,是大學ê卒業生。有6張自動車佮2張馬車載chiah ê作穡人去禮拜。車攏是in家己--ê。

現在阮toà ê所在離這個小街市鋪半路。這ê街市只有700人。iáu-kú所在不止--a發達。有3 個醫生，3 個辯護士，4間禮拜堂，1間旅館3層樓，1間小學校，1間中學校，也一khám 店佮府前街上大khám ê平大。

昨昏街--ni̍h ê人有請阮去演說。我有講起淡水中學校ê事hō͘ in聽。In不只ài知咱台灣ê事誌。

Koh兩禮拜阮beh離開chia去多倫多城。多倫多是大所在有50外萬人。Tuì chia到hia，坐火車著3日久。向望tī hia得著好機會thang報in知咱台灣ê消息。

這張批到位ê時lín已經teh試驗。望lín大家小心照顧lín ê身體。也常常致意保守lín ê品行。願咱ê天父日日照顧庇佑lín。

順筆請安。

大正10年5月12號

偕睿廉寫。