陳所育ê小傳

Tân Só͘-io̍k ê Sió-toān

文獻資訊

項目	資料
作者	葉金木 Ia̍p Kim-bo̍k
卷期	台南府城教會報
卷期	第426卷
日期	1920/9
頁數	8

白話字（原文數位化）

Tân Só͘-io̍k ê Sió-toān

1920.09 426 koàn p.8

(Ia̍p Kim-bo̍k kì.)

Só͘-io̍k chiū-sī Chuí-tńg-kha ê kàu-hoē Tân Hîm Tiúⁿ-ló ê tē saⁿ kiáⁿ. I tuì soè-hàn chiū tit-tio̍h Chú-ji̍t-o̍h ê kà-sī, i tuì soè-hàn kàu taⁿ ū chin koai, hō͘ kàu-hoē lāi-goā lóng o-ló i; bô phah-sǹg tī téng-ge̍h 12 ji̍t chiū hō͘ Chú kéng-tiàu i lī-khui soè-kan, kin-nî 24 hè. Hàiⁿ ah! chin-chiàⁿ phah-sńg, sit-lo̍h chit ê hó kap ū lō͘-ēng ê chheng-liân-lâng. Tī 12 hō ē-po͘ tī pún-tn̂g choè bâi-chòng-sek. Lūn i ê choè lâng goá ài siá kuí hāng khó-chhú pâi-lia̍t tī ē-toé.

1.I ê sìn Chú. Ū siú tō-lí iàu-kín lé-pài.

2.I ê iú-hàu. Tuì oē thàn chîⁿ ê sî khí, chia̍h-chhēng chhìn-chhái, ta̍k ge̍h-ji̍t ū khek-liám chîⁿ hō͘ pē-bú choè ka-têng ê só͘-huì.

3.Thiàⁿ hiaⁿ-tī. Hiaⁿ-tī ū tú-tio̍h tāi-chì i chin hoaⁿ-hí pang-chān.

4.Chīn-tiong. I ū hō͘ kuí-nā lâng chhiàⁿ, ū Loē-tē lâng iā ū Pún-tó lâng, tāi-ke lóng chin tuì-tiōng i, chin thiàⁿ i, káⁿ sìn-iōng i.

5.Gâu thun-lún.

Goá siá kuí-jī ài hō͘ lâng o̍h i ê hó bô͘-iūⁿ lâi kui êng-kng tī Thiⁿ-pē.

漢羅（Ùi原文改寫）

陳所育ê小傳

1920.09 426卷 p.8

(葉金木記。)

所育就是水返腳ê教會陳欣長老ê第三子。伊對細漢就得著主日學ê 教示，伊對細漢到今有真乖，hō͘教會內外攏o-ló伊；無扑算tī頂月12日就hō͘主揀召伊離開世間，今年24 歲。Hàiⁿ--ah!真正扑損，失落這個好佮有路用ê青年人。Tī 12 號e晡tī本堂做埋葬式。論伊ê做人我ài寫幾項可取排列tī下底。

(1)伊ê信主。有守道理要緊禮拜。

(2)伊ê有孝。對會趁錢ê時起，食穿chhìn-chhái,逐月日有khek-liám錢hō͘父母做家庭ê所費。

(3)疼兄弟。兄弟有抵著事誌伊真歡喜幫贊。

(4)盡忠。伊有hō͘ 幾若人倩，有內地人也有本島人，逐家攏真對重--伊，真疼--伊敢信用--伊。

(5)Gâu吞忍。

我寫幾字ài hō͘人學伊ê好模樣來歸榮光tī天父。