洪Tek-sin小傳
Âng Tek-sin Sió-toān
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台南府城教會報 |
| 卷期 | 第425卷 |
| 日期 | 1920/8 |
| 頁數 | 4 |
白話字（原文數位化）
Âng Tek-sin Sió-toān
1920.08 425 koàn p.4
(Û-seng kì.)
Kun sī Hoan-oah kàu-hoē ê hoē-iú. Tī 11, 12 hoè ê sî , khì Sin-kiat-chng ê Sió-o̍h kap N̂g Chok-pang Sian-siⁿ tha̍k. Cha̍p-la̍k hoè ji̍p Tiong-o̍h; 20 hoè ji̍p Toā-o̍h; 24 hoè chut-gia̍p Sîn Ha̍k. Liáu-āu siū-phài toà Pak-káng, Kiâm-chuí-káng, Hōng-soaⁿ. Taⁿ koè-sin 29 hoè.
Chhit goe̍h 4 hō ê Chú-ji̍t tī Hōng-soaⁿ ko-seng chò Tiúⁿ-ló, iā koh bô loā-kú kiám-chhái ē chò bo̍k-su. Bô phah-sǹg 5 hō chá-khí 10 tiám khí koâⁿ-jia̍t; 6 hō chá-khí 8 tiám chiū koâⁿ kàu khàu. Tuì án-ni kū-nî ê kū hek-suí-jia̍t ê chèng koh khí. Pún-sin chiū liām kóng, “Sè-kan sī khó͘-hái, tio̍h tńg-lâi-khì khah tio̍h, goá ê sim í-keng piān.” Sian-siⁿ-niû ìn i kóng, “ Lí tńg-khì goná beh án-choáⁿ?” Kun bô ìn. āu-lâi chhiáⁿ Phêⁿ Chheng-iok I-su tiau-tī, chóng-sī Kun put-chí bô ài chia̍h io̍h, kóng, “M̄-bián i, bē hó lah.” Nā-sī in-uī hū-jîn lâng kap i-seng ê khó͘-khǹg, chiū bián-kióng chia̍h, kìⁿ chia̍h io̍h kìⁿ thò͘. Ta̍k ji̍t ná siong-tiōng, lō͘-boé tāi-siáu-piān kap chhuì lóng chhut hoeh. Pài-it khí chèng, pài-gō͘ mê oá 8 tiám chiū koè-sin. Pài-la̍k ē-po͘ 3 tiám chhut-chòng.
Kun pêng-seng ióng-kiāⁿ toā-hàn. Lāu-pē khiām-tn̂g neh-tō͘ thàn chîⁿ lâi hō͘ Kun tuì sè-hàn tha̍k kàu toā-hàn, ǹg-bāng Kun ji̍t-āu thang chò toā lō͘-ēng ê lâng. Tī chûn-nî Kun ê lāu-pē pia̍t-sè. Ke-lāi chí-ū chhun āu-bó kap chi̍t ê toā-chí kap chi̍t ê sió-moē; chóng-sī chí-moē lóng chò kheh, kè-bó kap sió-moē toà chò-hoé. Só͘-í Kun thang kóng í-keng bô liân-luī, kap loē-chō͘ thang choan-sim chò kang. iū-kiam Kun ê seng-khu, ha̍k-būn, tek-hēng, nî-hoè, seng-hoa̍t-kè lóng siong-tong. Koh keng-koè hit 3 uī kàu-hoē ê sêng-chek iā sī chha-put-to. Kun chit-tia̍p thang kóng sī tē-it toā thang oa̍h-tāng ê sî. M̄-kú Chú ê chí-ì sī lâng só͘ bē chhek-to̍k--tit. Taⁿ sè-kan ê sū Kun soah lah.
Hàiⁿ--ah! Lâng ê sìⁿ-miā chin bô tiāⁿ-tio̍h. Lám--ê sí, ióng--ê iā sí. Phí-jîn chiap-tio̍h Kun sí ê tiāu-pò, lia̍h-chò kún-chhiò, khì thàm-thiaⁿ kuí-nā uī sian-siⁿ, tāi-ke iā sī kóng, “ Káⁿ bô iáⁿ”. Goá chiū chē kip-hêng chhia khì khoàⁿ, soà ǹg-bāng beh kap Kun kóng-oē.
Hàiⁿ ah! hi̍t-ē kàu uī, thiaⁿ-kìⁿ Kun tâi liáu, sim bô m̄ toā gông-ngia̍h. Hoān-nā sio bat ê sian-siⁿ pêng-iú thiaⁿ-kìⁿ, iā bô m̄ án-ni. Koh Kun pêng-seng sī pêng-hô chú-gī ê lâng, só͘-í chē-chē lâng uī-tio̍h Kun toā pi-siong. Nā-sī si̍t-chāi só͘ thang pi-siong ê, chí-ū sī Kun ê uî-cho̍k nā-tiāⁿ. ǹg-bāng Thiⁿ-pē chiàu-kò͘ Kun ê hū-jîn lâng kap 2,3 ê sè-hàn ê cha-bó͘-kiáⁿ.
Nā lūn kàu Kun, sī m̄ bián thè i iu-būn, in-uī i ê sim pī-pān ū piān, si̍t-chāi tio̍h thè i kiong-hí. Taⁿ “Bô koh iau, chhuì-ta; ji̍t bē pha̍k, hoé bē sio-tio̍h. Siōng-tè chhit-khì i lóng-chóng ê ba̍k-sái.” Goá iā toā ǹg-bāng ē chhin-chhiūⁿ Kun pī-pān ū piān thang hù sí; kàu sî pêng-an kìⁿ Chú. Soà kap Kun tī chō-uī-ni̍h saⁿ-kap gîm “Ha-le-lu-iah. A-men.”
漢羅（Ùi原文改寫）
洪Tek-sin小傳
1920.08 425卷 p.4
(Û-seng記。)
君是Hoan-oah 教會ê會友。Tī 11、12歲ê時，去Sin-kiat庄ê小學佮黃Chok-pang先生讀。16歲入中學，20歲入大學，24歲卒業神學。了後受派toà北港、鹽水港、鳳山。今過身29歲。
七月4號ê主日tī鳳山高升做長老，也koh無偌久kiám-chhái會做牧師。無扑算5號早起10點起寒熱，6號早起8點就寒到哭。對án-ni舊年ê舊hek-suí 熱ê症koh 起。本身就唸講，「世間是苦海，著轉--來去較著，我ê心已經便。」先生娘應伊講，「你轉--去阮beh 按怎?」君無應。後--來請彭清約醫師調治，總--是君不止無ài食藥，講「m̄免醫，bē好--lah。」若是因為婦人人佮醫生ê苦勸，就勉強食，見食藥見吐。逐日那傷重，路尾大小便佮嘴攏出血。拜一起症，拜五暝倚8點就過身。拜六e晡3點出葬。
君平生勇健大漢。老父儉腸凹肚趁錢來hō͘君對細漢讀到大漢，ǹg望君日後thang做大路用ê人。Tī chûn--年君ê老父別世。家內只有偆後母佮1個大姊佮1個小妹，總--是姊妹攏做客，繼母佮小妹toà做夥。所以君thang 講已經無連累，佮內助thang專心做工。又兼君ê 身軀、學問、德行、年歲，生活計攏相當。Koh經過hit 3位教會ê成績也是差不多。君chit-tia̍p thang 講是第一大thang 活動ê時。M̄-kú主ê 旨意是人所bē chhek-to̍k--tit。今世間ê事君煞-- lah。
Hàiⁿ--ah! 人ê性命真無定著。Lám--ê死，勇--ê也死。鄙人接著君死ê兆報，掠做滾笑，去探聽幾若位先生，逐家也是講：「敢無影。」我就坐急行車去看，續ǹg望beh佮君講話。
Hàiⁿ--ah! 1下到位，聽見君埋了，心無m̄大憨ngia̍h。凡若相bat ê先生朋友聽見，也無m̄ án--ni。Koh 君平生是平和主義ê人，所以濟濟人為著君大悲傷。若是實在所通悲傷ê,只有是君遺作nā-tiāⁿ。ǹg望天父照顧君婦人人佮2、3個細漢ê查某子。
若論到君，是m̄免替伊憂悶，因為伊ê心備辦有便，實在著替伊恭喜。今「無koh枵、嘴焦；日bē曝，火bē燒著。上帝拭去伊攏總ê目屎。」我也大ǹg望會親像君備辦有便thang 赴死；到時平安見主。續佮君tī座位--nih 相佮吟「Ha-le-lu-iah。A-Men。」