王ê看護婦

Ông ê Khàn-hō͘-hū

文獻資訊

項目	資料
作者	文姑娘 Bûn ko-niû
卷期	台灣教會報
卷期	第399卷
日期	1918/6
頁數	11

白話字（原文數位化）

Ông ê Khàn-hō͘-hū

1918.06 399 koàn p.11-12

(Bûn Ko͘-niû kì.)

Lûn-tun sī thiⁿ-ē siāng tē-it toā ê kiaⁿ-siâⁿ, siâⁿ-lāi ê peh-sìⁿ ia̍h chám-jiân kan-khó͘ ê poè; só͘-í kok-ka chhut tuì lîn-bîn ê ì-sù ū siat kong i-īⁿ kuí-nā pah keng, thang lī-ek chhiⁿ-chhám ê lâng. Ta̍k keng pīⁿ-īⁿ iā ū khàn-hō͘-hū teh koán-kò͘. Koh lēng-goā ū í-keng chut-gia̍p ê khàn-hō͘-hū, tiàm hia piān-piān, chhut-chāi īⁿ-tiúⁿ phài i khì ū chîⁿ lâng in tau, lâi pang-chō͘ phoà-pīⁿ ê lâng.

Bó͘ ji̍t ū chi̍t ê khàn-hō͘-hū tò-tńg lâi kong i-īⁿ, seng-khu chin ià-siān, in-uī chi̍t lé-pài kú i mî--sî teh kò͘ pēⁿ lâng.

Tú chiah tò-lâi sim teh siūⁿ,”Taⁿ bô tāi-chì lah, goá beh sé-e̍k, āu-lâi chhut-chāi goá khì khùn kàu pá bîn.”Bô phah-sǹg īⁿ-tiúⁿ í-keng phài i chek-sî tio̍h liâm-piⁿ chhut siâⁿ-goā khì khah hn̄g ê só͘-chāi. Thiaⁿ-kìⁿ i ê siaⁿ teh kiò, sim chin ut-chut, put-kò m̄ káⁿ uî-keh, kàu i ê bīn-chêng hoán-tńg ná-chún ū hoaⁿ-hí ê khoán-sit. īⁿ-tiúⁿ kā i kóng, iáu ū poàⁿ tiám-cheng kú nā-tiāⁿ, tio̍h kín khì khoán hêng-lí piān, chiah ē hù la̍k tiám-poàⁿ hit pang ê hoé-chhia.

Kàu bó͘ só͘-chāi lí tio̍h chhoē bó͘-mi̍h bo̍k-su, in-uī sī beh kò͘ i ê hāu-siⁿ. Hit ê gín-ná chha-put-to káu hoè, ū jiám-tio̍h náu-chek-kin ê pīⁿ, tì-kàu tiāⁿ-tiāⁿ tó-teh lóng bē kiâⁿ.

Kóng-liáu khàn-hō͘-hū chiū khì pī-pān, kàu hoé-chhia-lāi, lâng chin siān ài khùn. Hoé-chhia beh thêng-khùn i hut-jiân chhíⁿ, chai taⁿ kàu uī lah! Koáⁿ-kín lo̍h chhia sì-koè khoàⁿ ū lâng lâi chih-chiap i á-bô, chóng--sī bô poàⁿ-ê, chiū hoat-lo̍h hêng-lí, chhiàⁿ chi̍t tiuⁿ bé-chhia chài i kàu hit ê bo̍k-su ê chhù.

Kàu uī chiū phah mn̂g liâm-piⁿ ū chi̍t ê lāu hū-jîn-lâng lâi khui, kiò i ji̍p khì chē, soà kā i kóng bo̍k-su-niû í-keng sí kuí-nā tang chí-ū lāu-pē kap ko͘-toaⁿ ê kiáⁿ, nn̄g lâng nā-tiāⁿ, ia̍h i pún-sin thè in teh liāu-lí ke-lāi ê sū.

Hêng-lí khoán ji̍p-lâi bêng-pe̍k, chiū khan i ji̍p chi̍t keng thiaⁿ, tī hia ū pī-pān ê-hng tǹg. Chia̍h-pá lâng khah sóng-khoài, taⁿ ài khì chhoē só͘ beh kò͘ ê gín-ná. Kàu lâu-téng, khàn-hō͘-hū chi̍t ē phah-mn̂g; lāi-bīn ê lâng bô thiaⁿ i ê kha-pō͘ siaⁿ, só͘-í khui mn̂g hit-tia̍p, in lóng bô oa̍t-thâu.

Tī pâng-lāi só͘ khoàⁿ-kìⁿ-ê, kàu chi̍t-sì-lâng m̄ ài bē-kì-tit. Hit ê gín-ná tó tī the-í, i ê thâu-khak oá lāu-pē ê heng-chêng, nn̄g ê chò-hoé saⁿ-kap tâm-lūn, ná chhin-chhiūⁿ put-chí saⁿ thiàⁿ-thàng ê khoán-sit. Kiáⁿ tú-hó teh mn̄g chi̍t kù kóng, A-pa, Ông bat kiâⁿ chhò á m̄-bat?

Lāu-pē ìn i kóng,”Goá sim-koaⁿ kiáⁿ ah, Ông toān-jiân m̄-bat chhò”.

Tú hit-sî in chai-iáⁿ ū lâng tī sin-piⁿ, bo̍k-su liâm-piⁿ khí-lâi chin hó lé chih-chiap i kóng,”Khàn-hō͘-sian lí lâi, lō͘-ni̍h ū lóng pêng-an bô?”Chek-sî chiū tuì i ê kiáⁿ kóng,”Lô-nî, che sī beh chiàu-kò͘ lí ê hó pêng-iú, taⁿ i lâi lah, lí khah ū phoāⁿ, bián-tit chhin-chhiūⁿ chêng ji̍t ka-tī chi̍t lâng nā-tiāⁿ.”

Lô-ni oa̍t koè-lâi khoàⁿ, ba̍k-chiu ia̍h kim-kim siòng i, chiū chhun chi̍t ki chin siau-sán ê chhiú chhut-lâi kóng,”Chin to-siā lí ê hó-ì, toā ǹg-bāng goá bô huì-sîn lí kàu siuⁿ koè-thâu.”

Khàn-hō͘-hū thiaⁿ hit kù, sim-koaⁿ ū siū toā kám-kek, chi̍t-ē kuī-lo̍h tī i ê sin-piⁿ, loa̍h i ê chhiú, soà ìn i kóng,”Lô-ni, goá iā teh ǹg-bāng lán ē saⁿ-thiàⁿ ná pêng-iú chi̍t-iūⁿ. Goá tio̍h chiū pún-hūn koán-kò͘ lí; goān só͘ ēng ê hong-hoat ē toā èng-hāu.”Gín-ná koh ìn kóng,”Goá chai lí sī Ông só͘ hōng-chhe-ê, án-ni goá tek-khak ē chin thiàⁿ lí.”

(āu-koàn beh koh ìn.)

漢羅（Ùi原文改寫）

王ê看護婦

1918.06 399卷 p.11-12

(文姑娘記。)

倫敦是天下上第一大 ê京城，城內 ê 百姓亦chám然艱苦 ê 輩；所以國家出tuì人民ê意思有設公醫院幾若百間，thang利益chhiⁿ慘 ê 人。逐間病院也有看護婦teh管顧。Koh另外有已經卒業ê 看護婦，tiàm hia 便便，出在院長派伊去有錢人in 兜，來幫助破病ê 人。

某日有一個看護婦倒轉來公醫院，身軀真厭siān,因為一禮拜久伊暝--時teh顧病人。

Tú才倒來心teh想︰「今無代誌lah，我beh 洗浴，後來出在我去睏到飽眠」。無扑算院長已經派伊即時著liâm-piⁿ 出城外去較遠ê 所在。聽見伊ê 聲teh叫，心真鬱卒，不過m̄ 敢違ke̍h,到伊ê 面前反轉那準有歡喜 ê 款式。院長kā伊講，iáu有半點鐘久nā-tiāⁿ，著緊去款行李便，才會赴6點半hit 班ê火車。

到某所在你著chhoē某mi̍h牧師，因為是beh 顧伊ê 後生。Hit個囡仔差不多9歲，有染著腦chek-kin ê 病，致到定定倒teh攏bē行。

講了看護婦就去備辦，到火車內，人真siān愛睏。火車beh 停睏伊忽然醒，知今到位lah﹗趕緊落車四界看有人來接接伊抑無，總--是無半個，就發落行李，倩一張馬車載伊到hit ê 牧師ê 厝。

到位就扑門liâm-piⁿ有一個老婦人人來開，叫伊入去坐，續kā伊講牧師娘已經死幾若冬只有老父kap 孤單ê子，二人nā -tiāⁿ，亦伊本身替in teh料理家內 ê 事。

行李款入來明白，就牽伊入一間廳，tī hia有備辦ê昏頓。食飽人較爽快，今ài去chhoē所beh顧ê 囡仔。到樓頂，看護婦一下扑門；內面 ê 人無聽伊ê 腳步聲，所以開門hit-tia̍p,in攏無越頭。

Tī 房內所看見ê,到一世人m̄ ài bē記tit。Hit個囡仔倒tī the椅，伊ê 頭殼倚老父 ê 胸前，兩個做伙相kap談論，那親像不止相疼痛ê 款式。子tú好teh問一句講，阿爸，王bat行錯抑m̄-bat？

老父應伊講︰「我心肝子ah，王斷然m̄-bat錯」。

Tú hit時in知影有人tī 身邊，牧師liâm-piⁿ 起來真好禮接接伊講︰「看護先你來，路ni̍h有攏平安無？」即時就tuì伊ê子講︰「Lô-ni， che是 beh照顧你ê好朋友，今伊來lah，你較有伴，免得親像前日家己一人nā-tiāⁿ」。

Lô-ni 越過來看，目珠亦金金相伊，就伸一支真消瘦ê 手出來講︰「真多謝你ê 好意，大向望我無費神你到siuⁿ過頭」。

看護婦聽hit句，心肝有受大感激，一下跪落 tī伊ê身邊，loa̍h伊ê 手，續應伊講：「Lô-ni，我也teh 向望咱會相疼若朋友一樣。我著就本份管顧你；願所用ê 方法會大應效。」囡仔koh應講︰「我知你是王所奉差--ê,án -ni 我的確會真疼你」。

(後卷beh koh印。)