柯安樂的小傳
Koa An-lo̍k ê Sió-toān
文獻資訊
| 項目 | 資料 |
|---|---|
| 作者 | 陳清義 Tân Chheng-gī |
| 卷期 | 台灣教會報 |
| 卷期 | 第397卷 |
| 日期 | 1918/4 |
| 頁數 | 5 |
白話字（原文數位化）
Koa An-lo̍k ê Sió-toān
1918.04 397 koàn p.5-6
(Tân Chheng-gī kì.)
Koa Bo̍k-su sī Toā-tiū-tiâⁿ Ē-gû-bō-chhia koe ê lâng. I iáu-bē chhut-sì ê sî i ê pē-bú í-keng sī pài Siōng-tè, sio̍k Toā-tiū-tiâⁿ ê kàu-hoē. I soè-hàn ê sî ū tha̍k kàu-hoē ê Gī-sio̍k. Kàu 1894 nî ū ji̍p Tām-suí Sîn-ha̍k-hāu. 1899 nî ū chut-gia̍p, chiū siū phài choè thoân-tō-su khì tiàm kuí-nā uī ê kàu-hoē, chiū sī Pat-lí-hun, ÎN-khut-á, Koe-lâng, Kî-lí-gān, Lâm-khàm, Toā-kho-hām; Pang-kiô, Saⁿ-kak-po͘. 1914 nî ū khó choè Kàu-su, tâng-nî 4 ge̍h 14 ji̍t ū siat-li̍p choè Saⁿ-kak-po͘ Tông-hoē ê Bo̍k-su. Put-hēng ū jiám-tio̍h kuí-nā khoán ê phoà-pīⁿ, chia̍h io̍h bô èng-hāu, chiū lâi ji̍p tī Má-kai i-īⁿ tī-liâu ia̍h bô chhái-kang. Pún-nî 2 ge̍h 17 ji̍t ē-po͘ 2 tiám poàⁿ cheng kè-óng, hióng-siū 42 hè. āu-lâi ū chiong sí-thé kng tńg-khì in chhù, kàu 19 ji̍t ē-po͘ 2 tiám poàⁿ cheng ū lâi Toā-tiū-tiâⁿ lé-pài-tn̂g chòng-sek. Gô͘ Bo̍k-su choè chú-lí, Siau Bo̍k-su kî-tó, Tân Bo̍k-su tha̍k Sèng-keng, Keh Bo̍k-su kóng lâi-le̍k, Gô͘ Bo̍k-su soat-kàu kap chiok-tó, lâi sàng-chòng ê lâm-lú kiōng ū 200 goā lâng.
Sàng-chòng ê hâng ngó͘ put-chí chhù-sū. Ta̍k lâng chin iu-būn, in-uī Koa Bo̍k-su it-seng ê choè lâng, put-chí tek jîn hô, i kàu ta̍k só͘-chāi thoân tō-lí ū chīn pún-hūn, m̄-nā kàu-hoē lāi ê lâng khim-kèng i, chiū kàu-hoē goā ê lâng iā o-ló i, só͘-í it-tàn thiaⁿ-kìⁿ i kè-óng ta̍k lâng chin siong-sim. I choè Chú ê kang thâu-bé 20 nî, choè thoân-tō-su 15 nî, choè Bo̍k-su oá 4 nî. Taⁿ i ê kang í-keng bêng-pe̍k, tit-tio̍h Chú ê kéng-tiàu, tńg-khì chó͘-ke. Si-ni̍h ū kóng:
“Ū thó͘-toē i ê kng iâⁿ ji̍t-tàu.
Nā chhim-sìn chiū oē khoàⁿ kàu chin bêng.
Lán ê Pē tiàm tī-hia teh thèng-hāu.
Ū pī-pān ke̍k an-lo̍k ê pâng-keng.”
Koa An-lo̍k Bo̍k-su í-keng khì kàu an-lo̍k ê pâng-keng. Lán ia̍h tio̍h ǹg-bāng āu-ji̍t ê an-lo̍k, oē saⁿ-kìⁿ tī êng-kng ê thian-kok, chiū-sī thang koh-chài kap Koa An-lo̍k Bo̍k-su saⁿ-kìⁿ, lâi tiàm tī an-lo̍k ê pâng-keng.
Hiān-sî Koa Bo̍k-su niû kap i ê kiáⁿ-jî iáu tiàm tī Saⁿ-kak-po͘ lé-pài-tn̂g, chhiáⁿ tāi-ke thoè i kî-tó, hō͘ i ê sim oē tit-tio̍h siū an-uì. I ê tiōng-hu An-lo̍k í-keng tit-tio̍h an-lo̍k ê pâng-keng, só͘-í m̄ biān kè-thâu iu-būn, tio̍h ǹg-bāng pa̍t ji̍t oē kàu an-lo̍k ê pâng-keng, lâi kap i ê tiōng-hu An-lo̍k saⁿ-kìⁿ, hióng-siū kú-tn̂g an-lo̍k ê hok-khì.
漢羅（Ùi原文改寫）
柯安樂ê小傳
1918.04 397卷 p.5-6
(陳清義記。)
柯牧師是大稻埕下牛磨車街ê人。伊iáu未出世ê時伊ê父母已經是拜上帝，屬大稻程ê教會。伊細漢ê時有讀教會ê義塾。到1894 年有入淡水神學校。1899年有卒業，就受派做傳道師去tiàm 幾若位ê 教會，就是八里岔，圓堀仔、雞籠、奇里岸、南崁、大嵙崁、枋橋、三角埔。1914年有考做教師，同年4 月14日有設立做三角埔同會ê牧師。不幸有染著幾若款ê破病，食藥無應效，就來入tī馬偕醫院治療亦無采工。不幸2月17日e 晡兩點半鐘過往，享壽42歲。後--來有將屍体扛轉去in厝，到19日e晡兩點半鐘有來大稻埕禮拜堂葬式。吳牧師做主理，蕭牧師祈禱，陳牧讀聖經，郭牧師講來歷，吳牧師說教kap祝禱，來送葬ê男女共有200外人。
送葬ê行伍不止次序。逐人真憂悶，因為柯牧師一生ê做人不止得人和，伊到逐所在傳道理有盡本份，m̄-nā教會內ê人欽敬伊，就教會外ê人也o-ló伊，所以一旦聽見伊過往逐人真傷心。伊做主ê工頭尾20年，做傳道師15年，做牧師倚4年。今伊ê 工已經明白，得著主ê揀召，轉去祖家。詩--ni̍h有講：
「有土地伊ê光贏日頭。
若深信就會看到真明。
咱ê父tiàm tī-hia teh 聽候。
有備辦極安樂ê房間。」
柯安樂牧師已經去到安樂ê房間。咱亦著向望後日ê安樂，會相見tī榮光ê天國，就是thang koh再kap柯安樂牧師相見，來tàim tī 安樂ê房間。
現時柯牧師娘kap伊ê子兒iáu tiàm tī三角埔禮拜堂，請逐家替伊祈禱，hō͘伊ê心會得著受安慰。伊ê丈夫安樂已經得著安樂ê房間，所以m̄免過頭憂悶，著向望別日會到安樂ê房間，來kap伊ê 丈夫安樂相見，享受久長安樂ê福氣。