論羅馬尼亞
Lūn Lô-má-nî-a
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會報 |
| 卷期 | 第380卷 |
| 日期 | 1916/11 |
| 頁數 | 8 |
白話字（原文數位化）
Lūn Lô-má-nî-a.
- 11, no. 380, pp. 8
Nn̄g goe̍h ji̍t chêng Lô-má-nî-a ū oá Liân-ha̍p-kun lâi chham-chiàn. Tek-kok chin kú ū kè-bô͘ ài Lô-má-nî-a oá Tek, Ò, nn̄g ê kok. Nā-sī Lô-má-nî-a ê koaⁿ put-chí gâu, bô hō͘ Tek-kok bê-he̍k. Hoán-tńg Lô-má-nî-a khoàⁿ Liân-ha̍p-kun ti̍t-ti̍t iâⁿ, chiū koat-tēng beh oá Liân-ha̍p-kun, kap Ò-kok, Pu̍t-gâ-lī, nn̄g kok sio-thâi.
Chiàu liû-thoân kóng Lô-má-nî-a ê lâng ê chó͘ chiū-sī kó͘-chá ê Lô-má lâng. Tāi-khài nn̄g chheng nî chêng, Lô-má-nî-a choè Lô-má ê si̍t-bîn-toē. Hit-tia̍p ū Lô-má ê lâng khì hit tè khai-khún. In ê hō͘-è ū-ê kàu chit-tia̍p ia̍h tī-teh, put-kò ia̍h ū pa̍t chéng-luī ê lâng saⁿ-chham.
Tē 15 sè-kí Thó͘-ní-kî ê lâng ū lâi phah Lô-má-nî-a ê toē, pō-gio̍k toē-hng ê peh-sìⁿ. Tuì hit-tia̍p khí sì-pah nî ê kú, Lô-má-nî-a ū hâng-ho̍k tī Thó͘-ní-kî koán, soà siông-siông chìn-kòng Thó͘-ní-kî. Tī Chú-āu 1877 nî, Lô-má-nî-a, Ngô͘-lô-su, nn̄g kok ū tông-bêng kap Thó͘-ní-kî sio-thâi. Thó͘-ní-kî thâi su. Tuì hit-tia̍p Lô-má-nî-a ū tit-tio̍h chū-iû, bô koh hâng-ho̍k Thó͘-ní-kî koán.
Lô-má-nî-a ê peh-sìⁿ tāi-khài ū chhit pah bān lâng. ia̍h ū sì pah bān Lô-má-nî-a chéng-luī ê lâng teh toà tī Ngô͘-lô-su kap Ò-kok só͘ koán ê toē, oá tī Lô-má-nî-a ê kok-kéng. Lô-má-nî-a ê peh-sìⁿ só͘ ǹg-bāng chiū-sī pa̍t ji̍t che sì pah bān lâng só͘ toà ê toē-hng oē kap Lô-má-nî-a liân-ha̍p choè chi̍t kok. M̄-kú nā beh án-ni chiū Ngô͘-lô-su kap Ò-kok tio̍h hun-koah in ê toē. Só͘-í chit pái Lô-má-nî-a chhut-la̍t kap Ò-kok sio-thâi sī ǹg-bāng Ò-kok oē thâi su, chiū put-tek-í tio̍h niū toē hō͘ Lô-má-nî-a. Koh ū teh ǹg-bāng nā chhut-la̍t pang-chān Ngô͘-lô-su chiū āu-lâi Ngô͘-lô-su ia̍h-sī oē kam-goān hun-koah toē hō͘ i. Tuì án-ni i ê kok-kéng oē khah khoah, i ê peh-sìⁿ oē khah choē.
Lô-má-nî-a ê lâng khah choē ū sìn Ki-tok. ia̍h ū Iû-thài kàu ê lâng kap Hoê-hoê-kàu ê lâng, chóng-sī khah chió. Peh-sìⁿ khah choē ū choh-sit. Lô-má-nî-a ū chhut be̍h chin choē, só͘-í Tek-kok ū chin iàu-kín ài phah-iâⁿ i, ǹg-bāng tuì án-ni oē tit-tio̍h bí-niû.
漢羅（Ùi原文改寫）
論羅馬尼亞。
1916.11，no.380，pp.8
兩月日前羅馬尼亞有倚聯合軍來參戰。德國真久有計謀愛羅馬尼亞倚德，奧，兩个國。若是羅馬尼亞的官不止gâu，無予德國迷惑。反轉羅馬尼亞看聯合軍直直贏，就決定欲倚聯合軍，佮奧國，Pu̍t-gâ-lī，兩國相刣。
照流傳講羅馬尼亞的人的祖就是古早的羅馬人。大概兩千年前，羅馬尼亞做羅馬的殖民地。彼霎有羅馬的人去彼塊開墾。In的後裔有的到這霎亦佇咧，不過亦有別種類的人相摻。
第15世紀土耳其的人有來拍羅馬尼亞的地，暴虐地方的百姓。對彼霎起四百年的久，羅馬尼亞有降服佇土耳其管，紲常常進貢土耳其。佇主後1877年，羅馬尼亞，俄羅斯，兩國有同盟佮土耳其相刣。土耳其刣輸。對彼霎羅馬尼亞有得著自由，無閣降服土耳其管。
羅馬尼亞的百姓大概有七百萬人。亦有四百萬羅馬尼亞種類的人咧蹛佇俄羅斯佮奧國所管的地，倚佇羅馬尼亞的國境。羅馬尼亞的百姓所向望就是別日這四百萬人所蹛的地方會佮羅馬尼亞聯合做一國。毋過若欲按呢就俄羅斯佮奧國著分割in的地。所以這擺羅馬尼亞出力佮奧國相刣是向望奧國會刣輸，就不得已著讓地予羅馬尼亞。閣有咧向望若出力幫贊俄羅斯就後來俄羅斯亦是會甘願分割地予伊。對按呢伊的國境會較闊，伊的百姓會較濟。
羅馬尼亞的人較濟有信基督。亦有猶太教的人佮回回教的人，總是較少。百姓較濟有作穡。羅馬尼亞有出麥真濟，所以德國有真要緊愛拍贏伊，向望對按呢會得著米糧。