台島消息
Tâi-tó Siau-sit
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會報 |
| 卷期 | 第380卷 |
| 日期 | 1916/11 |
| 頁數 | 11-12 |
白話字（原文數位化）
Tâi-tó Siau-sit.
- 11, no. 380, pp. 11-12
Hiàn kim tī ha̍k-hāu. Chit pang tī loē-tē ū chi̍t ê i-seng, sèⁿ iâm-kiàn miâ Chèng-chhù (chiū-sī Dr. M. Shiomi), I hiàn kim chi̍t pah bān kho͘, tsò i-ê bó-hāu siat Lí hoà ha̍k ê lō͘-ēng. Thiaⁿ-kìⁿ ê lâng, ta̍k ê toā siū kám-kek, toā chheng-tsàn.
Sian-siⁿ tī 17 nî chêng tuì Tāi-pán Ko-téng I-ha̍k-hāu (chiū-sī hiān-sî Tāi-pán I-kho Tāi-ha̍k) tsut-gia̍p. Kuí-nā nî-kú tsò i-seng chín-kiù chē-chē lâng, tuì án-ni ia̍h thàn chē-chē chîⁿ. āu-lâi chiong só͘ thàn ê chîⁿ khì hūn A-iân ê khòng-gia̍p hoē-siā, tuì án-ni koh khah hoat-ta̍t. Hiān-kim ke-sū oá saⁿ pah bān kho͘.
I siông-siông khoà-lū bó-hāu khiàm-khoeh só͘-huì thang siat Lí hoà ha̍k, kàu chit pang chiū sūn ki-hoē khóng-khài chiong i-ê tsâi-sán saⁿ-hūn hiàn chi̍t-hūn lâi tsò hit-khoáⁿ ê lō͘-ēng.
iâm-kiàn Sian-siⁿ kin-nî 39 hoè nā-tiāⁿ, tō ū chit hō kong-ek chiah toā ê chì-khì, chiū chiân-tô͘ ê chìn-pō͘ m̄ bián pok ia̍h ē tsai.
Taⁿ hoán-sim lâi siūⁿ lán Tâi-lâm Kàu-hoē ê Tiong-ha̍k-hāu só͘ keng-koè, ē-thang tit-tio̍h kin-á-ji̍t ê tē-pō͘, bô m̄ sī tuì lia̍t-uī tsu-kun ê siúⁿ-sù, chin-chiàⁿ tio̍h chhim-chhim kám-siā. Tiāu-tsa hiàn-kim ê miâ-phō͘, chiū tsai chin-chē lâng boē-bat sêng-siū chit keng Tiong-o̍h ê hun-tô, iáu-kú goān chhut hiah chē chîⁿ. Chiah ê lâng, thang kóng pí iâm-kiàn Sian-siⁿ ū khah-iâⁿ, bô khah-su. Hiàn-kim ê tiong-kan, ia̍h ū chē-chē lâng sī Tiong-ha̍k-hāu ê chhut-sin-chiá. án-ni thang kóng, sui-jiân bô tú-tú chhin-chhiūⁿ Sian-siⁿ ê só͘-tsò, iáu-kú i ê chì-khì sī chhin-chhiūⁿ sian-siⁿ.
Taⁿ ài koh thong-ti chi̍t kù, chiū-sī lán ê Tiong-o̍h hiān-sî m̄-nā bô ki-pún tsâi-sán, hoán-tńg ū khiàm lâng ê chîⁿ. án-ni kiám m̄-sī chin hoân-ló chin kiàn-siàu ê sū mah?
Kiám-chhái ū lâng boē tsai chit-ê tāi-chì. Kiám-chhái ū lâng í-keng tsai, put-kò boē chhut-thâu. Á-sī ū lâng teh siūⁿ, goá í-keng ū phah-sǹg, m̄-kú bô lâng chhut-thâu lâi kó͘-bú, goá ka-tī m̄-káⁿ hiòng-chiân. He̍k-sī ū lâng teh siūⁿ goá bô chhin-chhiūⁿ iâm-kiàn Sian-siⁿ hiah hó-gia̍h, hiah chhut-la̍t, saⁿ-hūn thiu chi̍t-hūn, só͘-í m̄-káⁿ kóng. Gû-kiàn, m̄-bián tek-khak án-ni, put-kò chiàu lán só͘ goān lâi ka-tī hiàn, piáu-bêng kì-liām bó-hāu, chiū-sī. Kiám-chhái ū lâng pún-sin m̄-bat ji̍p chit-keng Tiong-o̍h, iū-koh ia̍h bô teh ǹg-bāng in ê tsú-ti̍t beh ji̍p, tuì án-ni in bô teh siūⁿ beh hiàn-kim; chhiáⁿ ia̍h m̄-thang án-ni siūⁿ, tio̍h siūⁿ kàu-hoē sī tâng-thé, peh-sìⁿ sī tông-pau. Siat-sú Eng-kok sìn Tsú ê lâng nā chiàu án-ni siūⁿ, lán chha-put-to tio̍h tsoa̍t-bāng. Chit pang khí chit tsō Tiong-o̍h, Eng-kok sìn Tsú ê lâng tàu chhut chi̍t-poàⁿ. In kiám ū teh siūⁿ beh chhe in ê tsú-ti̍t lâi tha̍k mah?
Sūn-soà koh kóng chi̍t-kù, chiū-sī nā ū lâng í-keng ū-iok beh hiàn, chhiáⁿ iàu-kín siat-hoat kau-chheng, bián-tit Tiong-ha̍k-hāu ū khiàm lâng chîⁿ-hāng ê hoân-ló.
Se-lâi-am chhiong-kong. Kū-nî im-bô͘ ê sū-kiāⁿ, tsâu-hia̍t sī tī Tâi-lâm Se-lâi-am ê biō. Tuì hit tsân sū ū liân-luī Se-lâi-am ê pu̍t-siōng sio-lio-khì. Sui sī án-ne, iáu-kú bē-tit soah sai-boé, liân hit keng biō ia̍h tio̍h pān tsoē. Tī se-le̍k 9-goe̍h, hiah ê hoān-lâng lóng pān chheng-chhó; kàu 10-goe̍h, chiū koat-tēng Se-lâi-am tio̍h chhiong-kong tsò Tâi-lâm kong-koán ê lō͘-ēng. Taⁿ hit khí àn, thang kóng sī oân-moá kái-koat lah!
Bê-sìn ê boa̍t-lō͘. Ū chi̍t-lâng sèⁿ Tông, miâ Sim-pū, kin-nî 52 hoè. I tī 10 nî-chêng kui-i tsò hoê-siūⁿ, khì tiàm tī Ke-lâng Goe̍h-bâi-soaⁿ Lêng-choân-sī ê biō. I chin ài tha̍k Biāu-hoat Liân-hoa-keng, só͘-í phah-sǹg nā sio seng-khu hiàn hō͘ pu̍t, chiū ē sêng hu̍t, Kàu tī se-le̍k 10 goe̍h 20 hō, i kó-jiân chiàu án-ni kiâⁿ. I tāi-seng thia̍p chi̍t tui chhâ, soà lâm chio̍h-iû; āu-lâi chiū pún-sin chhēng ka-se soà lâm chio̍h-iû; lâm hó chiū pàng hoé, phak tī hoé-téng lâi sio sí. Ai ah! Chhám ah! Chin khó-lîn ah!! Bê-sìn ê lō͘ ê boé-liu chiū-sī án-ni!!!
漢羅（Ùi原文改寫）
台島消息。
1916.11，no.380，pp.11-12
獻金佇學校。這幫佇內地有一个醫生，姓塩見名政次(就是Dr. M. Shiomi)，伊獻金一百萬箍，做伊的母校設理化學的路用。聽見的人，逐个大受感激，大稱讚。
先生佇17年前對大阪高等醫學校(就是現時大阪醫科大學)卒業。幾若年久做醫生拯救濟濟人，對按呢亦趁濟濟錢。後來將所趁的錢去份亞鉛的礦業會社，對按呢閣較發達。現今家事倚三百萬箍。
伊常常掛慮母校欠缺所費通設理化學，到這幫就順機會慷慨將伊的財產三份獻一份來做彼款的路用。
塩見先生今年39歲nā-tiāⁿ，就有這號公益遮大的志氣，就前途的進步毋免卜亦會知。
今反心來想咱台南教會的中學校所經過，會通得著今仔日的地步，無毋是對-列位諸君的賞賜，真正著深深感謝。調查獻金的名簿，就知真濟人未捌承受這間中學的薰陶，猶過願出遐濟錢。遮的人，通講比塩見先生有較贏，無較輸。獻金的中間，亦有濟濟人是中學校的出身者。按呢通講，雖然無拄拄親像先生的所做，猶過伊的志氣是親像先生。
今愛閣通知一句，就是咱的中學現時毋若無基本財產，反轉有欠人的錢。按呢敢毋是真煩惱真見笑的事mah？
檢采有人未知這个代誌。檢采有人已經知，不過未出頭。抑是有人咧想，我已經有拍算，毋過無人出頭來鼓舞，我家己毋敢向前。或是有人咧想我無親像塩見先生遐好額，遐出力，三份抽一份，所以毋敢講。愚見，毋免的確按呢，不過照咱所願來家己獻，表明記念母校，就是。檢采有人本身毋捌入這間中學，又閣亦無咧向望in的子姪欲入，對按呢in無咧想欲獻金；請亦毋通按呢想，著想教會是同體，百姓是同胞。設使英國信主的人若照按呢想，咱差不多著絕望。這幫起這座中學，英國信主的人鬥出一半。In敢有咧想欲差in的子姪來讀mah？
順紲閣講一句，就是若有人已經預約欲獻，請要緊設法交清，免得中學校有欠人錢項的煩惱。
西來庵充公。舊年陰謀的事件，巢穴是佇台南西來庵的廟。對彼層事有連累西來庵的佛像燒lio去。雖是按呢，猶過袂得煞sai尾，連彼間廟亦著辦罪。佇西曆9月，遐的犯人攏辦清楚；到10月，就決定西來庵著充公做台南公館的路用。今彼起案，通講是完滿解決啦！
迷信的末路。有一人姓童，名Sim-pū，今年52歲。伊佇10年前歸依做和尚，去踮佇基隆月眉山靈泉寺的廟。伊真愛讀妙法蓮華經，所以拍算若燒身軀獻予佛，就會成佛，到佇西曆10月20號，伊果然照按呢行。伊代先疊一堆柴，紲淋石油；後來就本身穿袈裟紲淋石油；淋好就放火，仆佇火頂來燒死。Ai ah！慘啊！真可憐啊！！迷信的路的尾溜就是按呢！！！