財團法人

Châi-thoân Hoat-jîn

文獻資訊

項目	資料
作者	無lo̍h名
卷期	台灣教會報
卷期	第379卷
日期	1916/10
頁數	5

白話字（原文數位化）

Tsâi-thoân Hoat-jîn.

1. 10, no. 379, pp. 5

Tī 1913 nî 12 ge̍h 2 ji̍t pak-pō͘ ê Tiong-hoē ū tsū-chi̍p Lîm-sî-hoē lâi gí-tiāⁿ tio̍h siat tsâi-thoân hoat-jîn ê sū, tuì tsóng-tok ji̍p-pín, tsóng-sī tán chin kú lóng bē-tit thang hó-sè. Kàu kū-nî 10 ge̍h khí Thoân-tō-kio̍k ū chhiáⁿ Gâm-kî Sian-siⁿ tsoè Thoân-tō-kio̍k ê sio̍k-thok, lâi tàu pang-tsān só͘ ū kan-sia̍p tī chèng-hú hit hong-bīn ê sū. Tuì án-ni soà chiong chit ê tsâi-thoân hoat-jîn ê tāi-chì kau-tāi i lâi tàu siat-hoat. I put-chí chhut-la̍t lâi tàu pang-tsān. Kui-chek ū 20 tiâu, ia̍h ū kan-sia̍p tī lán kàu-hoē ê hiàn-hoat. Tāi-ke ū ēng put-chí tsoē-kang, taⁿ í-keng hó-sè lah. Ū tit-tio̍h Tsóng-tok ê ún-tsún, tī 7 ge̍h 5 ji̍t hú-khó í-keng chhut-lâi. Tâi-oân lâng tit-tio̍h tsâi-thoân hoat-jîn ê hú-khó, chit-ê sī thâu chi̍t-ê. Lán kàu-hoē ū chit ê tsâi-thoân hoat-jîn, chin thang hoaⁿ-hí, in-uī ū nn̄g hāng ê toā lō͘-ēng:

1. Hō͘ chèng-hú kap chèng lâng sêng-jīn lán ū thoân-thé ê tsū[sic.]-keh.

2. Pó-hō͘ kàu-hoē ê tsâi-sán. án-ni tek-khak chin toā iàu-kín.

Taⁿ lūn chit ê tsâi-thoân hoat-jîn ê bêng-chheng, kap Sū-bū-só͘, í-ki̍p Lí-sū ê sìⁿ-miâ, siá tī ē-toé:

1. Bêng-chheng, chiū-sī chheng tsoè “Tsâi-thoân hoat-jîn Pak-pō͘ Tâi-oân Ki-tok Tiúⁿ-ló Kàu-hoē”.

2. Sū-bū-só͘, chiū-sī tī Tâi-pak Báng-kah Poeh-kah-tsng 47 hoan-hō͘ (Lé-pài-tn̂g).

3. Lí-sū ê sìⁿ-miâ, chiū-sī Tân Chheng-gī, Koa Î-su, Keh Hi-sìn, Siau An-ki.

Tuì hú-khó chhut liáu-āu chiū suî-sî khui Lí-sū-hoē, ū kóng[sic.]-kú Tân Chheng-gī tsoè Lí-sū-tiúⁿ lâi pān-lí tsâi-thoân hoat-jîn ê sū-bū. Tuì án-ni ti̍t-ti̍t chìn-hêng siat-hoat teng-kì pài-tn̂g toē, í-keng ū 9 uī chheng-chhó; ǹg-bāng koh kuí-nā ge̍h ji̍t oē tit thang lóng chheng-chhó. Chhiáⁿ Pak-pō͘ koán-lāi ê kàu-hoē, nā ū pài-tn̂g ê jī-tsoá, iáu-bē kià lâi, tio̍h koáⁿ-kín kià lâi, goá oē siá ta̍k hāng piān-piān kià hō͘ lín teng-kì.

漢羅（Ùi原文改寫）

財團法人。

1916.10，no.379，pp.5

佇1913年12月2日北部的中會有聚集臨時會來擬定著設財團法人的事，對總督入稟，總是等真久攏袂得通好勢。到舊年10月起傳道局有請Gâm-kî先生做傳道局的囑託，來鬥幫贊所有干涉佇政府彼方面的事。對按呢紲將這个財團法人的代誌交代伊來鬥設法。伊不止出力來鬥幫贊。規則有20條，亦有干涉佇咱教會的憲法。大家有用不止濟工，今已經好勢啦。有得著總督的允准，佇7月5日許可已經出來。台灣人得著財團法人的許可，這个是頭一个。咱教會有這个財團法人，真通歡喜，因為有兩項的大路用：

1. 予政府佮眾人承認咱有團體的資格。

2. 保護教會的財產。按呢的確真大要緊。

今論這个財團法人的名稱，佮事務所，以及理事的姓名，寫佇下底：

1. 名稱，就是稱做 「財團法人北部台灣基督長老教會」。

2. 事務所，就是佇台北艋舺八甲庄47番戶(禮拜堂)。

3. 理事的姓名，就是陳清義，柯維思，郭希信，蕭安居。

對許可出了後就隨時開理事會，有公舉陳清義做理事長來辨理財團法人的事務。對按呢直直進行設法登記拜堂地，已經有9位清楚；向望閣幾若月日會得通攏清楚。請北部管內的教會，若有拜堂的字紙，猶未寄來，著趕緊寄來，我會寫逐項便便寄予恁登記。