除譴損
Tû Khiàn-sńg
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會報 |
| 卷期 | 第378卷 |
| 日期 | 1916/9 |
| 頁數 | 4 |
白話字（原文數位化）
Tû Khiàn-sńg.
- 9, no. 378, pp. 4
Tī Thài-pêng Iûⁿ chiū-sī Ji̍t-pún kàu Bí-kok chha-put-to poàⁿ-lō͘ ū kuí-nā ê hái-tó, kiò chò Pò͘-oa (Hawaii). Lóng-kiōng ū 15 ê hái-sū, chiông-tiong ū lâng khiā-khí--ê 8-ê. Kīn-lâi Tâi-oân choh-sit lâng só͘ chhah ê kái-liông-chià khah chē lóng tuì hia lâi. Tī 1898 nî Bí-kok chiàm hiah ê hái-sū liáu-āu chò Bí-kok ê sio̍k-tē, chóng-sī chá nî in ū ka-tī ê ông teh kai-koán.
Tī hiah ê hái-sū ê tiong-kan ū thiⁿ-ē bān kok tē it toā iáu teh chhut hoé ê hoé-soaⁿ. Hit ê hoé-soaⁿ kiò-chò Ki-láu-iâ. Peh-sìⁿ ū toā khiàn-sńg, phah-sǹg in só͘ ho̍k-sāi hit ê chhut-miâ ê lú-sîn Pi-lī, tiàm tī hoé-soaⁿ ê khang lāi. Hit ê hoé-soaⁿ, Ki-láu-iâ, kap lú-sîn, Pi-lī, sǹg sī chèng peh-sìⁿ siū pé-pa̍k toā khiàn-sńg e kin-goân.
Tī 19 sè-kí ê téng poàⁿ-hio̍h ū chi̍t ê lú-ông, miâ kiò Ka-pió-la-ni̍h, teh kai-koán hiah ê hái-sū. I goân-pún hō͘ khiàn-sńg toā pé-pa̍k, chia̍h-chiú í-ki̍p thàn ta̍k hāng ê pháiⁿ hong-sio̍k. Chha-put-to tī 1820 nî soan-kàu-su khì hia thoân Ki-tok ê Hok-im. Lú-ông thiaⁿ-liáu tō-lí, iā liáu-āu siông-siông toā chhut-la̍t beh hō͘ i ê peh-sìⁿ thoat-lī khiàn-sńg kap pháiⁿ hong-sio̍k.
I koat-toàn beh kong-kek in ê lú-sîn Pi-lī ê koân-pèng, chiū tī 1825 nî ū pō͘-kiâⁿ 25 phò͘ ê lō͘-tô͘ khì kàu hit ê chhut-miâ ê hoé-soaⁿ. Pêng-siông-sî lâng nā peh-chiūⁿ hit soaⁿ-téng si̍t-chāi thang toā kiaⁿ-hiâⁿ, in-uī chhut hoé, hoé-hun kap jiû-n̂g, só͘-í ū chiong tāu-á chò chè-mi̍h hiàn hō͘ lú-sîn, chiah ǹg-bāng bián siū hāi. M̄-kú Ka-pió-la-ni̍h koat-toàn m̄ hiàn lé-mi̍h, chóng-sī i lóng bô tāi-chì. Tuì án-ni-siⁿ hit ê hó-táⁿ jia̍t-sim sìn Chú ê lú-ông toā-toā pang-chān i ê peh-sìⁿ, thoat-lī Mô͘-kuí ê chhiú-thâu. Só͘-í in siông-siông teh siàu-liām i. Kàu 1841 nî i koè-sin tit-tio̍h chīn-tiong lú-tô͘ ê toā siúⁿ.
漢羅（Ùi原文改寫）
除譴損。
1916.9，no.378，pp.4
佇太平洋就是日本到美國差不多半路有幾若个海島，叫做Pò͘-oa (Hawaii)。攏共有15个海嶼，從中有人徛起--的8个。近來台灣作穡人所插的改良蔗較濟攏對遐來。佇1898年美國佔遐的海嶼了後做美國的屬地，總是早年in有家己的王咧該管。
佇遐的海嶼的中間有天下萬國第一大猶咧出火的火山。彼个火山叫做Ki-láu-iâ。百姓有大譴損，拍算in所服侍彼个出名的女神Pi-lī，tiàm佇火山的空內。彼个火山，Ki-láu-iâ，佮女神，Pi-lī，算是眾百姓受把縛大譴損e根源。
佇19世紀的頂半葉有一个女王，名叫Ka-pió-la-ni̍h，咧該管遐的海嶼。伊原本予譴損大把縛，食酒以及趁逐項的歹風俗。差不多佇1820年宣教師去遐傳基督的福音。女王聽了道理，也了後常常大出力欲予伊的百姓脫離譴損佮歹風俗。
伊決斷欲攻擊in的女神Pi-lī的權柄，就佇1825年有步行25舖的路途去到彼个出名的火山。平常時人若peh上彼山頂實在通大驚惶，因為出火，火薰佮琉磺，所以有將豆仔做祭物獻予女神，才向望免受害。毋過Ka-pió-la-ni̍h決斷毋獻禮物，總是伊攏無代誌。對按呢生彼个好膽熱心信主的女王大大幫贊伊的百姓，脫離魔鬼的手頭。所以in常常咧數念伊。到1841年伊過身得著盡忠旅途的大賞。