澎湖的消息
Phîⁿ-ô͘ ê siau-sit
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會報 |
| 卷期 | 第378卷 |
| 日期 | 1916/9 |
| 頁數 | 9-10 |
白話字（原文數位化）
Phîⁿ-ô͘ ê Siau-sit.
- 9, no. 378, pp. 9-10
Se-le̍k 6 goe̍h 29 ji̍t Toā-o̍h pàng-kè ê sî, goán ū nn̄g lâng saⁿ phoāⁿ koè khì Phîⁿ-ô͘. Lūn hit pêng kàu-hoē ê siau-sit, khiok sī pêng-siông. Lūn pò͘-tō ê siau-sit, khiok ū só͘-chāi chin hó ū só͘-chāi sī pêng-siông. Goán chit pang ū khì Tang-kiat, tī-hia ê ki-hoē chiàu khoàⁿ si̍t-chāi bē bái. Goán tī-hia thâu-boé 10 ji̍t kú, ta̍k mê-hng ū hó ki-hoē thang pò͘-tō. Pêng-kin chhé ta̍k mê-hng ū 70 goā lâi tì-ì thiaⁿ, put-chí chēng. Ji̍t sî ū kuí-nā ê hū-jîn-lâng tì-ì o̍h jī-bó. Si̍t-chāi hit tah ê lâng khah ū chong-kàu, sim ài káng-kiù kàu bêng-pe̍k. Tī-hia kam-goān khì-siâ kui-chèng ê lâng chha-put-to ū 20 goā lâng. In sui-jiân bô pài-tn̂g, iáu-kú ta̍k lé-pài lóng ū chū-chi̍p tī Lîm Chong-kun ê chhù. Goán tī-hia ê sî lé-pài-ji̍t oá 100 lâng chū-chi̍p, tāi-ke lóng tì-ì thiaⁿ chin chēng, si̍t-chāi chin thang hoaⁿ-hí.
iā kî-û ê só͘-chāi chhin-chhiūⁿ Sai-sū, Téng-soaⁿ, á-sī Má-keng, chit kuí-nā só͘-chāi sī in-uī khah chē lâng chhut-goā lâi Tâi-oân thàn-chia̍h, só͘-í khah bô siáⁿ lâng tiàm chhù. Tuì chit ê in-toaⁿ ki-hoē chiū khah pêng-siông. Kin-nî tī chit pêng hui-siông ê joa̍h; thiaⁿ-kìⁿ kóng kin-nî tú-tú poàⁿ-nî kú lóng bô hō͘-chuí: tuì chit ê in-toaⁿ chiah hiah joa̍h. Hit-tah só͘ chèng ê gō͘-kak, chiū-sī lō͘[sic.]-sé, hoan-chû, thô͘-tāu lóng hō͘ ji̍t pha̍k sí, bô siu poàⁿ lia̍p. Hiah ê lâng tuì án-ni chiū seng oa̍h chiūⁿ put-chí khùn-lân, ē thàn-chîⁿ ê lâng só͘-í koè lâi Tâi-oân thàn-chia̍h. Si̍t-chāi chin khó-lîn, toā ǹg-bāng lia̍t-uī khoàⁿ Pò chu-kun, kî-tó ê tiong-kan iā saⁿ siàu-liām tī-hia khiā-khí ê peh-sèⁿ sī sim só͘ goān.
Chan Chín-heng.
漢羅（Ùi原文改寫）
澎湖的消息。
- 9，no. 378，pp. 9-10
西曆6月29日大學放假的時，阮有兩人相伴過去澎湖。論彼爿教會的消息，卻是平常。論佈道的消息，卻有所在真好有所在是平常。阮這幫有去東吉，佇遐的機會照看實在袂bái。阮佇遐頭尾10日久，逐暝昏有好機會通佈道。平均扯逐暝昏有70外來致意聽，不止靜。日時有幾若个婦人人致意學字母。實在彼搭的人較有宗教，心愛講究到明白。佇遐甘願去邪歸正的人差不多有20外人。In雖然無拜堂，猶過逐禮拜攏有聚集佇林Chong-kun的厝。阮佇遐的時禮拜日倚100人聚集，大家攏致意聽真靜，實在真通歡喜。
也其餘的所在親像西嶼，頂山，抑是媽宮，這幾若所在是因為較濟人出外來台灣趁食，所以較無啥人踮厝。對這个因端機會就較平常。今年佇這爿非常的熱；聽見講今年拄拄半年久攏無雨水：對這个因端才遐熱。彼搭所種的五穀，就是蘆黍，蕃藷，塗豆攏予日曝死，無收半粒。遐的人對按呢就生活上不止困難，會趁錢的人所以過來台灣趁食。實在真可憐，大向望列位看報諸君，祈禱的中間也相數念佇遐徛起的百姓是心所願。
詹振興。