歐洲戰爭
Au-chiu Chiàn-chengPermalink
文獻資訊Permalink
| 項目 | 資料 |
|---|---|
| 作者 | 偕叡廉 Kai Jōe-liâm |
| 卷期 | 台灣教會報 |
| 卷期 | 第378卷 |
| 日期 | 1916/9 |
| 頁數 | 7 |
白話字（原文數位化）Permalink
Au-chiu Chiàn-cheng.
(Kai Joē-liâm kì).
- 9, no. 378, pp. 7
Au-chiu khai-chiàn kàu chit-tia̍p í-keng nn̄g nî kú. Hit sî Tek-kok kap Ò-kok tông-bêng, jiân-āu koh ke-thiⁿ nn̄g kok oá in, chiū-sī Thó͘-ní-kî kap Bu̍t-gâ-lī. Chit 4 kok toā chhut-la̍t lâi kong-kek Liân-ha̍p-kun. Tuì án-ni Hoat-kok, Pe̍k-ní-gī, Ngô͘-lô kap Sek-hui-a ê thó͘-toē hō͘ in chiàm put-chí tsoē. Khí-thâu Tek-kok kap Ò-kok ê peng-bé, í-ki̍p chhèng, phàu-chí chin chhiong-chiok, só͘-í in siông-siông iâⁿ. Kū-nî Ngô͘-lô toā sit pāi, hō͘ Tek-kok kap Ò-kok phah chin thiám. In oē su kàu án-ni sī in-uī chhèng-chí bô kàu-gia̍h. Hit sî ū lâng phah-sǹg Liân-ha̍p-kun tek-khak su. Tsóng-sī tī kin-nî ê tiong-kan Ngô͘-lô ê phàu-chí tuì Bí-kok, Eng-kok, Ji̍t-pún boé chin choē. Koh-tsài Eng-kok í-chêng peng chió, sī kuí tsa̍p bān nā-tiāⁿ, taⁿ í-keng chhau-liān kàu gō͘ pah bān piān-piān. Tuì án-ni Liân-ha̍p-kun ê khuì-la̍t chin toā ke-thiⁿ. Pún lán nā tha̍k sin-bûn khah siông lóng sī thiaⁿ Tek-kok teh phah Hoat-kok, Eng-kok, á-sī Ngô͘-lô. Taⁿ hoán-tńg chit kuí-ge̍h ji̍t sī Liân-ha̍p-kun teh phah Tek-kok, Ò-kok á-sī Thó͘-ní-kî. Tī tang pêng Ngô͘-lô toā tek-sèng, Ò-kok kap Tek-kok ê peng hō͘ i lia̍h 50 goā bān. Thó͘-toē koh hō͘ i chiàm. Chit pang Ò-kok ê khuì-la̍t chhin-chhiūⁿ teh-beh chīn lah! In m̄-nā tī tang-pêng hō͘ Ngô͘-lô phah hiah siong-tiōng, chiū tī sai-pêng in iā hō͘ Í-tāi-lī phah chin thiám. I tē-it ióng ê phàu-tâi soà hō͘ Í-tāi-lī chiàm-khì.
Eng-kok kap Hoat-kok iā toā iâⁿ, ti̍t-ti̍t teh chìn. Liân-ha̍p-kun chit-tia̍p tuì sì-uî teh phah, lóng bô thêng. Eng, Hoat, Ngô͘-lô, Í-tāi-lī chit pang phah liáu chin ū sè-bīn. Tuì chit sî í-āu chiàu khoàⁿ Liân-ha̍p-kun oē chiām-chiām iâⁿ. In-uī khai-chiàn ê sî Liân-ha̍p-kun peng-bé, chhèng kap phàu-chí khah chió, taⁿ khah tsoē, tsuí-chiàn khuì-la̍t ia̍h khah toā, kok iā khah pù. Kàu bé boē bián-tit khah-iâⁿ.
漢羅（Ùi原文改寫）Permalink
歐洲戰爭。
(偕叡廉記)。
1916.9，no.378，pp.7
歐洲開戰到這霎已經兩年久。彼時德國佮奧國同盟，然後閣加添兩國倚in，就是土耳其佮Bu̍t-gâ-lī。這4國大出力來攻擊聯合軍。對按呢法國，白耳義，俄羅佮Sek-hui-a的土地予in佔不止濟。起頭德國佮奧國的兵馬，以及銃，炮子真充足，所以in常常贏。舊年俄羅大失敗，予德國佮奧國拍真忝。In會輸到按呢是因為銃子無夠額。彼時有人拍算聯合軍的確輸。總是佇今年的中間俄羅的炮子對美國，英國，日本買真濟。閣再英國以前兵少，是幾十萬nā-tiāⁿ，今已經操練到五百萬便便。對按呢聯合軍的氣力真大加添。本咱若讀新聞較常攏是聽德國咧拍法國，英國，抑是俄羅。今反轉這幾月日是聯合軍咧拍德國，奧國抑是土耳其。佇東爿俄羅大得勝，奧國佮德國的兵予伊掠50外萬。土地閣予伊佔。這幫奧國的氣力親像咧欲盡啦！In毋但佇東爿予俄羅拍遐傷重，就佇西爿in也予以大利拍真忝。伊第一勇的砲台紲予以大利佔去。
英國佮法國也大贏，直直咧進。聯合軍這霎對四圍咧拍，攏無停。英，法，俄羅，以大利這幫拍了真有勢面。對這時以後照看聯合軍會漸漸贏。因為開戰的時聯合軍兵馬，銃佮炮子較少，今較濟，水戰氣力亦較大，國也較富。到尾未免得較贏。