論奧國
Lūn Ò-kok
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會報 |
| 卷期 | 第377卷 |
| 日期 | 1916/8 |
| 頁數 | 5 |
白話字（原文數位化）
Lūn Ò-kok
- 8, no. 377, pp. 5
Tī Au-lô-pa chiu chiah ê ū sè-le̍k ê kok Ò-kok tuì chin tsá sǹg put-chí iàu-kín ê kok. Khah tsá Ò-kok pí Tek-kok khah ū la̍t. Tī Tsú-āu 1866 nî Tek-kok ū kap Ò-kok sio-thâi. Tek-kok tāi-seng pī-pān sio-thâi ta̍k hāng chin kang-hu. Sio-thâi la̍k lé-pài ê kú chiū Tek-kok khah-iâⁿ, Ò-kok tio̍h hâng-ho̍k. Tuì hit-tia̍p kàu taⁿ Tek-kok pí Ò-kok khah ū la̍t.
Ò-kok ê peh-sìⁿ ū kuí-nā ê chéng-luī. Ū-ê Tek-kok chéng, ū-ê Ngô͘-lô-su chéng, ū-ê Í-tāi-lī chéng, ū-ê Sek-hui-a chéng, ia̍h ū pa̍t ê chéng-luī. Tuì án-ni Ò-kok siông-siông tú-tio̍h jiáu-loān ê sū, in-uī ū hiah tsoē ê chéng-luī; ū-ê siông-siông saⁿ oàn-tò͘. Tek-kok chéng-luī oàn-tò͘ Ngô͘-lô chéng-luī--ê, Í-tāi-lī chéng-luī oàn-tò͘ Tek-kok chéng-luī--ê téng-téng, tì-kàu hō͘ koaⁿ-hú chin oh-tit pān kok-ka ê sū. Ò-kok hiān-kim ê hông-tè í-keng ū chē-uī 68 nî ê kú. I chē-uī hiah kú, i ê peh-sìⁿ chin tsun-kèng i, khah kam-goān hâng-ho̍k. Kiaⁿ-liáu pa̍t ji̍t hông-tè nā sí, pa̍t ê hông-tè chiap-soà, chiū peh-sìⁿ khah m̄ kam-goān hâng-ho̍k, khah oē siⁿ-khí jiáu-loān.
Chit pái tī Au-lô-pa chiu toā sio-thâi hit ê goân-in sī Ò-kok kap Sek-hui-a m̄-hó. Ū chi̍t ê Sek-hui-a ê lâng thâi-sí Ò-kok ê hông-thài-tsú. Ò-kok in-uī chit ê tāi-chì ài chhap Sek-hui-a kok-ka ê sū, Sek-hui-a m̄ hâng-ho̍k, kóng i sī to̍k-li̍p ê kok, pa̍t kok boē sái-tit chhap i ê tāi-chì. Ò-kok chiū soan-chiàn kap i sio-thâi. Ò-kok hit-tia̍p kóng i bô ài chiàm Sek-hui-a ê toē. M̄-kú Ò-kok ài kiông-kiông chhap Sek-hui-a kok-ka ê sū, Sek-hui-a khoàⁿ tsoè chiàm in-ê toē ê thâu chi̍t pō͘. Só͘-í Sek-hui-a kiû Ngô͘-lô tio̍h lâi pó-hō͘. Ngô͘-lô chiū pī-pān tōng-oân ê peng, soà chhiáⁿ Ò-kok tio̍h khah khoan ê hoat-tō͘ pān Sek-hui-a. Hit-tia̍p Tek-kok ū chhap, kiò Ngô͘-lô m̄ thang pī-pān tōng-oân peng. Ngô͘-lô m̄ thàn i ê bēng-lēng, Tek-kok chiū soan-chiàn. Koh bô loā-kú Hoat-kok kap Eng-kok ū saⁿ-chham kap i kau-chiàn.
Ò-kok chit pái sio-thâi ū tú-tio̍h chin tsoē ê kan-khó͘. Tī tang-pêng Ngô͘-lô nn̄g pái ū chhim ji̍p i ê toē, hiān-sî Ngô͘-lô ná chìn, Ò-kok ná thè. Tī sai-pêng Í-tāi-lī ū chhim-ji̍p i ê toē, hiān-sî ia̍h sī ná teh chìn-chêng.
漢羅（Ùi原文改寫）
論奧國
1916.8，no.377，pp.5
佇歐羅巴洲遮的有勢力的國奧國對真早算不止要緊的國。較早奧國比德國較有力。佇主後1866年德國有佮奧國相刣。德國代先備辦相刣逐項真工夫。相刣六禮拜的久就德國較贏，奧國著降服。對彼霎到今德國比奧國較有力。
奧國的百姓有幾若个種類。有的德國種，有的俄羅斯種，有的以大利種，有的Sek-hui-a種，亦有別的種類。對按呢奧國常常拄著擾亂的事，因為有遐濟的種類；有的常常相怨妒。德國種類怨妒俄羅種類--的，以大利種類怨妒德國種類--的等等，致到予官府真僫得辦國家的事。奧國現今的皇帝已經有坐位68年的久。伊坐位遐久，伊的百姓真尊敬伊，較甘願降服。驚了別日皇帝若死，別的皇帝接紲，就百姓較毋甘願降服，較會生起擾亂。
這擺佇歐羅巴州大相刣彼个原因是奧國佮Sek-hui-a毋好。有一个Sek-hui-a的人刣死奧國的皇太子。奧國因為這个代誌愛插Sek-hui-a國家的事，Sek-hui-a毋降服，講伊是獨立的國，別國未使得插伊的代誌。奧國就宣戰佮伊相刣。奧國彼霎講伊無愛佔Sek-hui-a的地。毋過奧國愛強強插Sek-hui-a國家的事，Sek-hui-a看做佔in的地的頭一步。所以Sek-hui-a求俄羅著來保護。俄羅就備辦動員的兵，紲請奧國著較寬的法度辦Sek-hui-a。彼霎德國有插，叫俄羅毋通備辦動員兵。俄羅毋趁伊的命令，德國就宣戰。閣無偌久法國佮英國有相參佮伊交戰。
奧國這擺相刣有拄著真濟的艱苦。佇東爿俄羅兩擺有深入伊的地，現時俄羅那進，奧國那退。佇西爿以大利有深入伊的地，現時亦是那咧進前。