建築部
Kiàn-tio̍k-pō͘
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會報 |
| 卷期 | 第374卷 |
| 日期 | 1916/5 |
| 頁數 | 10-11 |
白話字（原文數位化）
Kiàn-tio̍k-pō͘.
- 5, no. 374, pp. 10-11
Hiaⁿ-tī--ah! Chit pang Tiong-hoē tī O͘-gû-lân ū gī-lūn chi̍t chân iàu-kín ê sū, chiū-sī beh siat chi̍t ê Kiàn-tio̍k-pō͘. In-uī hiān-sî kàu-hoē ná-kú ná khoah-toā; ta̍k nî siông-siông ū khí lé-pài-tn̂g, thoân-tō sian-siⁿ kap hiaⁿ-tī ta̍uh-ta̍uh chhut mn̂g tê-iân. Hiān-sî khiok bô sím-mi̍h chhò-gō͘ ê tāi-chì, put-kò kiaⁿ-liáu āu-lâi ná hūn-tsa̍p, soà siⁿ-chhut pē-pēng.
iū-koh lán kàu-hoē hiān-sî teh khí lé-pài-tn̂g, lóng sī hit só͘-chāi ê hiaⁿ-tī kap thoân-tō sian-siⁿ siông-siông siat-hoat, bô pa̍t lâng thang tàu phah-sǹg, tì-kàu siông-siông ū khí-liáu bô oē-seng, chhù-tat phah liáu m̄ hó khoàⁿ; á-sī ū sî hiaⁿ-tī ì-kiàn bô saⁿ-ha̍h, tuì án-ni ū sî siⁿ-khí m̄ hó ê kám-chêng. Á-sī ū sî bô chim-chiok phah-sǹg, bô liōng kàu-hoē ê khuì-la̍t, phì-lūn kàu-hoē ū 1000 gîn ê la̍t nā-tiāⁿ, tāi-ke chiū hàm-hàm khí 3000, tì-kàu khí-liáu chin lám, khai hiaⁿ-tī ê chîⁿ chin chē, m̄-bián chi̍t nn̄g nî ê tiong-kan lóng pháiⁿ liáu-liáu.
Téng-bīn só͘ kóng chiah ê hām-hāi m̄-sī sió-khoá, só͘-í tāi-ke chham-siông tio̍h siat chi̍t ê kiàn-tio̍k-pō͘ thang liāu-lí chit ê tāi-chì, bián-tit kàu-hoē siⁿ-khí chiah ê hūn-hūn cha̍p-cha̍p ê sū. Tiong-hoē chiū phài Sòng Tiong-kian, Boán Hiông-châi, Gô͘ Hi-êng lâi chò chit ê kiàn-tio̍k-pō͘ ê sū-bū-oân. Só͘-í goán taⁿ chham-siông hoān-nā beh khí lé-pài-tn̂g ê kàu-hoē tio̍h chiàu ē-té ê hoat-tō͘ lâi chò:-
-
Nā ū beh khí pài-tn̂g ê só͘-chāi, in tio̍h siá phoe lâi thong-ti chit ê kiàn-tio̍k-pō͘ hō͘ chit ê kiàn-tio̍k-pō͘ thang kap i tàu chham-siông pān-lí.
-
Koh nā beh khì goā kàu-hoē tê-iân iā tio̍h tāi-seng thong-ti chit ê kiàn-tio̍k-pō͘, hō͘ chit ê pō͘ sêng-jīn, jiân-āu chiah thang tī ta̍k kàu-hoē lâi tê. Nā ū lâng bô tit-tio̍h kiàn-tio̍k-pō͘ ê jī-iūⁿ, beh tī ta̍k ê kàu-hoē lâi tê-iân sī bē ēng-tit.
-
Nā ū lâng beh hō͘ kiàn-tio̍k-pō͘ sêng-jīn, i tio̍h tāi-seng pī-pān kàu chin hó-sè. Lé-pài-tn̂g tē siⁿ-chò sī sím-mi̍h khoán? Beh khí ê pài-tn̂g sī loā toā keng, tn̂g, khoah, koân, chhim sī loā-chē? Sī beh cheng soa-chio̍h á-sī bo̍k-chō? Á-sī thia̍p chng, á-sī thia̍p thô͘-kat? Só͘ kè-e̍k beh khai sī loā-chē? Pún-tông hoē-iú sī tê loā-chē? Siōng-khiàm sī loā-chē? Chiong téng-bīn chiah ê sū-chêng siông-sè oē-tô͘ siá bêng thong-ti kiàn-tio̍k-pō͘.
-
Nā ū hiaⁿ-tī ì-kiàn bô kap tióng-chip saⁿ-ha̍p--ê lóng thang chiong in só͘ phah-sǹg--ê, iû-goân oē-tô͘ siá bêng siông-sè lâi pín, goán chiū thang kap in tàu phah-sǹg siat-hoat liāu-lí.
-
Goán hiān-sî teh pī-pān chit khoán ê koan-iân phō͘ thang hō͘ chiah ê beh tê-iân ê lâng ēng. Chit hō iân-phō͘ nā ēng kàu pài-tn̂g khí hó tio̍h kià hêng kiàn-tio̍k-pō͘ thang pò-kò Tiong-hoē soà ìn-chiūⁿ Kàu-hoē-pò.
-
Tng teh khí lé-pài-tn̂g ê sî só͘ ū siu-ji̍p khai-chhut tio̍h lēng-goā siat siàu-phō͘, chim-chiok lâi kì, m̄ thang kap pêng-siông ê siàu-hāng saⁿ chham. Kàu khí hó ê sî tioh[sic.] chiong chit ê siàu-phō͘ kap téng-bīn ê iân-phō͘ chò hoé kià hō͘ kiàn-tio̍k-pō͘ thang tiāu-cha chhâ-khó.
Í-siōng só͘ kóng-ê ǹg-bāng lia̍t-uī chun-siú thang hō͘ Kàu-hoē khah ū chhù-sū. Kî-û ê oē kóng bē liáu, sūn pit kā lia̍t-uī hiaⁿ-ché chhéng-an.
Gô͘ Hi-êng,
Kiàn-tio̍k-pō͘ Lí-sū, Sòng Tiong-kian,
Boán Hiông-châi.
漢羅（Ùi原文改寫）
建築部。
1916.5，no.374，pp.10-11
兄弟--啊！這幫中會佇烏牛欄有議論一層要緊的事，就是欲設一个建築部。因為現時教會那久那闊大；逐年常常有起禮拜堂，傳道先生佮兄弟沓沓出門題捐。現時卻無甚物錯誤的代誌，不過驚了後來那混雜，紲生出弊病。
又閣咱教會現時咧起禮拜堂，攏是彼所在的兄弟佮傳道先生常常設法，無別人通鬥拍算，致到常常有起了無衛生，厝tat拍了毋好看；抑是有時兄弟意見無相合，對按呢有時生起毋好的感情。抑是有時無斟酌拍算，無量教會的氣力，譬論教會有1000銀的力nā-tiāⁿ，大家就譀譀起3000，致到起了真荏，開兄弟的錢真濟，毋免一兩年的中間攏歹了了。
頂面所講遮的陷害毋是小可，所以大家參詳著設一个建築部通料理這个代誌，免得教會生起遮的混混雜雜个事。中會就派宋忠堅，滿雄才，吳希榮來做這个建築部的事務員。所以阮今參詳凡若欲起禮拜堂的教會著照下底的法度來做：-
-
若有欲起拜堂的所在，in著寫批來通知這个建築部予這个建築部通佮伊鬥參詳辨理。
-
閣若欲去外教會題捐也著代先通知這个建築部，予這个部承認，然後才通佇逐教會來題，若有人無得著建築部的字樣，欲佇逐个教會來題捐是袂用得。
-
若有人欲予建築部承認，伊著代先備辦到真好勢。禮拜堂地生做是甚物款？欲起的拜堂是偌大間，長，闊，懸，深是偌濟？是欲舂砂石抑是木造？抑是疊磚，抑是疊塗kat？所計畫欲開是偌濟？本堂會友是題偌濟？上欠是偌濟？將頂面遮的事情詳細畫圖寫明通知建築部。
-
若有兄弟意見無佮長執相合--的攏通將in所拍算--的，猶原畫圖寫明詳細來秉，阮就通佮in鬥拍算設法料理。
-
阮現時咧備辦這款的捐捐簿通予遮的欲題捐的人用。這號捐簿若用到拜堂起好著寄還建築部通報告中會紲印上到會報。
-
當咧起禮拜堂的時所有收入開出著另外設數簿，斟酌來記，毋通佮平常的數項相摻。到起好的時著將這个數簿佮頂面的捐簿做伙寄予建築部通調查查考。
以上所講的向望列位遵守通予教會較有次序。其餘的話講袂了，順筆共列位兄姊請安。
吳希榮，
建築部理事，宋忠堅，
滿雄才。