台島消息

Tâi-tó Siau-sit

文獻資訊

項目	資料
作者	無lo̍h名
卷期	台灣教會報
卷期	第374卷
日期	1916/5
頁數	11-12

白話字（原文數位化）

Tâi-tó Siau-sit.

1. 5, no. 374, pp. 11-12

Iû-piān kui-chek. Iû-piān ê kui-kí khiok chē-chē lâng í-keng tsai; kiaⁿ-liáu iáu chin-chē lâng m̄ tsai, tì-kàu hoat-sìn ê lâng siū hoa̍t, á-sī siū-sìn ê lâng siū hoa̍t, án-ni chiū chin m̄ tú-hó. Hòng-kiam chit pang ū kái-chèng kuí-nā tiâu, só͘-í bô hiâm hok-cha̍p siá kuí-kù lâi pò boē tsai ê lâng. It-khài ê kui-kí chin chē oh siá, put-kò chiong lâng khoài hoān-tio̍h--ê kuí-nā hāng kì tī ē-té:-

(1) Sió-pau. Lâng nā ēng mi̍h pau kui-pau lâi kià, kiò-tsoè Sió-pau. Tio̍h tsai m̄ thang ēng phoe lâi pau tī sió-pau ê lāi-bīn. Nā ēng phoe pau tī sió-pau-lāi tsò-hoé kià, kū-té sī hoa̍t-kim 10 kho͘, taⁿ kái khah giâm, beh hoa̍t 200 kho͘ í-hā.

(2) Chhiat-chhiú. (Chiū-sī iû-phiò, iū miâ âng-á-thâu). Nā ēng liáu ê iû-phiò, koh-tsài thiah khí-lâi ēng; kū-té sī hoa̍t koaiⁿ-kaⁿ 5 nî, taⁿ kái khah giâm, beh hoa̍t koaiⁿ-kaⁿ 10 nî í-hā. Nā piàn-tsō iû-phiò--ê, sui-jiân só͘ piàn-tsō boē ēng, nā lia̍h-tio̍h chiū beh hoa̍t koaiⁿ-ka 2 nî í-hā kap hoa̍t-kim 100 kho͘ í-hā.

(3) Toan-su. (Chiū-sī ia̍p-su, iū-miâ ha-ga-khih). Nā ēng chiam-poàⁿ ê ha-ga-khih lâi siá phoe, phoe-phoê (chiū-sī piáu-bīn) kan-ta ē-sái-tit siá siū-sìn-jîn ê tsū-só͘ sìⁿ-miâ kap siá hoat-sìn-jîn tsū-só͘ sìⁿ-miâ nā-tiāⁿ: tī phoe phoê tek-khak m̄-thang siá oē (chiū-sī thong sìn). Nā siá oē chiū ē hoa̍t kim 6 chiam. Ū lâng tī ha-ga-khih ê lāi-bīn (chiū-sī thong-sìn hit bīn) siá-liáu m̄ hó, chiū ka chi̍t tiuⁿ choá kap ha-ga-khih pîⁿ-toā koh tah lo̍h-khì, koh tsài siá; án-ni iā hoa̍t kim 6 chiam. Ū lâng khoàⁿ-kìⁿ ha-ga-khih ê âng-á-thâu bô siau-ìn, chiū ka khí-lâi tsò iû-phiò ēng, án-ni ia̍h hoa̍t kim.

(4) Nā kià ē pāi-hoāi hong-sio̍k ê tô͘-oē, á-sī kià ē po̍k-hoat ê mi̍h, kū-té sī hoa̍t kim 50 kho͘ í-hā, taⁿ ké-oāⁿ beh hoa̍t kim 500 kho͘ í-hā.

Í-goā, chhin-chhiūⁿ ēng ìn-pán ìn-ê, siá-chin, phiau-pún ê luī, che kiò-tsò tē 4 chéng ê iû-piān. Beh kià tē 4 chéng ê iû-piān, tek-khak m̄-thang hong-ba̍t, muí 3 niú nā tah iû-phiò 2 chiam chiū ū. Khó-sioh ū lâng siá-phoe ia̍h ké-tsò tē 4 chéng-ê, che ia̍h ài hoa̍t kim. Koh ū chi̍t hāng lâng chin khoài sit-chhò, chiū-sī tē 1 chéng ê iû-piān (chiū-sī hong ê phoe), chē-chē lâng bô chim-chiok, he̍k-sī bô tah iû-phiò, he̍k-sī iû-phiò tah bô kàu-gia̍h, tì-kàu siū-sìn-jîn siū hoa̍t. án-ne si̍t-chāi toā pháiⁿ sè-bīn. Tio̍h ē kì-tit chit hō ū hong ê phoe, tsāi pún kok-lāi (á-sī pún kok tsāi goā-kok ū siat iû-piān-kio̍k ê só͘-tsāi), muí 4 chîⁿ tāng tio̍h tah iû-phiò 3 chiam. Nā beh kià khì goā-kok, muí-tiuⁿ 5 chîⁿ 3 hun tāng í-lāi, tio̍h tah iû-phiò chi̍t kak.

漢羅（Ùi原文改寫）

台島消息。

1916.5，no.374，pp.11-12

郵便規則。郵便的規矩卻濟濟人已經知；驚了猶真濟人毋知，致到發信的人受罰，抑是受信的人受罰，按呢就真毋拄好。況兼這幫有改正幾若條，所以無嫌複雜寫幾句來報未知的人。一概的規矩真濟僫寫，不過將人快患著--的幾若項記佇下底：-

(1)小包。人若用物包規包來寄，叫做小包。著知毋通用批來包佇小包的內面。若用批包佇小包內做伙寄，舊底是罰金10箍，今改較嚴，欲罰200箍以下。

(2)切手。(就是郵票，又名尪仔頭)。若用了的郵票，閣再拆起來用；舊底是罰關監5年，今改較嚴，欲罰關監10年以下。若變造郵票--的，雖然所變造未用，若掠著就欲罰關監2年以下佮罰金100箍以下。

(3) 端書。(就是葉書，又名ha-ga-khih)。若用chiam半的ha-ga-khih來寫批，批皮(就是表面)干焦會使得寫受信人的住所姓名佮寫發信人住所姓名nā-tiāⁿ：佇批皮的確毋通寫話(就是通信)。若寫會就會罰金6 chiam。有人佇ha-ga-khih的內面(就是通訊彼面)寫了毋好，就鉸一張紙佮ha-ga-khih平大閣貼落去，閣再寫；按呢也罰金6 chiam。有人看見ha-ga-khih的尪仔頭無銷印，就鉸起來做郵票用，按呢亦罰金。

(4)若寄會敗壞風俗的圖畫，抑是寄會爆發的物，舊底是罰金50箍以下，今改換欲罰金500箍以下。

以外，親像用印版印的，寫真，標本的類，這叫做第4種的郵便。欲寄第4種的郵便，的確毋通封密，每3兩若貼郵票2 chiam就有。可惜有人寫批亦改做第4種-的，這亦愛罰金。閣有一項人真快失錯，就是第1種的郵便 (就是封的批)，濟濟人無斟酌，或是無貼郵票，或是郵票貼無夠額，致到受信人受罰。按呢實在大歹勢面。著會記得這號有封的批，在本國內(抑是本國在外國有設郵便局的所在)，每4錢重著貼郵票3 chiam。若欲寄去外國，每張5錢3分重以內，著貼郵票一角。