冊房的告白

Chheh-pâng ê Kò-pe̍h

文獻資訊

項目	資料
作者	無lo̍h名
卷期	台灣教會報
卷期	第373卷
日期	1916/4
頁數	12

白話字（原文數位化）

Chheh-pâng ê Kò-pe̍h.

1. 4, no. 373, pp. 12

Taⁿ ū koh pān ióng-sim Sîn-si, pe̍h-oē-jī sè-pún--ê, 2000 pún lâi; nā ū lâng ài, tio̍h kià phoe lâi Chheh-pâng bé. Chóng-sī chit chūn ū lâng khiàm Chheh-pâng ê siàu; chhiáⁿ lín nā ū khiàm 5 kho͘ í-siōng ê siàu tio̍h tāi-seng kià gîn lâi hêng, goán chiah beh chiong sin ê si-chheh kià khì hō͘ lín. In-uī goán iā ū khiàm Ē-mn̂g ê Chheh-pâng saⁿ sì pah kho͘, bô chîⁿ thang hō͘ i, si̍t-chāi chin m̄ hó. Siat-sú lia̍t-uī nā chiong só͘ khiàm-ê kià lâi hō͘ goán, khiok ū kàu-gia̍h thang hêng in. Lēng-goā iā ū khiàm Siōng-hái ê Sèng-chheh-hoē, ha̍p-gia̍h tio̍h kín-kín kià khì hō͘ in. Che m̄-sī khǹg lâng tio̍h hó sim lâi tê, put-kò sī khǹg lâng tio̍h chīn pún-hūn lâi hêng-chè.

Koh chi̍t hāng. Ū nn̄g khoán ê pò, chiū-sī Siong-bū-kio̍k só͘ chhut ê Tong-hong Cha̍p-chì, kap Chìn-pō͘ Cha̍p-chì, chhut pò ê lâng ū thong-ti goán kóng beh bé lóng tio̍h chiân-kim. Chóng-sī beh hō͘ goán ta̍k pái thè lín kià, si̍t-chāi chin huì-khì; chhiáⁿ lín beh bé ê lâng pún-sin siat-hoat, tuì iû-piān kià gîn khì bé. Kî-û ê Pò, chhin-chhiūⁿ Sèng-hoē-pò, á-sī Tāi-tông-pò, goán hoaⁿ-hí iû-goân thè lín pān; in-uī chhut-pò ê lâng kam-goān seng kià, thèng-hāu goán chiong chèng lâng ê gîn chi̍p chò-hoé chiah kià khì.

Sin hoan-e̍k ê Sèng-chheh hiah ê pán lóng chù hó lah; ǹg-bāng āu-goe̍h ē thang tit-tio̍h. Thâu pái beh ìn 5000 pún chò Ē-mn̂g kap Tâi-oân ê lō͘-ēng.

Kīn-lâi uī-tio̍h Au-chiu ê kau-chiàn, choá-liāu ê kè lóng khí ka-poē; kiaⁿ liáu ta̍k iūⁿ ê Pò kap chheh iā tio̍h khí kè.

漢羅（Ùi原文改寫）

冊房的告白。

1. 4，no. 373，pp. 12

今有閣辦養心神詩，白話字細本-的，2000本來；若有人愛，著寄批來冊房買。總是這陣有人欠冊房的數；請恁若有欠5箍以上的數著代先寄銀來還，阮才欲將新的詩冊寄去予恁。因為阮也有欠廈門的冊房三四百箍，無錢通予伊，實在真毋好。設使列位若將所欠的寄來予阮，卻有夠額通還in。另外也有欠上海的聖冊會，合額著緊緊寄去予in。這毋是勸人著好心來題，不過是勸人著盡本份來還債。

閣一項。有兩款的報，就是商務局所出的東方雜誌，佮進步雜誌，出報的人有通知阮講欲買攏著前金。總是欲予阮逐擺替恁寄，實在真費氣；請恁欲買的人本身設法，對郵便寄銀去買。其餘的報，親像聖會報，抑是大同報，阮歡喜猶原替恁辦；因為出報的人甘願先寄，聽候阮將眾人的銀集做伙才寄去。

新翻譯的聖冊遐的版攏鑄好啦；向望後月會通得著。頭擺欲印5000本做廈門佮台灣的路用。

近來為著歐洲的交戰，紙料的價攏起加倍；驚了逐樣的報佮冊也著起價。