歐洲戰事
Au-chiu Chiàn-sū
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會報 |
| 卷期 | 第372卷 |
| 日期 | 1916/3 |
| 頁數 | 4 |
白話字（原文數位化）
Au-chiu Chiàn-sū.
- 3, no. 372, pp. 4
Tī chiaⁿ goe̍h boé Tek-kok ê poe-chûn kuí-nā chiah khì hàu[sic.] Eng-kok Loē-tē, tìm 200 goā lia̍p ê pho̍k[sic.]-lia̍t-tân, soà phah-sí 54 lâng, tio̍h-siong 67 ê, khah-chē lóng sī cha-bó͘ lâng kap gín-á. Iû-goân hit ji̍t poe-chûn iā kàu Hoat-hok[sic.] ê kiaⁿ-siâⁿ, Pa-lí. In teh poe tāi-khài ū 1,4000 chhioh koân, ū tìm pho̍k-lia̍t-tân, chi̍t-lia̍p chha-put-to 450 kin tāng, iā phah-sí chiâⁿ cha̍p lâng.
Chiaⁿ goe̍h 15 hō Tek-kok ê hái-chha̍t tī A-hui-lī-ka sai-pak pêng lia̍h-tio̍h chi̍t chiah Eng-kok siong chûn, hō-chò “Appam” soà sái kàu Bí-kok, Goân-pún ê chuí-siú kap lâng-kheh ū 300 lâng tī-teh, kàu Bí-kok kan-ta chhun 138 ê nā-tiāⁿ. Tek-kok hái-chha̍t kàu Bí-kok chiū kóng, hit chiah sī Tek-kok ê chiàn-chûn chiū eng-kai hō͘ Bí-kok koaiⁿ-teh, kàu kau-chiàn soah chiū hêng in. oá tī hit tah Tek-kok chûn lēng-goā phah-tîm chhit chiah siong chûn.
Tī 2 goe̍h 2 hō oá Eng-kok ê Pak-hái ū Eng-kok thó-hî ê hoé-chûn khoàⁿ tio̍h Tek-kok ê poe-chûn phû tī chuí-bīn. Tī chûn-téng ū chha-put-to 20 lâng teh khîⁿ hit chiah phah hāi ê poe-chûn. In kiû thó-hî--ê kiù miā, chóng-sī in m̄-káⁿ. Siat-sú kiù hiah chē Tek-kok lâng ji̍p chûn, kiaⁿ-liáu in beh bián-kióng in sái khì Tek-kok. Só͘-í thó-hî--ê koáⁿ-kín cháu khì Eng-kok pò hái kun thang khì kiù in. Hit chiah poe-chûn káⁿ-sī khì Eng-kok tìm hit hō pho̍k-lia̍t-tân, tò-tńg lâi ê sî ki-khì pháiⁿ-khì. Khó-sioh Tek-kok peng ū hiah-ni̍h pháiⁿ miâ-siaⁿ tì-kàu thó-hî--ê m̄ káⁿ khì kiù in.
Tek-kok kiû Pe̍k-ní-gī kok tio̍h saⁿ-hô. Ū ín beh chiong in ê thó͘-tē lóng hêng in, beh hō͘ in ê ông koh koán pún-kok iā beh poê chin-chē gîn, chóng-sī thó in ê po͘-thâu tio̍h kui Tek-kok. Kai-chài Pe̍k ní-gī m̄ thiaⁿ in só͘ kiû-ê kóng in koat-toàn beh kap Eng-kok chò-hoé phah Tek-kok kàu iâⁿ.
Hiān-sî Ngô͘-kok toā chhut-la̍t phah Ò-kok peng hō͘ in thè-khì. Eng-kok peng kap kun-chong ná chē, iū-koh Tek-kok khah bô chhun-niû thang chhī peh-sìⁿ tì-kàu chia̍h-mi̍h chin kuì, iā ná oh-tit chhoē lâng thang tng peng. Chiàu khoàⁿ Liân-ha̍p kok ê peng kap kun-chong ná chē, m̄ kú tuì-te̍k--ê ná chió.
Kau-chiàn ê khí-thâu hit sî Tek-kok chûn kuí-nā chiah cháu khì bih tī Lâm Bí-chiu kuí-nā ê Bîn-chú kok ê po͘-thâu. Chiàu bān kok kong hoat hiah ê chûn tio̍h tiàm hia thèng-hāu kau-chiàn soah chiah thang hêng Tek-kok. Chóng-sī chûn-chú tuì hiah ê po͘-thâu ê koaⁿ kóng in chûn ê ki-khì nā kú-kú bô tín-tāng kiaⁿ-liáu ê seⁿ-sian soà pháiⁿ-khì, chiū kiû chún in chi̍t nn̄g tiám cheng kú chhut káng sái-lâi sái-khì thang tî-hông ki-khì bián siū hāi. Koaⁿ khiok chún in só͘ kiû-ê, m̄-kú chhut káng-goā chiū suî-sî cháu lī. Taⁿ hit kuí-nā chiah cháu-khì ê chûn liōng-pit káⁿ beh phah tîm Liân-ha̍p kok ê siong-chûn.
漢羅（Ùi原文改寫）
歐洲戰事。
1916.3，no. 372，pp.4
佇正月尾德國的飛船幾若才去到英國內地，抌200外粒的爆裂彈，紲拍死54人，著傷67个，較濟攏是查某人佮囡仔。猶原彼日飛船也到法國的京城，Pa-lí。In咧杯大概有1,4000尺懸，有抌爆裂彈，一粒差不多450斤重，也拍死成十人。
正月15號德國的海賊佇亞非利加西北爿掠著一隻英國商船，號做「Appam」紲駛到米國，原本的水手佮人客有300人佇咧，到美國干焦賰138个nā-tiāⁿ。德國海賊到美國就講，彼隻是德國的戰船就應該予美國關咧，到交戰煞就還in。倚佇彼搭德國船另外拍沉七隻商船。
佇2月2號倚英國的北海有英國討魚的火船看著德國的飛船浮佇水面。佇船頂有差不多20人咧擒彼隻拍害的飛船。In求討魚--的救命，總是in毋敢。設使救遐濟德國人入船，驚了in欲勉強in駛去德國。所以討魚--的趕緊走去英國報海軍通去救in。彼隻飛船敢是去英國抌彼號爆裂彈，倒轉來的時機器歹去。可惜德國兵有遐爾歹名聲致到討魚--的毋敢去救in。
德國求白耳義國著相和。有允欲將in的土地攏還in，欲予in的王閣管本國也欲賠真濟銀，總是討in的埠頭著歸德國。佳哉白耳義毋聽in所求的講in決斷欲佮英國做伙拍德國到贏。
現時俄國大出力拍奧國兵予in退去。英國兵佮軍裝那濟，又閣德國較無賰糧通飼百姓致到食物真貴，也那僫得揣人通當兵。照看聯合國的兵佮軍裝那濟，毋久對敵--的那少。
交戰的起頭彼時德國船幾若隻走去覕佇南美洲幾若个民主國的埠頭。照萬國公法遐的船著踮遐聽候交戰煞才通還德國。總是船主對遐的埠頭的官講in船的機器若久久無振動驚了的生鉎紲歹去，就求准in一兩點鐘久出港駛來駛去通持防機器免受害。官卻准in所求的，毋過出港外就隨時走離。Taⁿ彼幾若隻走去的船諒必敢欲拍沉聯合國的商船。