捨生取義
Siá-seng Chhú-gī
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會報 |
| 卷期 | 第371卷 |
| 日期 | 1916/2 |
| 頁數 | 12 |
白話字（原文數位化）
Siá-seng Chhú-gī.
- 2, no. 371, pp. 12
Tong-iông Tong[sic.]-pán-pho Tiō Chú-liông kiù A-táu, hit-sî Lâu Pī kap Chô Chhò kau-chiàn, Lâu Pī thâi-su, i ê chiòng kap ke-koàn lóng sì-soàⁿ liáu-liáu. I ū chi̍t ê tāi-chiòng miâ kiò Tiō Chú-liông, tī pah-bān kun-tong[sic.] beh chhoē in ê chú-bó kap só[sic.] chú-lâng, jiok kàu Tông-pán-pho ê lâm-pêng, chiah khoàⁿ-kìⁿ hu-jîn phō A-táu tī chi̍t ê phoà chhiûⁿ-á ē chéⁿ-noâ-téng teh chē, ba̍k-sái sì-lâm-suî. Chú-liông siūⁿ-khì Lâu Pī to̍k-to̍k chi̍t ê kiáⁿ nā-tiāⁿ, nā bô kiù i chiū Hàn-tiâu soà choa̍t-sû, chiū koáⁿ-kín chhiáⁿ Bí Hu-jîn chiūⁿ bé, thang saⁿ-kap tô-miā. Hu-jîn kóng, Goá sí sī bô iàu-kín, chóng-sī in lāu-pē chí-ū chi̍t ê kiáⁿ nā-tiāⁿ, choan-choan oá-khò chiong-kun pó-hō͘ i, m̄-thang in-uī goá lâi liân-luī lí. Kóng-liáu chiū chiong A-táu pa̍k toà seng-khu--ni̍h phoe sèⁿ-miā phah chhut bān-têng-uî, chiong A-táu lâi hêng Lâu Pī. āu-lâi tī Se-sio̍k chiap-uī chò hông-tè. Che si̍t-chāi sī choan khò Chú-liông ê ióng-béng.
Lán tha̍k chi̍t khoán ê kò͘-tián, siūⁿ khí Bí Hu-jîn pàng-sak sèⁿ-miā, Chú-liông phoe-miā kau-chiàn, án-ni lâi kiù A-táu, sī in-uī A-táu ê sí oa̍h chiū-sī koan-hē Hàn-tiâu ê chûn bông, só͘-í khoàⁿ chò bô kè ê pó-poè; pàng-sak sìⁿ-miā lâi kiù i, chiàu lí-khì khiok eng-kai tio̍h án-ni.
Taⁿ sè-kan lâng só͘ pó-poè--ê chiū-sī sìⁿ-miā, nā-sī iáu ū pí sìⁿ-miā koh khah iàu-kín--ê, chiū-sī bē sí-sit, bē bia̍t-bô ê lêng-hûn. Ki-tok kàng-lîm lâi sè-kan, pàng-sak sìⁿ-miā tī Si̍p-jī-kè, che tiâu[sic.]-ì-kò͘ sī beh lâi kiù sè-kan lâng ê lêng-hûn. Sèng-keng ū kóng Jîn-chú kàu, sī beh kiù sit-lo̍h ê lâng (Thài. 18:11).
漢羅（Ùi原文改寫）
捨身取義。
1916.2 no.371 pp.12
當陽長阪坡趙子龍救阿斗，彼時劉備佮曹操交戰，劉備划輸，伊的將佮家眷攏四散了了。伊有一个大將名叫趙子龍，佇百萬軍中欲揣in的主母佮小主人，逐到長阪坡的南爿，才看見夫人抱阿斗佇一个破牆仔下井欄頂咧坐，目屎四淋垂。子龍想去劉備獨獨一个囝nā-tiāⁿ，若無救伊就漢朝紲絕嗣，就趕緊請糜夫人上馬，通相佮逃命。夫人講，我死是無要緊，總是in老爸只有一个囝nā-tiāⁿ，專專倚靠將軍保護伊，毋通因為我來連累你。講了就將阿斗縛蹛身軀--裡phoe性命拍出萬重圍，將阿斗來還劉備。後來佇西蜀接位做皇帝。這實在是專靠子龍的勇猛。
咱讀一款的故典，想起糜夫人放捒性命，子龍phoe命交戰，按呢來救阿斗，是因為阿斗的死活就是關係漢朝的存亡，所以看最無價的寶貝；放捒性命來救伊，照理氣卻應該著按呢。
Taⁿ世間人所寶貝--的就是性命，若是猶有比性命閣較要緊--的，就是袂死失，袂滅無的靈魂。基督降臨來世間，放捒性命佇十字架，這刁意故是欲來救世間人的靈魂。聖經有講人子到，是欲救失落的人(太。18：11)。