Kiaⁿ-to͘ Tāi-tián ê Chōng-hóngPermalink

文獻資訊Permalink

白話字（原文數位化）Permalink

Kiaⁿ-to͘ Tāi-tián ê Tsōng-hóng

1916.01 370 koàn p.7

(Tân Chheng-gī.)

Chit pang goá ū kap goá ê hū-jîn- lâng khì Kiaⁿ-to͘, tī hia ge̍h goā ji̍t kú, sūn ki-hoē ū khoàⁿ Tāi-tián ê lāu-jia̍t. Tī 11 ge̍h 7 hō Thian-hông pè-hā ū kàu Kiaⁿ-to͘. Kiaⁿ-to͘-chhī ū chún-pī chin-choē lâi hoan-gêng. Ū chhòng toā hoan-gêng-mn̂g tī Thêng-chhia-tiûⁿ. Koe-lō͘ ê siang-pêng ū kat hoe-khoân, bān-soè kî kap tiān-teng, iā piàⁿ-sàu chin chheng-khì. Tuì Thêng-chhia-tiûⁿ khì kàu Hông-kiong, hit tiâu koe-lō͘ siang-pêng ū chē 25,0000 lâng, ia̍h ū chhòng uī-só͘ tī tiàm-lāi hō͘ lâng chē teh boē lâng, chi̍t uī 2 kho͘, ia̍h ū chi̍t- kho͘-poàⁿ. Hit ji̍t chin-chiàⁿ sī lāu-jia̍t.

Ū ê tuì chin-hn̄g lâi. Kiaⁿ-to͘-hú ū chhut bēng-lēng kóng, Thian-hông pè- hā iáu-boē kàu-uī ê í-chêng 6 tiám- cheng kú, koe-lō͘ ê thong-hêng beh kìm-chí. Tuì án-ni thiⁿ bē kng chiū khì koe-lō͘-piⁿ chē. Thian-hông pè-hā 2 tiám kàu Thêng-chhia-tiûⁿ, hit-tia̍p ū pàng 101 mn̂g ê toā-phàu, kap pûn ga̍k-tuī. Tuì Thêng-chhia-tiûⁿ khí-sin kàu Hông-kiong ê pâi-lia̍t. 1. Kiaⁿ-to͘- hú ê kèng-sī bé-tuī. 2. Kūn-oē khî- peng-tuī. 3. Hiân-só͘ gū-ú-chhia. 4. Chiáng-tián ê bé-tuī. 5.Sek-pō͘ koaⁿ ê bé-chhia. 6. Kiong-lāi chhù-koaⁿ kap Tāi-lé sài-tiúⁿ-koaⁿ ê bé-chhia. 7. Kiong- lāi tāi-sîn ê bé-chhia kap khî-peng Thian-hông-kî. 8. Kūn-oē chiòng-hāu bé-tuī. 9. Sèng-siōng ê bé-chhia, Sī- chiông-tiúⁿ poê-sèng. 10. Chú bé thâu kap tē 16 Su-thoân-tiúⁿ ê bé. 11. Tāi- lé sài chóng-chhâi, kap Hông-cho̍k ê bé- chhia. 12. Sī-chiông bú-koaⁿ ê bé- chhia. 13. Loē-koh chóng-lí tāi-sîn ê bé-chhia. 14. Sī-i pì-su-koaⁿ, Sù-ki- koaⁿ ê bé-chhia. 16. Kiaⁿ-to͘-hú ê kèng-sī bé-tuī.

Í-siōng ê pâi-lia̍t chin-chiàⁿ sī hó- khoàⁿ. Ta̍k lâng khoàⁿ chin hiān, chèng peh-sìⁿ chin hoaⁿ-hí. Ta̍k ê-hng ū thê- teng hêng-lia̍t tī koe-lō͘ kap Hông- kiong-goā hoah bān-soè. Tiān-chhia ia̍h ū kat hoe chiok-hō. Kàu 10 hō ū chē- uī-sek, hit-ji̍t ia̍h chin lāu-jia̍t. Ē-po͘ sî 3 tiám poàⁿ choân-chhī ê peh-sìⁿ ū hioh 3 hun kú, hoah bān-soè, ia̍h pûn chuí-lê, pàng toā-chhèng. Hoah bān- soè ê siaⁿ hō͘ choân-chhī tín-tāng.

Cha̍p-it hō téng-po͘ 10 tiám cheng, choân kok ê Ki-tok kàu-hoē ū chū-chi̍p tī Tông-chì-siā ê hāu-tiâⁿ, kú-hêng Gū- tāi-tián hōng-hō-sek. Kok phài ê kàu- hoē ū phài tāi-piáu lâi hù-hoē. Chí-ū Tâi-oân ê kàu-hoē bô phài lâng khì nā- tiāⁿ. Hit ji̍t goán ia̍h ū khì hù hoē, lóng-chóng ū chheng goā lâng. Tông- chì-siā ê hāu-tiúⁿ choè Su-hoē-chiá. Sūn chit-ê ki-hoē, choân kok ê Ki-tok kàu- hoē ū khui toā ián-soat-hoē tī phok- lám-hoē ê mn̂g-kháu. Ta̍k ji̍t ū ián- soat 3 pái. Ū tiâu-chhoân koh chhut- miâ ê bo̍k-su lâi ián-soat. Hū-jîn Kiáu- hong-hoē ia̍h ū chhòng chiap-thāi-só͘ tī hoē-tiûⁿ-piⁿ teh chiap-thāi lâng-kheh, chhòng tê hō͘ lâng lim. ia̍h ū ìn 30,0000 pún ê pò͘-tō chheh teh *sàng lâng, sī choân-kok chhut-miâ ê bo̍k-su só͘ choè ê lūn. ia̍h ū chū-chi̍p sìn-tô͘ ê tāi-hoē tī Chheng-liân-hoē-koán, chhiáⁿ put-chí choē uī chhut-miâ lâng lâi ián-soat. Tāi- ke put-chí oa̍h-tāng. Lūn chit pang Tāi-tián ê lāu-jia̍t, thiaⁿ-kìⁿ kóng, tuì ū Ji̍t-pún kok kàu taⁿ, iáu-boē bat án- ni. Thian-hông pè-hā kap chhin-ông kok tāi-sîn, í-ki̍p kok kok ê kong-sài tiàm tī Kiaⁿ-to͘ 20 ji̍t kú. Tī hia ia̍h ū khui kok-hoē kuí-nā pái. Kàu 27 ji̍t chiū tńg-khì Tang-kiaⁿ. ǹg-bāng āu-koàn oē siá lūn pa̍t hāng.

漢羅（Ùi原文改寫）Permalink

京都大典ê狀況

1916.01 370卷 p.7

(陳清義)

這pang我有kap我ê 婦人人去京都，tī hia月外日久，順機會有看大典ê鬧熱。Tī 11月7號天皇陛下有到京都。京都市有準備真濟來歡迎。有創大歡迎門tī 停車場。街路ê雙爿有結花環，萬歲旗kap電燈，也拚掃真清氣。Tuì停車場去到皇宮，hit條街路雙爿有坐25, 0000人，亦有創位所tī 店內hō͘ 人坐teh賣--人，一位2箍， 亦有一箍半。Hit日真正是鬧熱。

有ê tuì真遠來。京都府有出命令講：「天皇陛下iáu-bē到位ê以前6點鐘久，街路ê通行beh禁止。Tuì án-ni天未光就去街路邊坐。天皇陛下2點到停車場，hit-tia̍p 有放101門ê大炮，kap歕樂隊。Tuì停車場起身到皇宮ê排列。1. 京都府ê警視馬隊。2. 郡衛騎兵隊。3. 賢所御寓車。4. 掌典ê馬隊。5. 式部官ê馬車。6. 宮內次官kap大禮使長官ê馬車。7. 宮內大臣ê馬車kap騎兵天皇旗。8. 近衛將校馬隊。9. 聖上ê馬車，侍從長陪聖。10. 主馬頭合第16師團長ê馬。11. 大禮使總裁，kap皇族ê馬車。12. 侍從武官ê馬車。13. 內閣總理大臣ê馬車。14. 侍醫祕書官，駟車官ê馬車。16. 京都府ê警視馬隊。

以上ê排列真正是好看。逐人看真現，眾百姓真歡喜。逐下昏有提燈行列tī 街路kap皇宮外喝萬歲。電車亦有結花祝賀。到10號有坐位式，hit日亦真鬧熱。下晡時3點半全市ê百姓有歇3分久，喝萬歲，亦歕水螺，放大銃。喝萬歲ê聲hō͘ 全市振動。

11號頂晡10點鐘，全國ê基督教會有聚集tī 同志社ê校埕，舉行御大典奉賀式。各派ê教會有派代表來赴會。只有台灣ê教會無派人去nā-tiāⁿ。Hit日阮亦有去赴會，攏總有千外人。同志社ê校長做司會者。順這個機會，全國ê基督教會有開大演說會tī 博覽會ê門口。逐日有演說3擺。有tiâu-chhoân koh出名ê牧師來演說。婦人矯風會亦有創接待所tī會場邊teh接待人客，創茶hō͘ 人lim。亦有印30, 0000本ê佈道冊teh送--人，是全國出名ê牧師所做ê論。亦有聚集信徒ê大會tī 青年會館，請不止濟位出名人來演說。大家不止活動。論這pang大典ê鬧熱，聽見講，tuì有日本國到今，iáu 未bat án-ni。天皇陛下kap親王各大臣，以及各國ê公使tiàm-tī 京都20日久。Tī hia亦有開國會幾若擺。到27日就轉去東京。向望後卷會寫論別項。