新中學
Sin Tiong-o̍h
文獻資訊
| 項目 | 資料 |
|---|---|
| 作者 | 顏振聲 Gân Chín-seng |
| 卷期 | 台灣教會報 |
| 卷期 | 第368卷 |
| 日期 | 1915/11 |
| 頁數 | 8-9 |
白話字（原文數位化）
Sin Tiong-o̍h.
(Tē saⁿ kî).
- 11, no. 368, pp. 8-9
Chêng goe̍h tē jī-kî ū pò-kò kóng-khí kong-sek teh tio̍k-chhiú, kî-û kàu-sek siok-sià iā lio̍k-sio̍k khí-hó; taⁿ kàu chit-sî kong-sek í-keng khí kàu kap lâu-kông pêⁿ; kàu-sek, siok-sià teh tiuⁿ kek mn̂g thang, thian-lô-pán, lâu-pang lóng chhòng hó, kan-ta teh boah-piah kap ēng kòng-ku-lí pho͘ thô͘-kha nā-tiāⁿ; nā-sī kàu-sek chiū lóng chiâu-pī, chí-ū thèng-hāu í-toh kap ha̍k-seng jî-í.
Siok-sià chêng-bīn nî-chîⁿ-téng chò chi̍t-ê chuí-cha̍h, tiong-ng pī-pān chi̍t-ê pián-tē ēng ha̍k-hāu ê kì-hō kap siá Tang-ha̍k-liâu, Sai-ha̍k-liâu ê bêng-chheng, hō͘ lâng chi̍t-ē khoàⁿ liâm-piⁿ chiū chai. e̍k-keng kap piān-só͘ í-keng khí-hó, kî-û chàu-kha kap sai-pêng ê piān-só͘ taⁿ-chiah teh khui tē-ki, iā ū chhiàⁿ iû-chhat sai-hū lâi seng phah-té, hó thang iû-chhat.
Chiàu khoàⁿ téng-bīn só͘ kóng, si̍t-chāi cha̍p hūn ū peh-hūn ê sêng-kong, ǹg-bāng tē-sì kî chiū-sī beh pò oân-kang ê siau-sit, chin-chiàⁿ thang kám-siā Siōng-tè; m̄-kú chi̍t bīn ài kā hó-sim ê chàn-sêng-chiá thong-ti, in-uī kong-sū nā beh oân-kang chiū chêng kā lâng bé mi̍h khah chē iā sī kàu-kî, só͘-í chîⁿ-hāng chin khiàm. Tē-jī kî èng kau--ê iáu-boē loā-chē, ǹg-bāng hó-sim chàn-sêng-chiá chiū kín kau-la̍p, chiah ē hō͘ chit-keng o̍h oân-choân. Goán chiah ê chài-saⁿ tì-ì, ǹg-bāng lín hoaⁿ-hí kau chheng-chhó, sī goán só͘ toā-toā kā lín seh to-siā.
(Gân Chín-seng kì).
漢羅（Ùi原文改寫）
新中學。
(第三期)。
1915.11，no.368，pp.8-9
前月第二期有報告講起公室teh著手，其餘教室宿舍也陸續起好；taⁿ到這時公室已經起到佮樓kông平；教室，宿舍teh張kek門通，天羅板，樓枋攏創好，kan-ta teh抹壁佮用kòng-ku-lí鋪塗跤nā-tiāⁿ；若是教室就攏齊備，只有聽候椅桌佮學生而已。
宿舍前面簷前頂做一个水cha̍h，中央備辦一个pián-tē用學校的記號佮寫東學寮，西學寮的名稱，予人一下看連鞭就知。浴間佮便所已經起好，其餘灶腳佮西爿的 便所taⁿ才teh開地基，也有倩油漆師傅來先拍底，好通油漆。
照看頂面所講，實在十份有八份的成功，向望第四期就是欲報完工的消息，真正通感謝上帝；毋kú一面愛共好心的贊成者通知，因為公事若欲完工就前共人買物較濟也是到期，所以錢項真欠。第二期應交--的猶未偌濟，向望好心贊成者就緊交納，才會予這間學完全。阮chiah的再三致意，向望恁歡喜交清楚，是阮所大大共恁說多謝。
(顏振聲記)。