澎湖的消息
Phêⁿ-ô͘ ê Siau-sit
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會報 |
| 卷期 | 第366卷 |
| 日期 | 1915/9 |
| 頁數 | 9 |
白話字（原文數位化）
Phêⁿ-ô͘ ê Siau-sit.
(Lí Hok-khèng kì).
- 9, no. 366, pp. 9
Tī 7 goe̍h 19 hō, gû-jîn khì Peh-tàu thoân tō-lí. Kīn-ji̍t tī Hoe-the̍h-hiuⁿ ū ke-thiⁿ chi̍t hō͘ 6 lâng lâi sìn Chú, keng-koè 5 lé-pài kú, tuì sìn liáu-āu chiū chiong ngó͘-siōng it-khài sàu-tû khì, chin thang kám-siā Siōng-tè. Jī-gō͘ hō tī Peh-tàu lé-pài bô loā-chē lâng, sī in-uī chē-chē lâng koè-khì Tâi-oân.
Jī-cha̍p-la̍k hō chē phâng-chûn khì Tang-kiat, tī-hia ū chi̍t ê hiaⁿ-tī miâ Lîm Chong, kū-nî ài chhiáⁿ goá khì thoân tō-lí; nā-sī kàu Chuí-oaⁿ chûn-chiah put-piān. Chit pang kàu-uī chin hoaⁿ-hí, chhin-chhiūⁿ hûn poa̍h-lo̍h-goe̍h, í lé siong thāi. I sìn Chú ê goân-in sī chêng-nî chhoā i ê chek khì Sin-lâu i bak7-chiu, soà tit-tio̍h tō-lí, tńg-lâi chiū chip-siú tō-lí, chiū khó͘-khǹg ke-lāi tio̍h pài Siōng-tè, tû ngó͘-siōng, cha̍p-saⁿ lâng tāi-seng ū thiaⁿ i khó͘-khǹg, chiū chiong pu̍t tû-khì, ēng cha̍p-tiâu-kài tiàu-teh; nā-sī chhàu-tú-khám i ê chek ba̍k-chiu-thiàⁿ kóng sī kong-má tek koè-chek. Chong-hiaⁿ ê hū-jîn-lâng chêng ū chò ang-î, suî-sî chiūⁿ-sin kóng sī pu̍t bô hoaⁿ-hí, in chek chiū chiong cha̍p-tiâu-kài kap si-chheh lóng thiah-khì lâi sio, sio-liáu ba̍k-chiu nn̄g luí lóng chheⁿ-mê. Chit pang in chek ū tuì goā kóng chêng khì hō͘ Má I-seng táⁿ-tia̍p lóng hó-hó tńg-lâi, khì-sak tō-lí thiaⁿ hū-jîn-lâng ê oē, sio Siōng-tè ê Sèng-chheh tek-choē thiⁿ lâi tì-kàu án-ne. Goá khǹg i taⁿ tio̍h hoán-hoé sìn Chú, choē ē-tit sià-bián, tuì án-ne ta̍k ji̍t chin ài thiaⁿ tō-lí, chiū kà i kî-tó, chit-tia̍p saⁿ tǹg lóng ū kî-tó, i-ê sim ū khah pêng-an lah! Taⁿ i kóng goá nā tò-khì chiū bô sian-seⁿ, iā bô pài-tn̂g beh àn-choáⁿ-iūⁿ? iū-koh Lîm Chong ū bé chi̍t tè tē chhit-cha̍p goā kho͘ beh chò pài-tn̂g ê lō͘-ēng, hiān-sî beh chhiáⁿ sai-hū khì phah chio̍h.
Chit pang tī-hia chin hó ki-hoē, iā ū chē-chē lâng kóng nā ū pài-tn̂g chiū beh lâi lé-pài; ū-ê kan-chèng in pài pu̍t bô lō͘-ēng. Hia ê kéng-chhat-koaⁿ iā chin ài hia ê lâng pài Siōng-tè, iā kap goá chham-siông, nā ū lâng ài beh thiaⁿ chiū tio̍h siat pài-tn̂g khah ū lō͘-ēng. Chit ê kéng-chhat iā kā goá kóng i bat tī Iâ-so͘-kàu ê ha̍k-hāu tha̍k-chheh.
Lūn chit ê hiaⁿ-tī sī teh kiâⁿ chûn, tī Hêng-chhun chài thô͘-thoàⁿ, hoé-thoàⁿ, nā tú-tio̍h lé-pài-ji̍t chûn chiū bô kiâⁿ; m̄-kú kū-té ê hoé-kì 4, 5 lâng khah ē chó͘-tòng tō-lí ê lâng chiū beh hō͘ i kiâⁿ; iā kan-chèng i siú lé-pài-ji̍t pí pa̍t-lâng khah chìn-pō͘ ka-poē. Taⁿ chit ê hiaⁿ-tī thang chò lia̍t-uī hiaⁿ-tī chí-moē tiōng-siú lé-pài-ji̍t ê bô͘-iūⁿ.
Chhe-sì koè-lâi Chuí-oaⁿ, siūⁿ ài khì pa̍t-sū, iā bô tú-hó hiaⁿ-tī thang chò-hoé khì, ka-tī chin bô liâu; iū-koh chûn-chiah put-piān nā beh chhiàⁿ tio̍h chin chē chîⁿ.
Cha̍p-saⁿ hō chiū chē sió-hoé-chûn tò-lâi Má-keng. Taⁿ chhiáⁿ hiaⁿ-tī chí-moē sî-siông thè hia ê thiaⁿ-tio̍h tō-lí ê lâng kî-tó.
漢羅（Ùi原文改寫）
澎湖的消息。
(李福慶記)。
1915.9，no.366，pp.9
佇7月19號，愚人去Peh-tàu傳道理。近日佇花宅hiuⁿ有加添一戶6人來信主，經過5禮拜久，對信了後就將偶像一概掃除去，真通感謝上帝。二五號佇Peh-tàu禮拜無偌濟人，是因為濟濟人過去台灣。
二十六號坐帆船去東結，佇遐有一個兄弟名林宗，舊年愛請我去傳道理；若是到水灣船隻不便。這pang到位真歡喜，親像雲跋落月，以禮相待。伊信主的原因是前年chhoā伊的叔去新樓醫目睭，紲得著道理，轉來就執守道理，就苦勸家內著拜上帝，除偶像，十三人代先有聽伊苦勸，就將佛除去，用十條誡召teh；若是湊tú崁伊的叔目睭疼講是公媽tek koè-chek。宗兄的婦人人前有做紅姨，隨時上身講是佛無歡喜，in叔就將十條誡佮詩冊攏拆去來燒，燒了目睭兩蕊攏青盲。這pang in叔有對外講前去予馬醫生táⁿ-tia̍p攏好好轉來，棄sak道理聽婦人人的話，燒上帝的聖冊得罪天來致到按呢。我勸伊taⁿ著反悔信主，濟會得赦免，對按呢逐日真愛聽道理，就教伊祈禱，這霎三頓攏有祈禱，伊的心有較平安lah！Taⁿ伊講我若倒去就無先生，也無拜堂欲按怎樣？又閣林宗有買一塊地七十外箍欲做拜堂的路用，現時欲請師傅去拍石。
這pang佇遐真好機會，也有濟濟人講若有拜堂就欲來禮拜；有的干證in拜佛無路用。遐的警察官也真愛遐的人拜上帝，也佮我參詳，若有人愛欲聽就著設拜堂較有路用。這个警察也共我講伊捌佇耶穌教的學校讀冊。
論這个兄弟是teh行船，佇恆春載土炭，火炭，若拄著禮拜日船就無行；毋kú舊底的夥計4，5人較會阻擋道理的人就欲予伊行；也干證伊守禮拜日比別人較進步加倍。Taⁿ這个兄弟通做列位兄弟姊妹重守禮拜日的模樣。
初四過來水灣，想愛去別嶼，也無拄好兄弟通做伙去，家己真無聊；又閣船隻不便若欲倩著真濟錢。
十三號就坐小火船倒來馬公。Taⁿ請兄弟姊妹時常替遐的聽著道理的人祈禱。