論印度國
Lūn ìn-tō͘-kok
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會報 |
| 卷期 | 第365卷 |
| 日期 | 1915/8 |
| 頁數 | 5-6 |
白話字（原文數位化）
Lūn ìn-tō͘-kok
- 8, no. 365, pp. 5-6
ìn-tō͘ kok (chiū-sī Thian-tek kok) ê peh-sìⁿ ū saⁿ bān-bān khah ke, lóng hō͘ Eng-kok koán. Chit pái tī Au-lô-pa chiu tú-tio̍h toā sio-thâi, ìn-tō͘-kok ê peh-sìⁿ kap thâu-lâng chin chhut-la̍t pang-chān Eng-kok, ū-ê ka-kī kam-goān tsoè peng khì sio-thâi, ū-ê hiàn-kim chin tsoē sio-thâi ê sî Tek-kok ū teh ǹg-bāng ìn-tō͘-kok oē hoán-poān, hoán-tńg khoàⁿ ìn-tō͘ ê peh-sìⁿ hiah jia̍t-sim pang-tsān Eng-kok, Tek-kok chiū chin gông-ngia̍h.
Eng-kok koán ìn-tō͘ í-keng ū chin kú. Kok-lāi ū put-chí tsoē hāng chìn-pō͘. Í-keng ū tsō hé-chhia-lō͘ tsa̍p bān lí khah ke; ta̍k nî ū tsài kheh saⁿ pah gō͘-tsa̍p bān: Ū khan jī-tsa̍p bān lí ê tiān-pò-soàⁿ, thang hō͘ kok-lāi thong-sìn khah lī-piān. Kok-lāi ū khui jī-tsa̍p-la̍k bān lí ê tsuí-tsùn lâi koàn-ak nn̄g chheng bān kah chhân. Lūn kàu-io̍k ū siat Tāi-ha̍k, Ko-téng-ha̍k, Tiong-ha̍k kap Sió-ha̍k-hāu chin tsoē; pún-toē lâng ū put-chí tsoē ê khó Ha̍k-sū, Bûn-ha̍k-sū, Lí-ha̍k-sū, I-ha̍k-sū, iā ū khó Phok-sū ê.
Lūn tsong-kàu tuì chin tsá ìn-tō͘-kok ū hōng To-sîn-kàu, chiū-sī ho̍k-sāi tsoē-tsoē sîn-bêng. Chiàu lâng teh sǹg ìn-tō͘-kok ê sîn-bêng ū saⁿ bān-bān khoán khah ke. Hōng Hoê-hoê-kàu ê lâng ia̍h put-chí tsoē. Hoê-hoê-kàu ū sìn Siōng-tè m̄-kú bô oá-khò Ki-tok, khoàⁿ in ê thâu Mô͘-ha̍p-be̍k pí Ki-tok khah tsun-kuì.
Ki-tok-kàu ê Soan-tō-hoē ū thoân tō-lí tī ìn-tō͘ pah-goā nî ê kú. Hiān-sî ū saⁿ-chheng goā-kok Soan-kàu-su tī ìn-tō͘. Í-keng sìn ê lâng ū kuí-nā pah-bān. Ta̍k-nî kiû niá soé-lé ê lâng chin tsoē, khó-sioh chin khiàm kang, bô ki-hoē thang kā in lóng kà-sī tō-lí lâi chiap-la̍p.
ìn-tō͘-kok hōng pún-toē tsong-kàu ê lâng, khoàⁿ Ki-tok-kàu ta̍k nî ná heng-khí, ná ke-thiⁿ lâng-gia̍h chiū put-chí bô hoaⁿ-hí. Kūn-lâi in ū siat-hoat kái-chèng kū ê tsong-kàu, ǹg-bāng peh-sìⁿ chiū khah boē koé kū oāⁿ sin, lâi oá-khò lán ê Tsú. Taⁿ lán tāi-ke kiám m̄-tio̍h thoè ìn-tō͘-kak ê lâng kî-tó, ǹg-bāng in oē kín-kín khì-siâ kui-chèng lâi ho̍k-sāi Siōng-tè, tit-tio̍h éng-oán-oa̍h.
漢羅（Ùi原文改寫）
論印度國
1915.8，no.365，pp.5-6
印度國 (就是天竺國) 的百姓有saⁿ慢慢較加，攏予英國管。這擺佇歐羅巴洲拄著大相刣，印度國的百姓佮頭人真出力幫贊英國，有的家己甘願做兵去相刣，有的獻金真濟相刣的時德國有teh向望印度國會反叛，反轉看印度的百姓hiah熱心幫贊英國，德國就真gông-ngia̍h。
英國管印度已經有真久。國內有不止濟項進步。已經有造火車路十萬里較加；逐年有載客三百五十萬：有牽二十萬里的電報線，通予國內通訊較利便。國內有開二十六萬里的水圳來灌沃兩千萬甲田。論教育有設大學，高等學，中學佮小學校真濟；本地人有不止濟的考學士，文學士，理學士，醫學士，也有考博士的。
論宗教對真早印度國有奉多神教，就是服事濟濟神明。照人teh算印度國的神明有saⁿ慢慢款較加。奉回回教的人亦不止濟。回回教有信上帝毋kú無倚靠基督，看in 的頭Mô͘-ha̍p-be̍k比基督較尊貴。
基督教的宣道會有傳道理佇印度百外年的久。現時有三千外國宣教師佇印度。已經信的人有幾若百萬。逐年求領洗禮的人真濟，可惜真欠工，無機會通共in攏教示道理來接納。
印度國奉本地宗教的人，看基督教逐年ná興起，ná加添人額就不止無歡喜。近來in有設法改正舊的宗教，向望百姓就較袂改舊換新，來倚靠咱的主。Taⁿ咱大家kiám毋著替印度角的人祈禱，向望in會緊緊去邪歸正來服事上帝，得著永遠活。