新中學
Sin Tiong-o̍h
文獻資訊
| 項目 | 資料 |
|---|---|
| 作者 | 顏振聲 Gân Chín-seng |
| 卷期 | 台灣教會報 |
| 卷期 | 第363卷 |
| 日期 | 1915/6 |
| 頁數 | 3-4 |
白話字（原文數位化）
Sin Tiong-o̍h.
- 6, no. 363, pp. 3-4
Tuì Sin-le̍k 2 goe̍h boé Thô͘-chuí seng khí kang, khui 2 ê chíⁿ, chi̍t-ê kīn tī chàu-kha, chi̍t-ê kīn tī e̍k-keng, ū 3 chhioh poàⁿ khoah, chuí tn̄g-jī chhim, chiàu khoàⁿ chuí-chit hó, bē-kiâm, ǹg-bāng kàu-gia̍h chò o̍h-tn̂g ê lō͘-ēng. Tī 3 goe̍h chhe ê sî, khí 4 chō kang-tiûⁿ, kap chhng-khò͘, lîm-sî sū-bū-só͘, iū-koh ba̍k-liāu, chng-á, iûⁿ-hoe, í-ki̍p chhuì-chng, o͘-soa lóng-piān. Saⁿ-goe̍h 15 hō, khui kàu-sek ê tē-ki, kàu hiān-sî nn̄g-keng ê kàu-sek lóng khí-hó, chiū chiap-soà tuì nn̄g-keng siok-sià khí, tē-ki lóng ku̍t hó-sè, í-keng teh chò-piah, iā ū tuì Tâi-lâm-thiaⁿ chhéng-bé kīn-hū hit-ê kū phàu-tâi it-khài ê chio̍h lâi chò tē-ki ê lō͘-ēng.
Tāi-khài kang-tiûⁿ teh tín-tāng put-chí chìn-hêng, si̍t-chāi thang kám-siā Siōng-tè, chóng-sī tāi-lio̍k kì tām-po̍h hō͘ tāi-ke chai. Sui-jiân bô sím-mi̍h siau-sit, iā sī kàu-gia̍h thang hō͘ lán chai kang-sū ê keng-koè. Koh kám-siā lia̍t-uī iú-sim tī chit-keng o̍h-tn̂g, hoaⁿ-hí chàn-sêng lâi kau, in-uī muí-ji̍t ê kang-chîⁿ, tāi-iok tio̍h 70 goā kho͘. iū-koh ba̍k-liāu ê chîⁿ, iā í-keng kàu hān, ta̍k só͘-chāi ê sam-hâng lóng teh chhui-chhú, só͘-í toā-toā ǹg-bāng lia̍t-uī hoaⁿ-hí pī-pān lâi kau, chiah bē gō͘-tio̍h kang-sū.
iā chhíⁿ khoàⁿ Pò ê chèng pêng-iú thè chit keng o̍h-tn̂g kî-tó Siōng-tè, hō͘ kang-sū sūn-chhiú, kap hō͘ chàn-sêng-chiá jia̍t-sim hiòng-gī.
(Gân Chín-seng kì).
漢羅（Ùi原文改寫）
新中學。
1915.6，no.363，pp.3-4
對新曆2月尾塗水先起工，開2个井，一个近佇灶腳，一个近佇浴間，有3尺半闊，水丈二深，照看水質好，袂鹹，向望夠額做學堂的路用。佇3月初的時，起4座工場，佮倉庫，臨時事務所，又閣木料，磚仔，洋灰，以及chhuì-chng，烏沙攏便。三月15號，開教室的地基，到現時兩間的教室攏起好，就接續對兩間宿舍起，地基攏掘好勢，已經teh做壁，也有對台南廳chhéng-bé kīn-hū彼个舊砲台一概的石來做地基的路用。
大概工場teh振動不止進行，實在通感謝上帝，總是大略記淡薄予大家知。雖然無甚物消息，也是夠額通予咱知工事的經過。閣感謝列位有心佇這間學堂，歡喜贊成來交，因為每日的工錢，大約著70外箍。又閣木料的錢，也已經到限，逐所在的杉行攏teh chhui-chhú，所以大大向望列位歡喜備辦來交，才袂誤著工事。
也請看報的眾朋友替這間學堂祈禱上帝，予工事順手，佮予贊成者熱心向義。
(顏振聲記)。