台灣基督教聯合軍
Tâi-oân Ki-tok-kàu Liân-ha̍p-kun
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會報 |
| 卷期 | 第363卷 |
| 日期 | 1915/6 |
| 頁數 | 11-12 |
白話字（原文數位化）
Tâi-oân Ki-to̍k-kàu Liân-ha̍p-kun.
- 6, no. 363, pp. 11
Kàu-hoē sī chhin-chhiūⁿ Iâ-so͘ ê kun-tuī, sî-siông kap Mô͘-kuí chiàn-cheng. Tâi-oân ê kàu-hoē nî-nî chìn-pō͘ ke-thiⁿ khuì-la̍t. Chin kú teh kóng, Lâm Pak ê Kàu-hoē liân-ha̍p ê tsóng-kun-thâu. Sîn-ha̍k-hāu sī chhin-chhiūⁿ ki-koan-chhia. Kàu-hoē kong-hāu toā-poàⁿ sī oá-khò Sîn-ha̍k-hāu ê ha̍k-seng. In āu-lâi ē chò-chêng lâi khui-khoah Tâi-oân ê Kàu-hoē. Só͘-í chit-pái Tāi-hoē 4 goe̍h 27 ji̍t chū-chi̍p tī Tâi-pak Báng-kah lé-pài-tn̂g, tāi-ke kóng m̄-thang koh iân-chhiân chit ê hó-sū. Tio̍h chòng-táⁿ lâi chìn-chêng. Bô lūn Lâm Pak tāi-ke lóng ū tâng-sim tio̍h siat chi̍t-keng, m̄-thang hun chò nn̄g-uī. Chí-ū chi̍t-hāng bô tâng-sim, sī hit ê uī-tì beh siat tī sím-mi̍h só͘-chāi. Ū-ê kóng Tâi-pak, ū-ê kóng Tām-chuí, ū-ê kóng Tâi-lâm, iā ū-ê kóng Tâi-tiong khah hó. Chhin-chhiūⁿ án-ni beh àn-cháiⁿ-iūⁿ? Siat-sú saⁿ-cheⁿ kóng goán Tâi-pak khah hó á-sī goán Tâi-lâm khah hó chiū kàu éng-oán bē-ē chiâⁿ. Tek-khak tio̍h chi̍t pêng lâi niū-pō͘ chiah ē hó-sè. Só͘-í Tāi-hoē pun-choá tâu-phiò. Kéng Tâi-pak--ê 25 phiò, kéng Tâi-lâm--ê 6 phiò, kéng Tâi-tiong--ê 4 phiò. Nā-sī hoē-chèng mn̄g hiah ê kéng Tâi-lâm Tâi-tiong ê hoē-oân khoàⁿ in hoaⁿ-hí thàn khah chē lâng ê ì-kiàn á bô. Chiū chèng hoē-oân peh khí-lâi khiā piáu-bêng tah-èng ê ì-sù, soà gîm-si o-ló Siōng-tè.
Chhin-chhiūⁿ án-ni ǹg-bāng Tâi-lâm ê Kàu-hoē tuì chia chò khí-thâu ē ná chhin-bi̍t bô loā-kú chiū bô lūn lâm-pak tsoân(tsoan) Tâi ê Tiúⁿ-ló-kàu liân-ha̍p chò chi̍t thé. Kî-û Tāi-hoē só͘ chham-siâng ê tāi-chì khah bē pí-tit chit tiâu siāng iàu-kín. Khiok ū kóng-khí bo̍k-su tio̍h hān-jīm á m̄-bián chit tsân. Kì-jiân chhia-poâⁿ kuí-nā tiám-cheng kú, chiū thok-tiōng kok Tiong-hoē chiàu in ka-tī ê ì-kiàn kap tsōng-hóng lâi î-chhî. Khah bān kàu pa̍t-ji̍t ǹg-bāng lióng-pêng it-lu̍t khah hó.
漢羅（Ùi原文改寫）
台灣基督教聯合軍。
1915.6，no.363，pp.11
教會是親像耶穌的軍隊，時常佮魔鬼戰爭。台灣的教會年年進步加添氣力。真久teh講，南北的教會聯合的總軍頭。神學校是親像機關車。教會功效大半是倚靠神學校的學生。In後來會做前來開闊台灣的教會。所以這-擺大會4月27日聚集佇台北艋舺禮拜堂，大家講毋通閣iân-chhiân這个好事。著壯膽來進前。無論南北大家攏有同心著設一間，毋通分做兩位。只有一項無同心，是彼个位置欲設佇甚物所在。有的講台北，有的講淡水，有的講台南，也有的講台中較好。親像按呢欲按怎樣？設使相爭講阮台北較好抑是阮台南較好就到永遠袂會成。的確著一爿來讓步才會好勢。所以大會分紙投票。揀台北--的 25票，揀台南--的 6票，揀台中--的 4票。若是會眾問遐的揀台南台中的會員看in歡喜趁較濟人的意見抑無。就眾會員peh起來徛表明答應的意思，紲吟詩呵咾上帝。
親像按呢向望台南的教會對遮做起頭會ná親密無偌久就無論南北全台的長老教聯合做一體。其餘大會所參詳的代誌較袂比得這條siāng要緊。卻有講起牧師著限任抑毋免這層。既然車盤幾若點鐘久，就託重各中會照in家己的意見佮狀況來維持。較慢到別日向望兩爿一率較好。