自相矛盾
Chū-siong Mâu-tún
文獻資訊
| 項目 | 資料 |
|---|---|
| 作者 | 林清潔 Lîm Chheng-kiat |
| 卷期 | 台灣教會報 |
| 卷期 | 第360卷 |
| 日期 | 1915/3 |
| 頁數 | 6-7 |
白話字（原文數位化）
Tsū-siong Mâu-tún
- 3, no. 360, pp. 6-7
Hiān-kim pún-tó lâng teh pài kong-má, iū koh sìn lûn-hoê tsoán-seng, án-ni chit nn̄g hāng si̍t-tsāi tsū-siong mâu-tún. Taⁿ chhì chiàu in só͘ sìn ê lí-khì lâi lūn. Goá ū chi̍t-pái mn̄g chi̍t-ê sè-sio̍k lâng kóng, “Lín kóng lâng sí-liáu āu-lâi oē koh chhut-sì tsoè lâng. Nā-sī án-ni lán chêng toà tī tó-uī, ia̍h tsoè sím-mi̍h chit-gia̍p lóng m̄-tsai, ia̍h bô chi̍t-lâng tsai, che sī tsái-iūⁿ?” In kóng, Lâng tú-á sí-khì, kè chhit-ji̍t, Thó͘-tī-kong chiū chhoā i khì chia̍h bông-hûn-tsuí to m̄-chai liáu-liáu lah; tsáiⁿ-iūⁿ oē kì-tit chêng siⁿ-sí ê tāi-chì? Goá chiū koh pok i kóng, “Nā-sī án-ni, lín teh pài kong-má ū sím-mi̍h lō͘-ēng? Hiah-ê kong-á má-á í-keng khì chia̍h bông-hûn-tsuí, to m̄-tsai liáu-liáu, ia̍h m̄-tsai i-ê kiáⁿ-sun, ia̍h m̄-tsai tó chi̍t-uī sī i-ê chhù. án-ni lín tī chhù teh pài ū sím-mi̍h lō͘-ēng? Iú-hàu i, i m̄-tsai, pài i, i boē chia̍h; iū koh ū-ê kiám-chhái í-keng khì chhut-sì lah, lín iáu teh chhiáⁿ teh pài, ia̍h poa̍h poe kóng ū lâi chia̍h, án-ni sī tsáiⁿ-iūⁿ?”
āu-lâi hit-ê sè-sio̍k lâng bô oē thang ìn, soà kóng “Put-kò sī thàn hong-sio̍k ia̍h-sī bî-biáu ê sū.” Goá kóng M̄-sī bî-biáu, sī khoài-khoài hun-bêng m̄-tio̍h ê tāi-chì; lín án-ni thàn sī tsū-siong mâu-tún; nā-sī pài kong-má tio̍h, chiū lûn-hoê tsoán-seng m̄-tio̍h, nā-sī lûn-hoê tsoán-seng tio̍h, chiū pài kong-má m̄-tio̍h. Chhâ-khó pài kong-má ê sū, sī tuì chit-ê put-hàu kiáⁿ Teng-lân siat-khí, lín m̄-thang o̍h i. iā lûn-hoê ê sū sī tuì goā-kok thoân lâi ê siâ-kàu, lín m̄-thang sìn. Siⁿ-sí ê sū tû Ki-tok ê Sèng-chheh só͘ kì í-goā pa̍t-lâng lóng m̄ tsai-iáⁿ; sui-jiân gâu chhin-chhiūⁿ Khóng-tsú ia̍h jīn kóng, “Boē oē tsai siⁿ, beh thài oē tsai sí ê sū.”
To̍k-to̍k Ki-tok ū kà-sī lūn lêng-hûn ê sū put-chí siông-sè, iā chin-si̍t ū lí-khì; m̄-sī chhin-chhiūⁿ siâ-kàu ê ū mâu-tún.
(Lîm Chheng-kiat)
漢羅（Ùi原文改寫）
自相矛盾
1915.3，no.360，pp.6-7
現今本島人teh拜公媽，又閣信輪迴轉生，按呢這兩項實在自相矛盾。Taⁿ試照in所信的理氣來論。我有一擺問一个世俗人講，「恁講人死了後來會閣出世做人。若是按呢咱前蹛佇佗位，亦做甚物職業攏毋知，亦無一人知，這是怎樣？」In講，人tú-á死去，過七日，土地公就chhoā伊去食亡魂水to毋知了了lah；怎樣會記得前生死的代誌？我就閣pok伊講，「若是按呢，恁teh拜公媽有甚物路用？遐的公-á媽-á已經去食亡魂水，to毋知了了，亦毋知伊的囝孫，亦毋知佗一位是伊的厝。按呢恁佇厝teh拜有甚物路用？有孝伊，伊毋知，拜伊，伊袂食；又閣有的 kiám-chhái已經去出世lah，恁猶teh請teh拜，亦跋杯講有來食，按呢是怎樣？」
後來彼个世俗人無話通應，紲講「不過是趁風俗亦是微渺的事。」我講毋是微渺，是快快分明毋著的代誌；恁按呢趁是自相矛盾；若是拜公媽著，就輪迴轉生毋著，若是輪迴轉生著，就拜公媽毋著。查考拜公媽的事，是對這个不孝囝丁蘭設起，恁毋通學伊。也輪迴的事是對外國傳來的邪教，恁毋通信。生死的事除基督的聖冊所記以外別人攏毋知影；雖然gâu親像孔子亦認講，「袂會知生，欲thài會知死的事。」
獨獨基督有教示論靈魂的事不止詳細，也真實有理氣；毋是親像邪教的有矛盾。
(林清潔)