楊Lāu-seng小傳
Iûⁿ Lāu-seng Sió-toān
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會報 |
| 卷期 | 第359卷 |
| 日期 | 1915/2 |
| 頁數 | 4 |
白話字（原文數位化）
Iûⁿ Lāu-seng Sió-toān
1915.02 359 koàn p.4
Iûⁿ Lāu-seng(lâng khah siông kiò i Gōng-hiaⁿ), sio̍k Chio̍h-hō͘-soàⁿ ê kàu-hoē; tī 1881 nî, chiū-sī Bo̍k-su thâu chi̍t-pái khì āu-soaⁿ siat kàu-hoē, hit-tia̍p i siū sé-lé, iā ū tam-tng Chip-sū kap Tiúⁿ-ló ê chit.
āu-lâi kàu-hoē chin léng-tām, chin chió lâng lâi lé-pài, chí-ū i chi̍t lâng bat pe̍h-oē-jī thang tha̍k Si kap Sèng-chheh hō͘ lâng thiaⁿ. Chóng-sī i chhut la̍t kó͘-bú, chiàu i só͘ ē lâi kóng hō͘ lâng thiaⁿ, iā kà lâng bat-jī; kàu-hoē lio̍h-lio̍h-á khah heng, khah toā-bīn sī tuì i-ê chīn-tiong. iū-koh Bo̍k-su á-sī Ko͘-niû nā koè-khì, i gâu chih-chiap in; ū-sî koè-soaⁿ kàu lāi pêⁿ-po͘ ê só͘-chāi, chhoā in kàu pài-tn̂g.
Kū-nî koè-óng, hit-sî m̄-sī sím-mi̍h phoà-pēⁿ, kan-ta in-uī i-ê kiáⁿ koè-sin, tuì án-ni hoân-ló kàu koè-thâu, goân-khì chiām-chiām sit. Chiū tài hit-ê sin-thé bô la̍t khùn-chhn̂g. Tī khah toā kan-khó͘ ê sî, i-ê sim toā pêng-an, put-sî kiû Chú koáⁿ-kín chhoā i tńg--khì. I-ê chhuì tī khùn-bîn ê sî khah-siông sī kî-tó ê oē.
Kàu āu-lâi ū chi̍t mê chi̍t ji̍t siông-siông thó͘ toā khuì, kā lâng kóng i put-chí khoà-lū. Mn̄g i khoà-lū sím-mi̍h, i kóng, “goá hoân-ló iáu-boē ū pîn-kù thang hō͘ Chú chiap-la̍p.”
Kàu ū chi̍t chá-khí chiū hoaⁿ-hí kàu bē kò͘-tit, kóng i í-keng ū pîn-kù thang hō͘ Chú chipa-la̍p lah! Sim pêng-an lah! Mn̄g sím-mi̍h pîn-kù? Chiū liām i só͘ siūⁿ-tio̍h ê Sèng-chheh chat hō͘ lâng thiaⁿ; chiū-sī liām tī Lô-má 4:7,8. Lâng ū choē tit-tio̍h sià, ū m̄-tio̍h hō͘ Siōng-tè jia-khàm, ū hok-khì; Chú bô lia̍h i sī ū choē ê, ū hok-khì. Chiū chheng sim hoaⁿ-hí kàu koè-sin.
漢羅（Ùi原文改寫）
楊Lāu-seng小傳
1915.02 359卷 p.4
楊Lāu-seng(人較常叫伊憨兄)，屬石雨傘ê教會，tī 1881年，就是牧師頭一擺去後山設教會，hit-tia̍p 伊受洗禮，也有擔當執事kap長老ê職。
後--來教會真冷淡，真少人來禮拜，只有伊1人bat白話字 thang讀詩kap聖冊hō͘人聽。總--是伊出力鼓舞，照伊所會來講hō͘人聽，也教人bat 字，教會略略仔較興，較大面是對伊ê盡忠。又koh牧師抑是姑娘若過--去，伊gâu chì接in；有時過山到來平埔ê所在，chhoā in 到拜堂。
舊年過往，hit時m̄是甚mih破病，kan-ta 因為伊ê子過身，對án-ni煩惱到過頭，元氣漸漸失。就帶hit 個身体無力睏床。 Tī 較大艱苦ê時，伊ê心大平安，不時求主趕緊chhoā伊轉--去。伊ê嘴tī 睏眠ê時較常是祈禱ê話。
到後來有1暝1日常常吐大氣，kā人講伊不止掛慮。問伊掛慮甚mih，伊講：「我煩惱iáu-boē有憑據thang hō͘主接納。」
到有一早起就歡喜到bē顧tit，講伊已經有憑據thang hō͘主接納--lah！問甚mih憑據？就唸伊所想著ê聖冊節hō͘ 人聽；就是唸 tī 羅馬4：7，8。「人有罪得著卸，有m̄著hō͘上帝遮khàm,有福氣；主無掠伊是有罪ê,有福氣。」就清心歡喜到過身。