彰化佈道會
Chiang-hoà Pò͘-tō-hoē
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會報 |
| 卷期 | 第359卷 |
| 日期 | 1915/2 |
| 頁數 | 9-10 |
白話字（原文數位化）
Chiang-hoà Pò͘-tō-hoē
(N̂g Sū-bēng kì).
- 2, no. 359, pp. 9-10
Chiang-hoà kū-nî 6 goe̍h kan ū o̍h Tâi-lâm ê hó bô͘-iūⁿ, siat Pò͘-tō ián-soat-hoē. Muí goe̍h goe̍h kng 3 mê- hng, iā bat 4 mê-hng, khui Pò͘-tō ián-soat. Lâi ián-soat--ê, chiū-sī Oân-lîm Kok-goân kun, Lâm-tâu Sè-chù kun, Toā-o̍h Liāu Tit kun, Tâi-tiong Tek-lūn kun, Tok-hêng kun, kīn-hū kàu-hoē jia̍t-sim ê hiaⁿ-tī, kap goán pè-hoē ê Bo̍k-su, I-seng, Pò-tō-su, í-ki̍p goán kuí ê tông-chì ê hiaⁿ-tī. Tit-tio̍h Siōng-tè ê in-tián ki-hoē chin hó; siāng-chē bat chheng it jī lâng, siāng-chió bat pah-goā lâng, pêng-siông sī 4, 5 pah lâng.
Só͘ ēng ê hoat-tō͘ lóng sī kap goá uī sio-tâng; chiū-sī chhut kóng-kò, pun chin-lí toaⁿ, ēng im-ga̍k chhut-khì, iā bat tiâu-tî ēng àn-lāi-chn̄g, (chhiáⁿ-thiap) lâi chhiáⁿ thong siâⁿ lāi goā í-ki̍p chiū-kīn-chng ê Sin-sū Khu-tiúⁿ Pó-chèng. (Tē 7 hoê).
Taⁿ kàu kū-nî nî-boé khui tē 8 hoê ê Pò͘-tō ián-soat-hoē. Chin kám-siā Siōng-tè ta̍k-hoē ū hó ki-hoē. Chóng-sī chi̍t-sî thiⁿ-khì chin koâⁿ, koh án kū-le̍k ê koè-nî, kiaⁿ-liáu khah bô lâng ē-tit lâi, só͘-í goán ū chiām-thêng; ǹg-bāng kàu kū-le̍k ê chiaⁿ-goe̍h, goán ē koh khui tē 9 hoê ê Pò͘-tō-hoē.
Tī chit-ê Pò͘-tō-hoē khui-liáu hiān-sî khiok iáu-boē kìⁿ chhut loā toā kong-hāu. Chóng-sī ū ta-po͘ lâng nn̄g saⁿ lâng, hū-jîn-lâng kuí-nā lâng bat siông-siông lâi lé-pài. Koh ū chē-chē lâng hiān-sî ū teh chim-chiok gián-kiù chit ê Ki-tok-kàu ê tō-lí, chóng-sī iā teh chù-ba̍k khoàⁿ Ki-tok-tô͘ só͘ kiâⁿ só͘ chò cháiⁿ-iūⁿ. ài-à! Chi̍t-sim thang hoaⁿ-hí, chi̍t sim thang kiaⁿ-hiâⁿ. Só͘ thang hoaⁿ-hí--ê, chiū-sī lâng ū chai tō-lí kap i ū kan-sia̍p, chiah ū teh gián-kiù; só͘ thang kiaⁿ-hiâⁿ--ê, chiū-sī lán Ki-tok-tô͘ kiaⁿ-liáu poa̍h-tó āu-piah ê Ki-tok-tô͘.
Taⁿ phí-jîn kèng-siá chit kuí kù, sī ài kiû tông-chêng ê haiⁿ-ché tio̍h siông-siông thè goán kî-tó, bián-tit chêng-āu ê kang kui tī khang-khang, ē tit-tio̍h chē-chē hó koé-chí hō͘ Siōng-chú siu-sêng: chiàⁿ sī Sim-só͘-goān.
漢羅（Ùi原文改寫）
彰化佈道會
(黃俟命記)。
1915.2，no.359，pp.9-10
彰化舊年6月間有學台南的好模樣，設佈道演說會。每月月光3暝昏，也捌4暝昏，開佈道演說。來演說--的，就是員林國元君，南投世註君，大學廖得君，台中Tek-lun君，Tok-hêng君，近附教會熱心的兄弟，佮阮敝會的牧師，醫生，報道師，以及阮幾個同志的兄弟。得著上帝的恩典機會真好；siāng濟捌千一二人，siāng少捌百外人，平常是4，5 百人。
所用的法度攏是佮我uī相同；就是出廣告，分真理單，用音樂出去，也捌tiâu-tî用案內狀，(請帖)來請通城內外以及就近庄的紳士區長保正。(第7回)。
Taⁿ到舊年年尾開第8回的佈道演說會。真感謝上帝逐會有好機會。總是一時天氣真寒，閣án舊曆的過年，驚了較無人會得來，所以阮有暫停；向望到舊曆的正月，阮會閣開第9回的佈道會。
佇這个佈道會開了現時卻猶未見出偌大功效。總是有ta-po͘人兩三人，婦人人幾若人捌常常來禮拜。閣有濟濟人現時有teh斟酌研究這个基督教的道理，總是也teh注目看基督徒所行所做怎樣。ài-à！一心通歡喜，一心通驚惶。所通歡喜--的，就是人有知道理佮伊有干涉，才有teh研究；所通驚惶--的，就是咱基督徒驚了跋倒後壁的基督徒。
Taⁿ鄙人敬寫這幾句，是愛求同情的兄姊著常常替阮祈禱，免得前後的工歸佇空空，會得著濟濟好果子予上主收成：正是心所願。