英國佮澳洲
Eng-kok kap Au-chiu
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會報 |
| 卷期 | 第356卷 |
| 日期 | 1914/11 |
| 頁數 | 9 |
白話字（原文數位化）
Eng-kok kap Au-chiu
Chiàn-sū 的 Koan-hē.
- 11, no. 356, pp. 9
Hiān-sî Au-chiu chiàn-cheng 的 sū sǹg sī chin loān, chāi hia khah chhut-miâ 的 kok lóng thoa-loa--lo̍h-khì tī chiàn-tiûⁿ 的 tiong-kan, chit hō hō͘ lâng thang kiaⁿ 的 sū, sī jîn-ài 的 lâng só͘ put-jím thiaⁿ 的, nā-sī hit hō khah iá-sim 的, hoán-tńg ū ki-hoē thang chò chiâⁿ in 的 só͘ ǹg-bāng. Tong-sî 的 khí-sū sī tuì Ò-tāi-lī kap Sek-ní-î, in-uī àm-sat 的 iân-kò͘, sǹg-sī chi̍t-lia̍p hoé-chheⁿ 的 sió-khoá, thài ē chai kui 的 chháu-po͘ soà sio-tio̍h liáu-liáu; chhin-chhiūⁿ Ngô͘ Tek, Hoat sio chiap-soà ká-lá--lo̍h-khì teh sio-thâi, ū lâng mn̄g kóng, Eng-kok siáⁿ-sū iā chham-ka lo̍h--khì? Chiū ìn i kóng, Sī uī-tio̍h put-tek-í 的 iân-kò͘. Lūn kàu chit-pang chiàn-sū 的 khí-in m̄ sī Eng-kok jiá khí-thâu, chiū ta̍k kok 的 teh kau-chiàn, iā m̄-sī Eng-kok so-sú in. iū-koh Eng-kok chhut lâi teh kau-sia̍p, kì-jiân m̄-sī ài beh chhim-chiàm lâng 的 thó͘-tē, ia̍h m̄-sī beh chhiúⁿ-toa̍t lâng 的 kun-káng. án-ni m̄-sī in-uī su-khia 的 lī-ek khí-kiàn sǹg sī bêng-bêng. Nā-sī in ē chhut lâi kau-sia̍p sī cháiⁿ-iūⁿ? Sī ū nn̄g hāng:-
-
Pe̍k-ní-gī sī sió-sió khoá-khoá 的 chi̍t kok, Tek-kok ài beh kiông-kiông kā in chioh lō͘ koè-khì kong Hoat-kok. Chāi Pe̍k-ní-gī kóng, án-ni sī phò-hāi in 的 tiong-li̍p, m̄-khéng sêng-lo̍k. Tek-kok suî-sî kap in soan-chiàn. Chóng-sī chāi-chá lia̍t-kok ū li̍p-iok, beh saⁿ-kap pó-hō͘ Pe̍k-ní-gī, chiū-sī Tek-kok iā ū sêng-jīn. Taⁿ Tek-kok lâng lâi phò-hāi Pe̍k-ní-gī 的 tiong-li̍p, sī bô koh-iūⁿ i ka-tī poē-iok, nā-sī Eng-kok beh chiàu hit 的 tiâu-iok lâi kiâⁿ, chīn in pó-hō͘ 的 chek-jīm, só͘-í tuì Tek-kok lâng 的 kiâⁿ-ta̍h si̍t-chāi bē-sái-tit kiu-chhiú tiàm piⁿ-á khoàⁿ-tit.
-
Tek-kok bô in bô toaⁿ jiá chit 的 chai-hō hō͘ Hoat-kok. Eng, Hoat nn̄g kok pún-té ū hia̍p-iok, kau-po的 chin hó, nā beh kan-ta khoàⁿ lán kau-po的 的 kok tú-tio̍h hoān-lān, bô beh khì kiù in, sǹg sī Eng-kok chin toā chin kú 的 kiàn-siàu, só͘-í tiàu-chi̍p lio̍k-kun phài khì Pe̍k-ní-gī, kap in saⁿ-kap tí-tng Tek-kok lâng. Pí-phēng lâng pàng hoé tī lán keh-piah, lán phoe-miā lâi khì kiù, che sǹg-sī eng-kai 的 chit-hūn, in-uī kiaⁿ-liáu hit 的 hoé ē soà sio tuì lán 的 chhù lâi. Taⁿ Tek-kok 的 teh kong Hoat-kok, sī chhin-chhiūⁿ pàng hoé tī lán keh-piah, lán phoe-miā lâi khì kiù, che sǹg-sī eng-kai 的 chit-hū, in-uī kiaⁿ-liáu hit 的 hoé ē soà sio tuì lán 的 chhù lâi. Taⁿ Tek-kok 的 teh kong Hoat-kok, sī chhin-chhiūⁿ pàng hoé tī lán keh-piah. Eng-kok khì kiù in, iā sī eng-kai 的 chit-hūn. Koh Eng-kok hiān-sî ū chiàu Hái-gâ Pêng-hô-hoē 的 tiâu-kui lâi kiâⁿ, khoán-thāi tuì-te̍k, bô ū uî-ke̍h kong-chiòng 的 hoat-tō͘, iā bô ēng choa̍t jîn-tō 的 kiâⁿ-ta̍h. Chóng-sī Eng-kok ē chham-ka tī Au-chiu 的 chiàn-cheng, lâi sí-sit chin-chē 的 kun-peng, khai-liáu bô tàng-sǹg 的 só͘-huì, sī hō͘ kong-gī 的 só͘ pek-tio̍h, chiah ē lâi chò án-ni, só͘-í kóng sī chhut tio̍h put-tek-í lah!
(Hoan-e̍k).
漢羅（Ùi原文改寫）
英國佮歐洲
戰事的關係。
1914.11，no.356，pp.9
現時歐洲戰爭的事算是真亂，在遐較出名的國攏thoa-loa--落去佇戰場的中間，這號予人通驚的事，是仁愛的人所不忍聽的，若是彼號較野心的，反轉有機會通做成in 的所向望。當時的起事是對Ò-tāi-lī佮Sek-ní-î，因為暗殺的緣故，算是一粒火星的小可，thài會知規的草埔紲燒著了了；親像俄德，法相接續ká-lá--落去teh相刣，有人問講，英國啥事也參加落--去？就應伊講，是為著不得已的緣故。論到這pang戰事的起因毋是英國惹起頭，就逐國的 teh交戰，也毋是英國唆使in。又閣英國出來teh交涉，既然毋是愛欲侵佔人的土地，亦毋是欲搶奪人的軍港。按呢毋是因為私khia 的利益起見算是明明。若是in會出來交涉是怎樣？是有兩項：-
1.白耳義(Belgium)是小小可可的一國，德國愛欲強強共in借路過去攻法國。在白耳義講，按呢是迫害in 的中立，毋肯承諾。德國隨時佮in宣戰。總是在早列國有立約，欲相佮保護白耳義，就是德國也有承認。Taⁿ德國人來迫害白耳義的中立，是無各樣伊家己背約，若是英國欲照彼个條約來行，盡in保護的責任，所以對德國人的行踏實在袂使得勼手踮邊仔看得。
2.德國無因無端惹這个災禍予法國。英，法兩國本底有合約，交陪真好，若欲kan-ta看咱交陪的國拄著患難，無欲去救in，算是英國真大真久的見笑，所以召集陸軍派去白耳義，佮in相佮抵擋德國人。比並人放火佇咱隔壁，咱phoe命來去救，這算是應該的職份，因為驚了彼个火會紲燒對咱的厝來。Taⁿ德國的 teh攻法國，是親像放火佇咱隔壁，咱phoe命來去救，這算是應該的職分，因為驚了彼个火會紲燒對咱的厝來。Taⁿ德國的 teh攻法國，是親像放火佇咱隔壁。英國去救in，也是應該的職份。閣英國現時有照海峽平和會的條規來行，款待對敵，無有違逆公眾的法度，也無用絕人道的行踏。總是英國會參加佇歐洲的戰爭，來死失真濟的軍兵，開了無tàng算的所費，是予公義的所逼著，才會來做按呢，所以講是出著不得已lah！
(翻譯)。