牛taⁿ灣的消息
Gû-taⁿ-oan ê Siau-sit
文獻資訊
| 項目 | 資料 |
|---|---|
| 作者 | 王倚 Ông oá |
| 卷期 | 台灣教會報 |
| 卷期 | 第356卷 |
| 日期 | 1914/11 |
| 頁數 | 2 |
白話字（原文數位化）
Gû-taⁿ-oan ê Siau-sit
Ông oá kì.
- 11, no. 356, pp. 2
Gû-taⁿ-oan sī sió só͘-chāi, put-kò lán ū kàu-hoē tī hia, tī Phoh-á-kha lâm-pêng saⁿ-lī ū 9 lí lō͘. Ū 400 chó-iū hō͘; Kàu-hoē siat ū 30 chó-iū nî; hiān-sî sìn-tô͘ ū 77 hō͘, pún-chng tìn 52 hō͘. Chím-má ke chi̍t kháu-chàu iā ū 5, 6 ê lâi thiaⁿ, ǹg-bāng ē tiâu. Chú-ji̍t-o̍h ū hun lâm-lú 2 pêng teh kà, ha̍k-seng ū 70 goā, kàu-oân 12 miâ. Tha̍k nn̄g-tiám poàⁿ cheng kú, tiong-kan iā ū teh ū-pī ióng-sim Sîn-si ê si-tiāu. iā teh pī-pān beh khèng-chiok Kiù-chú-tàn; hō͘ kuí-nā ê lāu-lâng oa̍t-liām Sèng-chheh, kî-tiong chi̍t-ê kin-nî 74 hoè, Sèⁿ Pe̍k miâ Âng. I 60 hoè sìn tō-lí, 64 hoè o̍h pe̍h-oē, koh hiān-sî ba̍k-chiu í-keng hoe lah, tio̍h ēng toā jī ê Sèng-keng, the̍h oá ba̍k-chiu iok chhùn-poàⁿ chiah ū khoàⁿ-kìⁿ, iū koh toā-chi̍h, iáu-kú ū oa̍t-liām Lō͘-ka Hok-im-toān la̍k-pah goā chat, teh liām ê sî lóng bē toā-chi̍h.
Taⁿ goá siá chiah ê m̄-sī uī-tio̍h oa̍t-liām ê lâng thang hō͘ i miâ-siaⁿ tháu, sī uī-tio̍h khoàⁿ Pò ê chu-kun; ǹg-bāng lín toā siū kám-kek. Lín khah siàu-liân--ê, ba̍k-chiu iáu lāi, bāng lín bô beh jīn-su.
漢羅（Ùi原文改寫）
牛taⁿ灣的消息
王倚記。
1914.11，no.356，pp.2
牛taⁿ灣是小所在，不過咱有教會佇遐，佇Phoh-á跤南爿相離有9里路。有400左右戶；教會設有30左右年；現時信徒有77戶，本庄鎮52戶。Chím-má 加一口灶也有5，6个來聽，向望會tiâu。主日學有分男女2爿teh教，學生有70外，教員12名。讀兩點半鐘久，中間也有teh預備養心神詩的詩調。也teh備辦欲慶祝救主誕；予幾若个老人越念聖冊，其中一个今年74歲，姓白名紅。伊60歲信道理，64歲學白話，閣現時目睭已經花lah，著用大字的聖經，the̍h倚目睭約寸半才有看見，又閣大舌，iáu-kú有越念路加福音傳六百外節，teh念的時攏袂大舌。
Taⁿ我寫chiah 的毋是為著越念的人通予伊名聲tháu，是為著看報的諸君；向望恁大受感激。恁較少年--的，目睭猶內，望恁無欲認輸。