陳雲程小傳
Tân Hûn-thêng Sió-toān
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會報 |
| 卷期 | 第355卷 |
| 日期 | 1914/10 |
| 頁數 | 7 |
白話字（原文數位化）
Tân Hûn-thêng Sió-toān
1914.10 355 koàn p.7
Tân Hûn-thêng Thoân-tō sī Tâng-oaⁿ sio̍k, Kim-tun hiuⁿ ê lâng, chhut-sì tī A.D.1852. I saⁿ hè ê sî pē-bú ū î-ku lâi Tâi-oân, khiā-khí tī Gō͘-khó͘-khiⁿ tsng tióng-seng. I 21 hè ê sî ū khì tsoè Kai Bo̍k-su ê ha̍k-seng, āu-lâi i chiū tsoè thoân-tō, toà tī kuí-nā só͘-chāi ê pài-tn̂g. án-ni tsoè kang ū 26 nî kú, í-āu ū hioh-khùn 2 nî goā, kàu Hoâ bo̍k-su kàu Tâi-oân ê sî, I ū lâi kà-sī I-ê thó͘-im, iā ū pang-chān I-koán kap Lú-o̍h-tn̂g ê kang, koh siông-siông thoân tō-lí. Tuì hit-sî I ê sin-thé chia̍p-chia̍p ū tú-tio̍h phoàⁿ-pīⁿ, chiū boē-oē koh tam-tng khah tsoē ê kang-tiâⁿ. āu-lâi I ū siū-phài khì thoân tō-lí tī Sū-lîm-koe ê lé-pài-tn̂g. I ū tú-tio̍h sim-tsong-pīⁿ chiū hut-jiân hūn-khì put-chí kú chiah tsai lâng. Tuì án-ni sin-thé chiū koh-khah soe-lám, put-tek-put tio̍h hioh kang, lâi chēng-ióng sin-thé. Hit-nî I tú-tú sī 60 hè, ū tsoè kang tī kàu-hoē lāi 37nî ê kú. Tuì án-ni I chiū chhoā I-ê ke-āu kè hái khì Hok-chiu, kap I-ê toā kiáⁿ khiā-khí, tī hia 4 ge̍h ji̍t kú, I-ê pīⁿ ná tāng bô khí chhn̂g. Ū Bí-pō͘-hoē ê Bo̍k-su, Tiúⁿ-ló chia̍p-chia̍p lâi thàm I , soà thoè I kî-tó; koh siông-siông ū tsū-chi̍p I ê kàu-hoē lâi ke-lāi lé-pài. Í-āu chiâⁿ tsa̍p ji̍t ê tiong-kan lâng ū khah sóng-khoài, chiū siūⁿ beh tò lâi Tâi-oân, bô phah-sǹg soà koh hō͘ I kám-tio̍h chin siong-tiong, chiū tī A.D.1914,3 ge̍h 27 hō an-jiân siān-chiong. I ū hióng-siū 62 hè. Ū bâi-tsòng tī Bân-ip Lâm-koan goā Sî-seng-lí, Gô-thâu-hōng, niá kàu-hoā ê hûn-tē.
漢羅（Ùi原文改寫）
陳雲程小傳
1914.10 355卷 p.7
陳雲程傳道是同安屬，金敦鄉ê人，出世tī A.D. 1852。伊3歲ê時父母有移居來台灣，企起tī Gō͘ -khó͘ -khiⁿ庄長成，伊21歲ê時有去做偕牧師ê學生，後來伊就做傳道，toà tī幾若所在ê拜堂，án-ni做工有26年久，以後有歇兩年外，到華牧師到台灣ê時，伊有來教示伊ê土音，對hit-tia̍p有接續教宋醫生ê土音，也有幫贊醫館佮女學堂ê工，koh常常傳道理，對hit時伊ê身體捷捷有抵著破病，就boē會koh擔當較濟e工程，後來伊有受派去傳道理tī士林街ê禮拜堂。伊有抵著心臟病就忽然暈去不止久才知人，對án-ni身體就koh較衰lám,不得不著歇工，來靜養身體，hit年伊抵抵是60歲，有做工tī教會內37年ê久，對án-ni伊就 chhoā伊ê家後過海去福州，佮伊ê大子企起，tī hia四月日久，伊ê病愈重無起床。有Bí-pō͘-hoē ê牧師、長老捷捷來探--伊，續替伊祈禱，koh常常有聚集伊ê教會來家內禮拜，以後誠十日ê中間人有較爽快，就想beh倒來台灣，無扑算煞hō͘伊感著真傷重，就tī A.D.1914，3月27號安然善終。伊有享壽62歲，有埋葬tī閩邑南關外辭生里，鵝頭鳳嶺教會ê墳地。