宜蘭教會
Gî-lân Kàu-hoē
文獻資訊
| 項目 | 資料 |
|---|---|
| 作者 | 林清廉 Lîm Chheng-liâm |
| 卷期 | 台灣教會報 |
| 卷期 | 第351卷 |
| 日期 | 1914/6 |
| 頁數 | 6 |
白話字（原文數位化）
Gî-lân Kàu-hoē
Lîm Chheng-liâm
- 6, no. 351, pp. 6-7
Hiān-sî Gî-lân koe ê kàu-hoē ū kuí-nā uī lâi saⁿ-kap, chiū-sī Pái-lî, Sin-ná-hán, Bú-loán án-ni chiū khah lāu-jia̍t, iā khah oa̍h-tāng. Koh tī nn̄g saⁿ nî ê tiong-kan ū ke-thiⁿ 10 goā ê Hàn-jîn lâi thiaⁿ tō-lí, kuí-nā lâng í-keng niá soé-lé. Lé-pài-ji̍t téng-po͘ tī pún pài-tn̂g tsoè lé-pài pêng-kun ū 60 tsó-iū lâng, tiong-kan 4 hūn 3 hūn sī Pîⁿ-po͘, 1 hūn sī Hàn-jîn. Ē-po͘ sî chi̍t lé-pài tī Pái-lî, chi̍t lé-pài tī Sin-ná-hán kap Bú-loán 5 só͘-tsāi kap in tsū-chi̍p.
Lūn Bú-loán kap Sin-ná-hán chit nn̄g só͘-tsāi ê kàu-hoē ū oá 30 hō͘, toā-soè ū pah goā lâng, hiān-sî chin léng-tām, bô kuí lâng beh lâi Gî-lân koe tsoè lé-pài. Ē-po͘ sî nā khì beh kap in tsū-chi̍p lé-pài, tio̍h ta̍k tè chhù khì kiò in, ū-ê chhuì ìn hó, kha iā m̄ kiâⁿ oá. Teh tsū-chi̍p khah siông sī 10 goā lâng nā-tiāⁿ.
Pái-lî ê kàu-hoē chiū m̄-sī án-ni, in toā soè chiah ū 40 lâng, iáu-kú muí lé-pài ū 20 goā lâng lâi lé-pài. Ē-po͘ sî nā tī in hia tsū-chi̍p iā put-chí tsoē lâng. Khah tsoē sī oē hiáu tha̍k Sèng-keng. Kin-nî Gî-lân koe ê kàu-hoē thâu chi̍t pái ū tsū-chi̍p Bān-kok tâng-kî chhit ji̍t kî-tó hoē, sī ē-hn̂g sî tsū-chi̍p. Ta̍k pái khah siông 20 goā lâng; tú-tn̄g hit kuí ji̍t thàu sng-hong chin koâⁿ, iáu-kú ta̍k ê-hng ū lâng tuì Pái-lî lâi saⁿ-kap tsū-chi̍p, koh ū kuí-nā ê hū-jîn-lâng pêng-sò͘ tī lé-pài ê sî m̄ káⁿ chhut siaⁿ kî-tó, hit-tia̍p in ū kā-kī khui-siaⁿ kî-tó. Chin kám-siā Siōng-tè in-uī Pái-lî kap Gî-lân koe chit 2 só͘-tsāi ê kàu-hoē ū lio̍h-á teh chìn-pō͘. Chhiáⁿ khoàⁿ Pò chiah ê saⁿ-thiàⁿ ê hiaⁿ-tī thoè Bú-loán kap Sin-ná-hán ê kàu-hoē kî-tó, kiû Tsú pang-tsān, hō͘ in koh heng-khí.
(Lîm Chheng-liâm kì-ê.)
漢羅（Ùi原文改寫）
宜蘭教會
林清廉
1914.6，no.351，pp.6-7
現時宜蘭街的教會有幾若位來相佮，真是Pái-lî，Sin-ná-hán，Bú-loán按呢就較鬧熱，也較活動。閣佇兩三年的中間有加添10外个漢人來聽道理，幾若人已經領洗禮。禮拜日頂晡佇本拜堂做禮拜平均有60左右人，中間4份3份是平埔，1份是漢人。下晡時一禮拜佇Pái-lî，一禮拜佇Sin-ná-hán佮Bú-loán 5所在佮in 聚集。
論Bú-loán佮Sin-ná-hán這兩所在的教會有倚30戶，大細有百外人，現時真冷淡，無幾人欲來宜蘭街做禮拜。下晡時若去欲佮in聚集禮拜，著逐綴厝去叫in，有的喙應好，跤也毋行倚。Teh聚集較常是10外人nā-tiāⁿ。
Pái-lî 的教會就毋是按呢，in大細隻有40人，iáu-kú每禮拜有20外人來禮拜。下晡時若佇in遐聚集也不止濟人。較濟是會曉讀聖經。今年宜蘭街的教會頭一擺有聚集萬國同期七日祈禱會，是ē昏時聚集。逐擺較常20外人；拄tn̄g彼幾日透酸風真寒，iáu-kú逐ê昏有人對Pái-lî來相佮聚集，閣有幾若的婦人人平素佇禮拜的時毋敢出聲祈禱，彼霎in有家己開聲祈禱。真感謝上帝因為Pái-lî佮宜蘭街這2所在的教會有略仔teh進步。請看報chiah 的相疼的兄弟替Bú-loán佮Sin-ná-hán的教會祈禱，求主幫贊，予in閣興起。
(林清廉記的。)