台北傳道會
Tâi-pak Thoân-tō-hoē
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會報 |
| 卷期 | 第351卷 |
| 日期 | 1914/6 |
| 頁數 | 5 |
白話字（原文數位化）
Tâi-pak Thoân-tō-hoē.
- 6, no. 351, pp. 5
Tī 5 ge̍h 13 ji̍t téng-po͘ 10 tiám poàⁿ cheng, Tâi-pak ê Thoân-tō-hoē ū tsū-chi̍p tī Tiong-le̍k Lé-pài-tn̂g. Lâi hù-hoē ê Bo̍k-su 5 lâng, Thoân-tō-su 18 lâng. Chit pang bô khó-sì, só͘-í Se-kok Bo̍k-su bô lâng lâi.
Tsú-lí Tân Chheng-gī ū chhoā chèng lâng lé-pài kap siú Sèng-chhan. Ū chhiáⁿ Tiong-le̍k ê kàu-hoē lâi saⁿ-kap siú, āu-lâi khui-hoē. Chit pang ū kú Koa An-lo̍k Bo̍k-su tsoè sin tsú-lí ia̍h kú Tiuⁿ Kim-pho kap Keh A-cheng nn̄g ê thoân-tō-su tsoè chiàⁿ hù ê sú-kì. Chit pái thâu bé ū tsū-chi̍p nn̄g ji̍t kú, tāi-ke ū saⁿ-kap gī-lūn lī-ek kàu-hoē ê sū, ia̍h ta̍k lâng ū kóng in pún-tn̂g ê siau-sit lâi saⁿ bián-lē; tāi-ke thiaⁿ liáu put-chí tit-tio̍h iú-ek. Mî-sî ū chhut khì koe-chhī pò͘-tō. Ū pun tsoè gō͘ tuī, kok Bo̍k-su chiáng chi̍t tuī. Tāi-ke tit-tio̍h put-chí hó ki-hoē, nn̄g ê-hng tsóng-kiōng ū 1100 goā lâng thiaⁿ-kìⁿ tō-lí. Tiong-le̍k ê hiaⁿ-tī chin chhut-la̍t giâ teng chhoā-lō͘, phoè-tì só͘-tsāi. Koh ū tit-tio̍h chi-thiaⁿ-tiúⁿ kap kéng-chhat koaⁿ ê khoan-liông, lóng bô tsó͘-tòng, só͘-í ū chit ê hó ki-hoē thang pò-iông Tsú ê hok-im hō͘ hiah tsoē lâng thiaⁿ-kìⁿ. Taⁿ chhiáⁿ tāi-ke tio̍h thè chiah ê thiaⁿ tō-lí ê lâng kî-tó, ǹg-bāng tī hit tiong-kan ū lâng oē lâi tsoè Ki-tok-tô͘.
Chit pang Thoân-tō-hoē tsū-chi̍p tī Tiong-le̍k, ū tit-tio̍h chèng hiaⁿ-tī chí-moē ê hó khoán-thāi, tio̍h kā in seh siā. Ū gí-tiāⁿ āu-hoē beh tsū-chi̍p tī Lâm-khàm lé-pài-tn̂g, in-uī hia ê kàu-hoē ū lâi chhiáⁿ. Ji̍t-kî chiū-sī sin-le̍k 10 ge̍h tē sì lé-pài ê pài-saⁿ, téng-po͘ 8 tiám cheng.
漢羅（Ùi原文改寫）
台北傳道會。
1914.6，no.351，pp.5
佇5月13日頂晡10點半鐘，台北的傳道會有聚集佇中壢禮拜堂。來赴會的牧師5人，傳道師18人。這pang無告示，所以西國牧師無人來。
主理陳清義有chhoā眾人禮拜佮守聖餐。有請中壢的教會來相佮守，後來開會。這pang有舉柯安樂牧師做新主理亦舉張金波佮郭A-cheng兩个傳道師做正副的史記。這擺頭尾有聚集兩日久，大家有相佮議論利益教會的事，亦逐人有講in本堂的消息來相勉勵；大家聽了不止得著有益。暝時有出去街市佈道。有分做五隊，各牧師掌一隊。大家得著不止好機會，兩的昏總共有1100外人聽見道理。中壢的兄弟真出力giâ燈chhoā路，配置所在。閣有得著支廳長佮警察官的寬容，攏無阻擋，所以有這个好機會通報揚主的福音予hiah濟人聽見。Taⁿ請大家著替chiah 的聽道理的人祈禱，向望佇彼中間有人會來做基督徒。
這pang傳道會聚集佇中壢，有得著眾兄弟姊妹的好款待，著共in說謝。有擬定後會欲聚集佇南崁禮拜堂，因為遐的教會有來請。日期就是新曆10月第四禮拜的拜三，頂晡8點鐘。