鹿港拜堂

Lo̍k-kángPài-tn̂g

文獻資訊

項目	資料
作者	盧慶耀 Lô͘ Khèng-iàu
卷期	台灣教會報
卷期	第350卷
日期	1914/5
頁數	10

白話字（原文數位化）

Lo̍k-káng Pài-tn̂g

1914.05 350 Koàn p.10

Lô͘ Khèng-iàu

Tī 3 goe̍h 26 hō Lo̍k-káng ū kiâⁿ hiàn tn̂g-sek ê lé.  Lé-pài-thiaⁿ koân 2 tn̄g, chhim 3 tn̄g 6 chhioh, khoah 2 tn̄g 4 chhioh ê si̍t-lāi.  Sì bīn lóng ū chhut-pō͘, chhut 7 chhioh 2 chhùn, lāi-bīn goā-bīn lóng pho͘ chng. Piah sī ēng chng thia̍p kàu 3 chhioh 3 koân. Khí-lâi chiū ēng tek-á pìn, lāi-bīn boah hoe, goā-bīn boah thn̂g-chuí hoe. Thâu chêng chi̍t ê toā mn̂g 2 ê thang-á, chó-pêng 2 ê thang-á chi̍t ê mn̂g, iū-pêng iā sī án-ni, āu-bīn tī chiūⁿ-téng lâu 2 ê hái tiông-thang-á, tī ē-bīn 2 ê thang-á. Thang sī cháu thoah-ê, iā lóng sī po-lê, mn̂g sī chhâ-ê chò se-iûⁿ sek. Chhù-koà ū khàm Ji̍t hiā. Sió-chhù sī thiap siū-khí 5 keng. án-ni só͘ khai ê kim-hāng,hiaⁿ-tī chò kang bô sǹg chāi-lāi, kiōng Y2024.53, kū lé-pài-tn̂g ê liāu thiah lâi khí sió-chhù iā bô sǹg gia̍h.

Taⁿ chhiáⁿ khoàⁿ Pò ê hoē-iú thè goán hoaⁿ-hí. Ū nn̄g chân sū hō͘ lán kì-liām Siōng-tè beh êng-kng I ê Kiáⁿ lán ê Chú tī chit Lo̍k-káng, chiū-sī hē tē-ki ê sî ū tú-tio̍h hong-thai, kai-chài lán boé khiā tàng. Khí-hó ê sî ū tú-tio̍h hoé-chai, chin kai-chài lán ê lé-pài-tn̂g ū khí thè āu. Chóng-kóng chiū-sī Siōng-tè beh khoàⁿ-kò͘ Lo̍k-sêng peh-sìⁿ, hō͘ Chú ê tō-lí ū thang tī chia pò-iông kàu lóng ē chiām-chiām thiaⁿ-tio̍h. Tio̍h thè goán kî-kiû Siōng-tè hō͘ chit ê pài-tn̂g bô loā-kú ē chē kàu moá-moá .

Hit-sî goán soà siat Pò͘-tō hoē, chheng goā lâng lâi thiaⁿ tō-lí, Ū chē kàu tīⁿ that-that, iáu-kú lóng chēng-chēng tì-ì teh thiaⁿ, bāng chē-chē lâng siū kám-kek.

(Lô͘ Khèng-iàu kì-ê)

漢羅（Ùi原文改寫）

鹿港拜堂

1914.05 350卷 p.10

盧慶耀

佇3月26號鹿港有行獻堂式的禮。禮拜廳懸2丈，深3丈6尺，闊2丈4尺的實內。四面攏有出步，出7尺2寸，內面外面攏鋪磚。壁是用磚疊到3尺3懸。起來就用竹仔編，內面抹花，外面抹糖水花。頭前一个大門2个窗仔，左爿2个窗仔一个門，右爿也是按呢，後面佇上等樓2个海長窗仔，佇下面2个窗仔。窗是走thoah的，也攏是玻璃，門是柴的做西洋式。厝蓋有蓋日瓦。小厝是thiap受起5間。按呢所開的金項，兄弟做工無算在內，共Y2024.53，舊禮拜堂的料拆來起小厝也無算額。

Taⁿ請看報的會友替阮歡喜。有兩層事予咱紀念上帝欲榮光伊的囝咱的主佇這鹿港，就是下地基的時有拄著風颱，佳哉咱boé徛tàng。起好的時有拄著火災，真佳哉咱的禮拜堂有起退後。總講就是上帝欲看顧落成百姓，予主的道理有通佇遮報揚到攏會漸漸聽著。著替阮祈求上帝予這个拜堂無偌久會坐到滿滿。

彼時阮紲設佈道會，千外人來聽道理，有坐到tīⁿ that-that，iáu-kú攏靜靜致意teh聽，望濟濟人受感激。

(盧慶耀記的)