論蛇

Lūn Choâ

文獻資訊

項目	資料
作者	無lo̍h名
卷期	台灣教會報
卷期	第350卷
日期	1914/5
頁數	10

白話字（原文數位化）

Lūn Choâ

1914.05 350 Koàn P.10

Choâ lóng-chóng ū chheng goā téng-hō, ū-ê khah toā-boé, ū-ê khah sè, ū-ê khah to̍k, ū-ê khah bô ; choâ ê phoê ia̍h ū kuí-nā khoán, ū-ê chit hāng sek,ū-ê hit hāng sek, ū-ê chi̍t choā chi̍t choā, ū-ê chi̍t tiám chi̍t tiám, khiok kóng bē liáu.

Sio̍k tī khah hân-tō ê só͘-chāi lóng bô choâ, nā sī jia̍t-tō ê só͘-chāi ná ū choâ, choâ ia̍h ná to̍k.    Nā sī lūn Eng-kok bô sím-mi̍h choâ, só͘ ū-ê khah sè boé, khah bô to̍k , lâng khah bô kiaⁿ.Tī Iû-thài kok sǹg sī chē. Lán thang chai iáⁿ in-uī tī Sèng-keng ū kì chin chē pái, he̍k-sī chiong choâ chò phì-jū,á-sī kóng chin ê choâ ê tāi-chì lóng ū.

Siāng tn̂g ê choâ lêng-chûn-kut ū sì pah goā tè, chit khoán ê choâ toà tī ìn-tō͘ kok kap A-hui-lī-ka.   Tī hiah ê só͘-chāi lâng chin kiaⁿ choâ nā kā lâng koè bô kuí hun chiū sí.

Choâ ê ba̍k-chiu sè luí, bô loā kim, sǹg sī khah hoe, iā bô hī-khang, só͘-í tio̍h oá-khò phīⁿ thang chhoē chia̍h ê mi̍h.

Choâ ê chi̍h m̄ chai bī, nā ài chia̍h mi̍h, chhuì-khí lóng bô kā, kan-ta chò chi̍t ē thun lo̍h-khì. Só͘ ài chia̍h ê chiū-sī tōng-bu̍t, chhin-chhiūⁿ hî, chui-ke, chiáu, giâ-kang, siān-lâng chit khoán. Tuì ba̍k-chiu hoe ê iân-kò͘ choâ ēng chi̍h tāi-seng thàm-khoàⁿ chhoē lō͘, koh ēng chi̍h chhì só͘ beh chia̍h ê mi̍h.

Choâ ê chhuì-khí khah té, m̄-kú chiam-lāi; chhuì-khí kap ē-táu ê kut liân chò-hoé.  Ta̍k ki ê tiong-ng ū lō͘ thang hō͘ to̍k cháu chhut-lâi. To̍k ū khǹg tī nn̄g ê tē-á, tī ba̍k-chiu ê āu-piah. Choâ nā ài kā mi̍h, bô lūn sī lâng á-sī sím-mi̍h pa̍t hāng ê tōng-bu̍t, hit ê to̍k chiū tuì tē-á lâu kàu chhuì-khí thâu chiah ji̍p hit ê bó͘ mi̍h tōng-bu̍t ê bah.

Nā-sī lūn choâ tī Sèng-keng , khiok ū kì  kuí-nā pái, chhiáⁿ lán lâi chhoē hiah ê khah chhù-bī ê chiuⁿ-chat lâi káng-kiù. Choâ ū káu-khiat iā ū tì-sek. “Siōng-tè só͘ chhòng-chō oa̍h mi̍h ê tiong-kan bô chi̍t hāng pí choâ khah káu-khiat”(    ).  “Tio̍h ū tì-sek chhin-chhiūⁿ choâ, sūn-liông chhin-chhiūⁿ chíⁿ-á”(    ).

Choâ ê to̍k ū kóng khí kuí-nā pái, khah siông sī pí-phēng pháiⁿ lâng. “In ê to̍k chhin-chhiūⁿ choâ ê to̍k”(    ).”In ê chi̍h chin lāi, ná chhin-chhiūⁿ choâ, in ê chhuì lāi khǹg to̍k choâ ê to̍k”(    ).

Iâ-so͘ iā ū chiong choâ pí-phēng Hoat-lī-sài lâng, “To̍k choâ ê luī”(    ).

ài chia̍h chiú ê lâng tio̍h chai,”Chiú ê siong-hāi chhin-chhiūⁿ choâ, i ê to̍k iā chhin-chhiūⁿ choâ”(    ). Che sī ū tì-sek ê lâng ê oē, só͘-í lán m̄ thang lia̍h-chò sī bô iáⁿ ê oē.

Choâ iā ū pí-phēng Mô͘-kuí, “Siōng-tè kā hu-jîn-lâng kóng, Lí cháiⁿ-iūⁿ chò ah? Hū-jîn-lâng kóng, Choâ ín-iú goá chia̍h” (    ). “Chāi-chá ū choâ iā miâ kiò Mô͘-kuí, Sat-tàn,pêng-só͘ bê-he̍k thiⁿ-ē peh-sìⁿ”(    ).

Ū Chi̍t pái Siōng-tè kiâⁿ sîn-jiah hō͘ chi̍t ki koáiⁿ-á piⁿ chò choâ. “Iâ-hô-hoa kóng, Lí chhiú kia̍h-ê sī sím-mi̍h ? ìn kóng ,sī koáiⁿ-á. Kóng thang hiat tī tē-nih. Chiah hiat-lo̍h khì, chiū pìⁿ chò choâ”(    ).

Nā-sī lūn tâng-choâ ê tāi-chì ê tō-lí, lán tāi-ke lóng chai-iáⁿ. “Chāi-chá Mô͘-se kú-khí choâ tī khòng-iá, Jîn-chú hō͘ lâng kú-khí iā chhin-chhiūⁿ i “(    ).

oá-khò Siōng-tè ê lâng m̄ bián kiaⁿ choâ. Iâ-so͘ bat kóng “Goá siúⁿ-sù lín koân-lêng ē ta̍h choâ kap giat-á, chè-ap tuì-te̍k lóng-chóng ê khuì-la̍t, iā tek- khak bô só͘ hāi lín-ê”(    ). Sìn ê lâng chiū ū sîn-jiah toè i , chiū-sī thok-tiōng Goá ê miâ koáⁿ kuí, kóng ta̍k kok ê thó͘-im, lia̍h choâ, lim to̍k iā bô siong-hāi”(    ).Che sī í-keng hián-bêng “Pó-lô poāⁿ choâ tī hoé, lóng bô chi̍t-tiám-á ê siong-hāi”(    ).

漢羅（Ùi原文改寫）

論蛇

1914.05 350卷 P.10

蛇攏總有千外等號，有的較大尾，有的較細，有的較毒，有的較無；蛇的皮亦有幾若款，有的這項式，有的彼項式，有的一choā一choā，有的一點一點，卻講袂了。

屬佇較寒道的所在攏無蛇，若是熱道的所在ná有蛇，蛇亦ná毒。若是論英國無甚物蛇，所有的較細尾，較無毒，人較無驚。佇猶太國算是濟。咱通知影因為佇聖經有記真濟擺，或是將蛇做譬喻，抑是講真的蛇的代誌攏有。

Siāng長的蛇龍船骨有四百外塊，這款的蛇蹛佇印度國佮亞非利加。佇遐的所在人真驚蛇若咬人過無幾分就死。

蛇的目睭細蕊，無偌金，算是較花，也無耳孔，所以著倚靠鼻通揣食的物。

蛇的舌毋知味，若愛食物，喙齒攏無咬，kan-ta做一下吞落去。所愛食的就是動物，親像魚，水雞，鳥，蜈蚣，siān-lâng這款。對目睭花的緣故蛇用舌代先探看揣路，閣用舌試所欲食的物。

蛇的喙齒較短，毋kú chiam內；喙齒佮下斗的骨連做伙。逐支的中央有路通予毒走出來。毒有囥佇兩个袋仔，佇目睭的後壁。蛇若愛咬物，無論是人抑是甚物別項的動物，彼个毒就對袋仔流到喙齒頭才入彼个某物動物的肉。

若是論蛇佇聖經，卻有記幾若擺，請咱來揣遐的較趣味的章節來講究。蛇有狡譎也有智識。「上帝所創造活物的中間無一項比蛇較狡譎」(    )。「著有智識親像蛇，純良親像鴿仔」(    )。

蛇的毒有講起幾若擺，較常是比並歹人。「In 的毒親像蛇的毒」(    )。」In 的舌真利，ná親像蛇，in 的喙內囥毒蛇的毒」(    )。

耶穌也有將蛇比並法利賽人，「毒蛇的類」(    )。

愛食酒的人著知，」酒的傷害親像蛇，伊的毒也親像蛇」(    )。這是有智識的人的話，所以咱毋通掠做是無影的話。

蛇也有比並魔鬼，「上帝共夫人人講，你怎樣做ah？婦人人講，蛇引誘我食」(    )。「在早有蛇也名叫魔鬼，撒旦，平素迷惑天下百姓」(    )。

有一擺上帝行神跡予一支柺仔邊做蛇。「耶和華講，你手kia̍h的是甚物？應講，是柺仔。講通hiat佇地裡。才hiat落去，就變做蛇」(    )。

若是論銅蛇的代誌的道理，咱大家攏知影。「在早摩西舉起蛇佇曠野，人子予人舉起也親像伊」(    )。

倚靠上帝的人毋免驚蛇。耶穌捌講「我賞賜恁權能會踏蛇佮蠍仔，制壓對敵攏總的氣力，也的確無所害恁的」(    )。信的人就有神跡綴伊 ，就是託重我的名趕鬼，講逐國的土音，掠蛇，啉毒也無傷害」(    )。這是已經顯明「保羅拌蛇佇火，攏無一點仔的傷害」(    )。