台島消息
Tâi-tó siau-sit
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台灣教會報 |
| 卷期 | 第350卷 |
| 日期 | 1914/5 |
| 頁數 | 11 |
白話字（原文數位化）
Tâi-tó ê Siau-sit.
- 5, no. 350, pp. 11-12
A-lí-san. Chèng-hú ū khai-oá 500 bān kho͘ lâi keng-êng Ka-gī thiaⁿ koán-lāi A-lí-san ê san-lîm. Ū tsō hoé-chhia-lō͘, ia̍h ū khí chè-chhâi-só͘.
Hoé-chhia-lō͘ í-keng thàu A-lí-san chin kú, ia̍h ū tsài chē-chē ba̍k-liāu chhut-lâi lah. Put-hēng tī kū-nî khiā-chhiu tú-tio̍h toā sún-hāi, tì-kàu ūn-poaⁿ thêng-chí. Taⁿ í-keng koh siu-lí hó, tuì 3 goe̍h boé chiū koh tsài chhâ chhut lâi. Kàu tī 4 goe̍h chhe Chè-chhâi-só͘ ia̍h í-keng ūn(ún)-tsoán chè-tsō ba̍k-liāu, sêng-chek chin-hó.
Kin-nî ia̍h beh koh ke-thiⁿ ki-koan-chhia ê khuì-la̍t. Kū-té 28 tùn(tūn) ê chhia 1 tiuⁿ, 18 tùn(tūn) ê chhia 7 tiuⁿ, 13 tùn(tūn) ê chhia 2 tiuⁿ. Kin-nî koh ke 28 tùn(tūn) ê chhia 3 tiuⁿ, 13 tūn ê chhia 1 tiuⁿ. Ū-soàn muí-ji̍t ē thang tsài bo̍k-liāu 800 chhioh tsó-iū lâi Ka-gī.
Chè-chhâi-só͘ sī khí tī Ka-gī siâⁿ-piⁿ, chin ióng koh suí; tû chit keng í-goā, Ka-gī bô ū khah ta̍t-chî ê chhù. Hiān-sî í-keng khí hó, ki-khì ia̍h í-keng tàu piān.
Tang-pō͘ ê thih-tō. Chèng-hú só͘ keng-êng Tâi-oân tang-pō͘ ê thih-tō, sī tī Bêng-tī 40 nî kè-e̍k, kàu 42 nî chiū khí-kang. Tāi-seng sī tsō Kheng-piān thih-tō, āu-lâi chiū tsō Cheng-khì ê thih-tō.
Tsāi Bêng-tī 43 nî 12 goe̍h 16 hō cheng-khì thih-tō thâu-pái ū khai thong kàu Lí-hî-boé; kàu Bêng-tī 44 nî 5 goe̍h 15 hō Kheng-piān thih-tō ia̍h tsoân-thong.
Í-āu cheng-khì thih-tō chiām-chiām chìn-pō͘ lo̍h lâm, kheng-piān thih-tō ia̍h tuì án-ni chiām-chiām kiám-chió. Chhin-chhiūⁿ Bêng-tī 44 nî 7 goe̍h 15 hō koh chìn-pō͘ kàu Khe-kháu; 45 nî 6 goe̍h 15 hō koh chìn-pō͘ kàu Hōng-nâ; Tāi-chèng 2 nî 11 goe̍h 20 hō koh chìn-pō͘ kàu Má-thài-oaⁿ. Taⁿ tī kin-nî 3 goe̍h 8 hō koh chìn-pō͘ kàu Poa̍t-á-tsng.
漢羅（Ùi原文改寫）
台島的消息。
1914.5，no.350，pp.11-12
阿里山。政府有開倚500萬箍來經營嘉義廳管內阿里山的山林。有造火車路，亦有起制裁所。
火車路已經透阿里山真久，亦有載濟濟木料出來lah。不幸佇舊年徛秋拄著大損害，致到運搬停止。Taⁿ已經閣修理好，對3月尾就閣載柴出來。到佇4月初制裁所亦已經運轉制度木料，成績真好。
今年亦欲閣加添機關車ê氣力。舊底28噸ê車1張，18噸ê車7張，13噸ê車2張。今年閣加28噸ê車3張，13噸ê車1張。預算每日會通載木料800尺左右來嘉義。
制裁所是起佇嘉義城邊，真勇閣媠；除這間以外，嘉義無有較值錢ê厝。現時已經起好，機器亦已經鬥便。
東部ê鐵道。政府所經營台灣東部ê鐵道，是佇明治40年計畫，到42年就起工。代先是造輕便鐵道，後來就造蒸汽ê鐵道。
在明治43年12月16號蒸汽鐵道頭擺有開通到鯉魚尾；到明治44年5月15號輕便鐵道亦全通。
以後蒸汽鐵道漸漸進步落南，輕便鐵道亦對按呢漸漸減少。親像明治44年7月15號閣進步到溪口；45年6月15號閣進步到鳳林；大正2年11月20號閣進步到馬太鞍。Taⁿ佇今年3月8號閣進步到拔仔庄。