做醮

Tsoè-chiō

文獻資訊

項目	資料
作者	無lo̍h名
卷期	台灣教會報
卷期	第346卷
日期	1914/1
頁數	7

白話字（原文數位化）

Tsoè-chiò

1914.01 346Koàn P.7

Chit pang tī Thô-hn̂g koe ū tsoè-chiò, thâu bé 5 ji̍t kú chin lāu-jia̍t, ke-ke hō͘-hō͘ chin sêng-sim, khai chîⁿ chin tsoē ; muí ke iok-lio̍k ū khai Y80.00. Koh ū toê kong-iân Y7000 goā kho͘ lâi tsoè kong huì, ia̍h ū kat 8 ê toâⁿ, poaⁿ 62 pîⁿ ê hì. Koh ū thâi 3000 goā chiah ê toā ti , in ū chheng-ho͘ i ê miâ tsoè ti kong ēng âng thâu-tsang-bé kā i piⁿ tī bé-liu . Tē-it toā chiah ê ū 605 kun, thiaⁿ-kìⁿ kóng iáu-bē thâi ê sî, chin chiàu-kò͘ I, khiām-mi̍h hō͘ i chia̍h, ū-ê 3 ji̍t bô chia̍h chiong hiah ê mi̍h hō͘ i chia̍h.  Ū-ê bô chîⁿ thang lia̍h ti, chioh gîn ka-gō͘ lāi lâi lia̍h; ia̍h ū-ê chiong boē tsa-bó͘-kiáⁿ ê gûn lâi ēng.

Tī hit 5 ji̍t tiong-kan ta̍k-ke ū lâng-kheh put-tn̄g; in-uī ū tsoē-tsoē lâng tuì sì hng lâi khoàⁿ lāu-jia̍t.  Chiàu lâng teh kā in sǹg, chit pang in tsoè-chiò só͘ khai ê keng-huì, lóng-tsóng tio̍h Y30,0000(saⁿ-tsa̍p bān) í-siōng. Chin chiàⁿ thang kóng sī jia̍t-sim kap kam-goān .    Lán kèng-pài Siōng-tè ê lâng nā oē chhin-chhiūⁿ in hiah kam-goān, Tâi-oân ê kàu-hoē m̄-bián hoân-ló bô keng-huì, ia̍h m̄-bián hō͘ goā-kok ê Kàu-hoē pó͘-tsō͘, liâm-piⁿ chiâⁿ-tsoè to̍k-li̍p.

漢羅（Ùi原文改寫）

做醮

1914.01 346卷 P.7

這pang佇桃園街有做醮，頭尾5日久真鬧熱，家家戶戶真誠心，開錢真濟；每家約略有開 Y80.00。閣有提公緣Y7000外箍來作公費，亦有結8个壇，搬62 pîⁿ 的戲。閣有刣3000外隻的大豬，in有稱呼伊的名做豬公用紅頭鬃尾共伊piⁿ佇尾溜。第一大隻的有605斤，聽見講猶未刣的時，真照顧伊，儉物予伊食，有的 3日無食將遐的物予伊食。有的無錢通掠豬，借銀ka-gō͘內來掠；亦有的將賣查某囝的銀來用。

佇彼5日中間逐家有人客不斷；因為有濟濟人對四方來看鬧熱。照人teh共in算，這pang in最少所開的經費，攏總著Y30,0000(三十萬)以上。真正通講是熱心佮甘願。咱敬拜上帝的人若會親像in hiah甘願，台灣的教會毋免煩惱無經費，亦毋免予外國的教會補助，連鞭成做獨立。