顏A-hó 別式
Gân A-hó pia̍t-sè
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台南府城教會報 |
| 卷期 | 第345卷 |
| 日期 | 1913/12 |
| 頁數 | 8 |
白話字（原文數位化）
Gân A-hó pia̍t-sè
1913.12 P.8-9
Gân-sī A-hó gín-á ê sî toà tī Oân-lí-ke, sī koaⁿ-ka ê lú-chú, Eńg-chím ê toā cha-bó͘-kiáⁿ. Seⁿ-sêng lêng-khiáu ū tám-le̍k, tit-tio̍h pē-bó chin thiàⁿ-sioh i.
Goân-pún choân ke lóng sī sè-sio̍k, i ê lāu-bó seng tit-tio̍h tō-lí, chiū siat-hoat hō͘ i lâi Lú-o̍h thang tha̍k chheh. Ji̍p o̍h hit-tia̍p sim lóng bô him-bō͘ Chú ê tō-lí, kàu āu-lâi chiām-chiām siū kám-hoà, bêng-pe̍k chin-lí, niá sé-lé ji̍p Sèng-kàu.
Cha-bó͘ gín-á nā beh ji̍p Lú-o̍h lóng tio̍h liû kha. A-hó hit-sî bô án-ni, sī beh chhì-khoàⁿ i toà Lú-o̍h ē tiâu á-bē. āu-lâi i chai lâng pa̍k kha sī bô ha̍p Chú ê kà-sī chiū liû kha. uī-tio̍h chit ê tāi-chì hō͘ in ke-lāi ê lâng kài siū-khì, nā pàng o̍h i lóng m̄-káⁿ tò-khì Oân-lí-ke, tio̍h khì toà in bó-î tau.
Tiàm o̍h-lāi nā khoàⁿ pêng-iú phoà-pīⁿ, chin gâu chiàu-kò͘ in. Tò-khì in chhù ū kám-kek in ê chhin-lâng, chêng in siū-khì, soà pìⁿ-chò hoaⁿ-hí chiap-la̍p tō-lí, bô loā-kú thong-ke lóng sìn Chú.
Chut-gia̍p liáu chiū phoè Gô͘ Tō-goân Sian-siⁿ, guâ tī ke, kong-pêⁿ khoán-thāi i ê kiáⁿ-jî, hán-tit ū lâng chhin-chhiūⁿ i hiah ū kong-tō sim, iā toā pang-chān tiōng-hu.
Chit Tâi-lâm chhī lāi ū saⁿ-uī siat pài-jī ê kî-tó hoē, Tang-mn̂g, Thài-pêng-kéng, Sai-mn̂g goā. Gô͘ Sian-siⁿ niû tī chit Sai-mn̂g goā ê kî-tó hoē put-chí kó͘-bú, ū-sî chò chú-lí, ū-sî chio lâng lâi hù; khí-thâu piàⁿ i ê chhù hō͘ lâng chū-chi̍p.
Tī 1912 nî Gô͘ Sian-siⁿ khì Ē-mn̂g chò sū-gia̍p, Sian-siⁿ niû iā toè i khì. Toà hia ji̍t-ji̍t ná ióng, bô phah-sǹg kīn-ji̍t ū chiap-tio̍h tiān-pò kóng, i ê chèng-thâu guî lah, hō͘ lâng gông-ngia̍h. Koè bô kuí ji̍t chiū kap sè-kan saⁿ-sî. Thiaⁿ lâng kóng sī náu chhut hoeh.
Khó-sioh pàng chin chē gín-á bô bó thang chiàu-kò͘; siāng sè-ê tō͘-chè goā, lán bē bián-tit thè i hoân-ló. Lūn chit lâng lâi sìn Chú, chi̍t hāng sī tuì in lāu-bó ê chhut-la̍t, chi̍t hāng sī tuì ko͘-niû gâu ín-chhoā; iū-koh chi̍t hāng sī Lú-o̍h ê ha̍k-seng siông-siông thè i kî-tó, lán iû-goân tio̍h ēng án-ni lâi thé-thiap i ke-lāi ê lâng, thang ké in ê iu-būn, ke-thiⁿ in ê an-uì.
漢羅（Ùi原文改寫）
顏A-hó 別式
1913.12 P.8-9
顏氏A-hó 囡仔 ê時toà tī 苑裡街，是官家 ê 女子， Eńg-chím ê大查某囝。 生成靈巧有膽力，得著父母真疼惜伊。
原本全家攏是世俗，伊ê老母先得著道理，就設法hō͘伊來女學thang讀冊。入學hit-霎心攏無欣慕主ê道理，到後來漸漸受感化，明白真理，領洗禮入聖教。
查某囡仔若beh入女學攏著留腳。 A-hó hit時無án-ni，是beh試看伊toà 女學會tiâu á-bē。後來伊知人縛腳是無合主ê教示就留腳。為著這個代誌hō͘ in家內ê人kài受氣，若放學伊攏m̄敢倒去苑裡街， 著去toà in 母姨兜。
Tiàm學內若看朋友破病，真gâu照顧in。 倒去in厝有感激in ê親人，前in受氣，soà變做歡喜接納道理，無loā-久通家攏信主。
卒業了就配吳道源先生，guâ 治家， 公平款待伊ê 囝兒，罕得有人親像伊 hiah有公道心，也大幫贊丈夫。
這台南市內有三位設拜二 ê祈禱會， 東門，太平景，西門goā。 吳先生娘 tī 這西門goā ê祈禱會不止鼓舞，有時作主理，有時招人來赴；起頭piàⁿ伊ê厝hō͘人聚集。
Tī 1912年吳先生去廈門做事業，先生娘也toè伊去。Toà hia日日ná 勇，無拍算近日有接著電報講：伊ê症頭危 lah， hō͘人gông-ngia̍h. 過無幾日就kap世間相辭。聽人講是腦出血。
可惜放真濟囡仔無母thang照顧;，siāng 細-ê 度晬goā，咱bē免得替伊煩惱。論這人來信主，一項是對in老母ê出力，一項是對姑娘gâu引chhoā；又koh一項是女學ê學生常常替伊祈禱，咱猶原著用án-ni來體貼伊家內ê人，thang ké in ê憂悶，加添in ê安慰。